San Mateo 26
26
Aráansejani lun lárügüdǘniwa Jesúsu
(Mr 14.1-2; Lc 22.1-2; Jn 11.45-53)
1Dan aríñaga láali Jesúsu sun cátei le, ába laríñagun joun láni disípulugu.
2—Quei jasúbudiruni, bián wéyu lárigiñe le, ligíame fédu le páscua, áni nedéregerúaba, áu le Wügǘri Garaǘwarügüti, lun nádarawagún luágu gurúwa.
3Ába joúndaragun jábutigu fádirigu, arúfudajatiña lilúrudun Moisés, jáma wügǘriña weírigutiña lídan jafíñen juríu tigíbugiñe lúban Gáifasi, fádiri le íñutimaabei. 4Ñi jaráanseja luágu Jesúsu lun járügüdüni láu yéguaü, lun jáfaruni jilágubei. 5Jaríñagati.
—Máma látia fédurugu lueí jachágaragun gürígia.
Tájuduraguni ában wǘri lábulugu Jesúsu
(Mr 14.3-9; Jn 12.1-8)
6Betániañein Jesúsu, lúbiñe Simón lé meja gawágubei gumeín luágu sun lúra, 7ába tiábin ában wǘri luágun, gámeina tugúya ában lágei ibíñei le weíriti lisérun. Dan luáguñein lan dábula Jesúsu, ába téseruni ibíñei ligía lábulugun. 8Dan jaríjinbaalin disípulugu cátei le, ába jamágundarun, ába jaríñagun.
—¿Cámesan leféridirúa le ítara? 9Gayáraati jamúgagu lalúgurúniwa le luágu sarágu seínsu lun jíderawagún gudémetiña.
10Ába lagáambuni Jesúsu le jaríñagubei, ába laríñagun joun.
—¿Ca uágu jañáwurija tun wǘri to? Cátei buíti le tadǘgübei. 11Súnwandan yábaña lan gudémetiña júma, ánjein áu, mámaba súnwandan júma nan. 12Le tadǘgübei wǘri to láu téseruni ibíñei le nuágun, taráanseruñádina lubá nábunúniwa. 13Ninárün jáu luágu le lan ñí lumuti lapúrichijoúa ugánu luáguti asálbaruni lídan sun uboú, labájüdawagúaba gíñe le tadǘgübei wǘri to, lun larítawagún tuágu.
Lalúguruni Júdas Jesúsu
(Mr 14.10-11; Lc 22.3-6)
14Ába lídin ában jádaangiñe dúusu disípulugu, le gíribei Júdas Iscarióte, adímureja jáma jábutigu fádirigu. 15Ába laríñagun joun.
—¿Atiribei jíchugun nun ánjein nedéregera Jesúsu jun?
Ába jíchugun darándi murúsun pláta lun. 16Lúmagiñeti óra ligía, ába láluajan Júdas ída lúba lan luwúyeri ledéregeruni Jesúsu joun.
Lagúmujoún leígin Jesúsu jáma lánigu
(Mr 14.12-25; Lc 22.7-23; Jn 13.21-30; 1 Co 11.23-26)
17Le furúmiñeti wéyu lídan fédu le ñí lubei teigúa fein magánatu ísi, ába jayábin disípulugu lúmoun Jesúsu, ába jaríñagun lun.
—¿Jalía babúseera waráanserun lun ñíba lan wadǘgei eígini le lánina páscua?
18Ába laríñagun joun.
—Jeíba ubúrugu, lúbiñe ítaga wügǘri, ábame jaríñagun lun. “Ítara líña laríñagun Maésturu. Yaráfaali nórate, búbiñeba nefédujei páscua jáma náni disípulugu.”
19Ába jadǘgüni disípulugu quei laríñaguni Jesúsu joun, ába jaráanseruni eígini le lánina páscua.
20Dan le lagúñedunbei, ába lañúurun Jesúsu luágu dábula jáma láni dúusu disípulugu, 21súnti añája lan eíga, ába laríñagun joun.
—Ninárün jáu luágu lalúgurubadina lan ában jídaangiñe.
