Tito 3
3
Ruma ri unimal rutzil uk'u'x ri Dios koju'an jusuk' chwach
1Chakuxtaj chike konoje ri kikojom rub'i' ri Qanimajawal Jesucristo, lik chirajawaxik e kakinimaj y kakitaqej ri kakib'i'ij ri e taqanelab' y ri e aj q'atal tzij re ri tinamit yey kakiya kib' che u'anik janipa taq ri utz. 2Chab'i'ij chike mech'a't chirij junoq, mech'o'jinik; kik'utu ri rutzil kik'u'x y ki'ana ch'uti'n che kib' chikiwach konoje taq ri tikawex.
3Ma e ri'oj rojertan echiri' k'amaja' ne kaqakoj rub'i' ri Cristo, na jinta qana'oj, oj titz'itaq, oj sachinaq, qaya'om qib' puq'ab' ronoje ri rayinik y ruqusil ruwachulew, lik k'o retzelal qak'u'x, lik tzel kojilik y tzel kaqil qib' chiqawach. 4Na ruk' ta k'u ri', ri Dios Qakolob'enel xuk'ut ri relej uk'u'x y ri rutzil uk'u'x chike konoje ri tikawex che ruwachulew. 5Xojukolob'ej k'u ri', na ruma ta juna chak lik utz qa'anom, ma e ruma ri k'axna'b'al uk'u'x chiqe. Xojuch'aj k'u che ri qamak cha' kuya jun k'ak' k'aslemal chiqe y xuya ri Santowilaj Ruxlab'ixel pa qanima' cha' kujalk'atij ri qab'inik qasilab'ik. 6Ruma ri Qakolob'enel Jesucristo, ri Dios xuya ri Ruxlab'ixel chiqe yey ¡lik nim ruto'b'al Rire quk'! 7U'anom k'u jusuk' chiqe ruma ri unimal rutzil uk'u'x cha' kaqak'ul na ri qoye'em, wa' e ri qak'aslemal na jinta utaqexik.
8Wa' wa kamb'i'ij pan chawe lik qatzij yey lik kuaj katok il che uk'utik wa' chike konoje ri kikojom rub'i' ri Dios cha' kakitijoj kib' che u'anik ri utz. Ma taq wa' wa k'utunik lik are' y lik k'o kutiqoj chike konoje ri tikawex che ruwachulew. 9Ma'an k'u awe'at kuk' taq ri kakichapala' kib' ruk' taq ch'a'tem na jinta uchak, ri kakichololej kib'i' ri kati'-kimam re ojertan y ri kech'o'jin puwi ri tzijpixab' ke ri aj judi'ab'. Ma ronoje taq wa' na jinta ke'elawi y na jinta kutiqoj. 10We k'o k'u junoq kujach kipa taq rutinamit ri Dios, chach'a'b'ej upa julajoq o kalajoq. No'j we lik na kukoj ta k'u tzij, mawachb'ilaj chik. 11Aweta'am e junoq kujach upa rutinamit ri Dios, yojtajinaq runa'oj y mak ri ku'ano. Yey ruma k'u rumak, utukel utzukum q'atb'al tzij chirij.
K'isb'al uch'a'tem ri Pablo che ri Tito
12Echiri' kantaq ri Artemas o ri Tíquico awuk',#3:12 Ri Pablo