22Ábati jajírudagun, ába jagúmeserun álügüdei ában ában.
—Nabúreme, ¿nugúya funásan?
23Ába laríñagun joun.
—Le éderutu leígan fein núma lídan asíedu, ligiába alúgurana. 24Nídiña, áu le Wügǘri Garaǘwarügüti, luágu ǘma le uágubei taríñaga Lerérun Búngiu, áni ¡fugíabutia wügǘri le alúgurutina! Buítimaati jamúga lun magǘriajoúagubei lan.
25Ábati ladímurejan Júdas, ába lálügüdajan.
—Maésturu, ¿nugúya funásan?
Ába laríñagun Jesúsu lun.
—Ánja, bugúya.
26Dan añája lan eíga, ába lanǘgünun Jesúsu fein lújaburugu, ába leteíngiruni Búngiu tuágu, lásun lagúbachagunun, ába líchugunun joun láni disípulugu, aríñageina.
—Joújuma, núgubu le.
27Lárigiñe, ába lárügüdün ában wéru buin táu diweín lújaburugu, ába leteíngiruni Búngiu tuágu, ába lásügüragüdüni joun, aríñageina.
—Gurájuma lídaangiñe le, sun jugúya. 28Níta le, le añúuragüdübalin iséri darádu, le gíñe áwiyurubei joun sarágu gürígia lun ferúdunawa lan jafígoun. 29Naríñajare jun luágu mátundügüyaadina lan diweín daríme wéyu le lúnbei nátunun iséri tuwúyeri diweín júma lídan larúeijan Núguchi Búngiu yágüta siélu.
Laríñaguni Jesúsu luágu leyéedaguba lan Pédro láu
(Mr 14.26-31; Lc 22.31-34; Jn 13.36-38)
30Lárigiñe jerémujani urému luágu Búngiu, ába joúdin luágu wǘbü Olívos. 31Ába laríñagun Jesúsu joun láni disípulugu.
—Sun jugúya, jasándiraguba júngua láu magúraasuni nuágu áriebu le, ladǘga laríñajare tídan Lerérun Búngiu. “Náfarubei joúniri mudún jilágubei, ábame jeréderun mudún chagágu.” 32Lárigiñeme násaarun lídaangiñe oúweni lúnya nabágaridun, nídiba Galiléa jubáragiñe.
33Ába laríñagun Pédro lun.
—Gayáraati járügüdün súngubei magúraasuni buágu, nugúya no.
34Ábati laríñagun Jesúsu lun.
—Ninárün báu luágu áriebu méme lan le, lubáragiñe layúgurujan gáyu, beyéedaguba náu ǘrüwa weíyaasu.
35Ába laríñagun Pédro lun.
—Gayáraati noúnwen búma, meyéedagunbadina báu.
Ligía méme gíñe jaríñaga sun disípulugu.
Layúmuragun Jesúsu lun Búngiu, Getsemaní
(Mr 14.32-42; Lc 22.39-46)
36Ábati lachǘlürün Jesúsu jáu láni disípulugu lídoun ában fulásu gíriti Getsemaní, ába laríñagun joun.
—ñurújuma ya, neíbuga ayúmuragua lun Búngiu yára.
37Ába lanǘgüni Pédro jáma bián lirájüñü Zebedéo lúmagua, ába jagúmeserun asándira íruni lúma tigári anígi. 38Ábati laríñagun joun.
—Sandítina ában íruni le lánina oúweni tídan nuwáni. Reídei jumá ya, agágudúañu jugúyame núma.
39Ábati lídin Jesúsu lubáruaguoún mémeraü, ába lájuduragun láu ligíbu múarugun, ába layúmuragun lun Búngiu ítara.
—Núguchi, ánjein gayára lubeí, adǘgabá lun masúfurirun náani cátei le lúnbei nasúfuriruni, mámalá quei nabúseerun, queílá babúseerun.
40Ábati lagíribudun le ñíjin jabeí láni disípulugu, ába ladáriruniña arúmuga, ába laríñagun lun Pédro.
—¿Siñátisán buga jeréderun agágudúañu núma ni ában óra? 41Agágudúañu jumá, ayúmuragua jugúyame, máburujan jumámuga lídoun ínchajoúni lun jeféridiruni jafíñen nuágu. Inárüni luágu ánja tan juwáni lun cátei le buídubei, ánjeinti júgubu, débiliti.
42Ábaya lídin luágu libíaman weíyaasu, ába layúmuragun ítara.
—Núguchi, ánjein siñá lubei masúfurirun náani le lúnbei nasúfuriruni, adügǘwalá bugúndan.
43Ábaya lagíribudun, ábaya ladáriruniña láni disípulugu arúmuga ladǘga weírijali lidábu jágu. 44Ába lígiruniña, ábaya lídin ayúmuragua luágu lǘrüwan weíyaasu, aríñageina méme dimúrei ligía. 45Ábati lídin le ñíjin jabeí láni disípulugu, ába laríñagun joun.
—¿Jarúmuguña mémesan, eméraagua jugúya? Chülǘjali óra lun nedéregeruníwa, áu le Wügǘri Garaǘwarügüti, jájaburugun gafígountiña. 46Sarájuma, queímoun lubároun le lúnbei lalúgurunina, níteeli.
Janǘgüni Jesúsu adáüra
(Mr 14.43-50; Lc 22.47-53; Jn 18.2-11)
47Ñígili Jesúsu adímureja, ligía liábin Júdas, le ábanbei jádaangiñe dúusu disípulugu, jáu sarágu gürígia táu efeín lúma wéwe. Jayábin lueígiñe joúbadina jábutigu fádirigu jáma wügǘriña weírigutiña lídan jafíñen juríu. 48Aríñagaaliti buga Júdas joun.
—Le nachúurun, ligía, járügüdeime.
49Ábati layárafadun lun Jesúsu, ába laríñagun.
—¡Buíti gúñoun, maésturu!
Ába lachúuruni. 50Ába laríñagun Jesúsu lun.
—Numáda, ¿ca bálugubei?
Ábati jayábin, ába járügüdüni Jesúsu, ába janǘgüni adáüra.
51Ábati laságarunun ában jádaangiñe láni Jesúsu disípulugu lefeínte, ába láchuguni ában larígei lumúsun fádiri le íñutimaabei. 52Ába laríñagun Jesúsu lun.
—Areídaboún befeínte, ladǘga sun ja áfarajatiña táu efeín, táuba gíñe efeín jáfarúa. 53¿Ibídiñeti bun luágu ánjana lan jamúga busén, gayára lan namúriajan ǘrüwa-wein-díisi-mílu jádaangiñe láni Núguchi ánjeligu, áni loúnajañanu lan jamúga? 54Lun jamúga nadǘgüni ítara, ¿ída lubági lagúnfulirun le tídaanbei Lerérun Búngiu to aríñaguboun luágu lúnti lan lasúseredun le ítara?
55Ábati laríñagun Jesúsu joun mútu jagía.
—¿Jiábin táu efeín lúma wéwe lun járügüdünina camá jamuga jíwerutina? Ságüñaja wéyu nañúurun témpulurugu jagánagua arúfudaja, madaǘ jumútina. 56Wel, lasúseredunbei sun le lun lagúnfulirun le jaríñagubei profétagu tídan Lerérun Búngiu.
Ábati jígiruni sun disípulugu Jesúsu lábugua, ába janúrajan.
Jesúsu ligíbugiñe líñun-ágei lúrudu
(Mr 14.53-65; Lc 22.54-55, 63-71; Jn 18.12-14, 19-24)
57Ja adáürübalin Jesúsu, ába janǘgüni ligíbugiñoun Gáifasi, fádiri le íñutimaabei, le ñí lubei adámurigu jamá arúfudajatiña lilúrudun Moisés jáma wügǘriña weírigutiña lídan jafíñen juríu. 58Ánjeinti Pédro, falá lumuti dísegiñe darí tübǘrürürugun lúban fádiri le íñutimaabei le ñíjin lubeí lebélura, ába leréderun ñun jáma oúnigirutiña témpulu lun laríjin jalíaba lan lébeda cátei le.
59Jáluajati jábutigu fádirigu, jáma sun jíbiri líñun-ágei lúrudu lidúnrun Jesúsu láu iyéeni lun gayáraabei lan jasíadiruni lun loúnwen, 60madáritiña, láu sun sarágu jáña lan gürígia ñǘdüntiña aríñaga iyéeni luágu. Agúmujoúni, ligía jayábin biáma yéetiña íchiga fe luágu, 61ába jaríñagun.
—Aríñagati wügǘri le luágu gayára lan lagǘnrichagunun láni Búngiu témpulu, ábaya lánme laráramagüdǘnun lídan ǘrüwa wéyu.
62Ábati laráramun fádiri le íñutimaabei, ába laríñagun lun Jesúsu.
—¿Moúnabuntíbusan ni cáta? ¿Cáteigi le, le aríñawagúbei buágu?
63Reídeiti Jesúsu maníñu. Ábati laríñagun fádiri le íñutimaabei lun.
—Luágu líri Búngiu le wínwanbei báfiñura lun baríñaguni inárüni. Aríñagabeí woun ánjein amǘrü lubeí Crístubei le Liraǘ Búngiu, le lanúadirubei Búngiu lun lasálbaruniña gürígia uboúagu.
64Ába laríñagun Jesúsu lun.
—Ánja, áu, quei baríñaguni. Aríñagatina gíñe jun luágu jaríjubadina lan, áu le Wügǘri Garaǘwarügüti, ñun lueígiñe loúnwenren Búngiu le Súnti Gabáfu, jaríjubei gíñe niábin lídan juánriñu siélugiñe.
65Ábati lajeíridagunun fádiri le íñutimaabei lanáangun, le ligáñi, ába laríñagun.
—¡Anába láali wügǘri le Búngiu láu lerérun! Mabúseerunjadiwa ámu lun líchugun fe luágu, agáamba jumáali anábuni le laríñagubei, 66¿ída líña jaríjin lun?
Ába jaríñagun.
—Gadúnrunti, lúnti loúnwen.
67Ábati jásueraguni ligíbu, buleísei jameí, jíbiri, ába jagáyuajan ligíbuagun, 68ába jaríñagun lun.
—Quei amǘrü lan Crístubei, ¡aríñaga beígia ca lan agáyuajabei buágu!
Jaríñagunbei lun ítara ladǘga gürágu líña lan lágu.
Laríñagun Pédro luágu ibídiñe lan Jesúsu lun
(Mr 14.66-72; Lc 22.56-62; Jn 18.15-18, 25-27)
69Súnti lasúseredun sun cátei le, ñun líña Pédro boúgudi tübǘrürürugu lúban fádiri le íñutimaabei, ába tiábin ában esériwijatu luágun, ába taríñagun lun.
—Bugúya, lúmañadibútia giñéñaja Jesúsu le Galiléana.
70Ába leyéedagun Pédro jagíbugiñe súngubei, ába laríñagun.
—Ibídiñeti nun ca lan uágu badímureja.
71Leíbuga yebe Pédro luágun béna, ligía taríjini ábanya, ába taríñagun joun ja ñíbaña.
—Eyéri le, lúmañajañein gíñe Jesúsu le Nazarétna.
72Ábaya leyéedagun Pédro láu fiñún, ába laríñagun.
—Ibídiñeti wügǘri ligía nun.
73Murúsun lueígiñe, ába jayábin ja ñíbaña lúmoun Pédro, ába jaríñagun lun.
—Inárüni luágu ában lan jádaangiñe amǘrü, arijúati luágu ligáburi badímurejan.
74Ába lagúmeserun íñaragua lúngua aríñaga láu fiñún.
—¡Ibídiñeti gürígia ligía nun!
Lídan méme óra ligía, ába layúgurujan ában gáyu. 75Ábati larítagun Pédro luágu le laríñagubei Jesúsu lun. “Beyéedaguba náu ǘrüwa weíyaasu lubáragiñe layúgurujan gáyu.” Ába láfuridun Pédro ñígiñe, ába layájuajan láu igárigu.
Currently Selected:
San Mateo 26: cab
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
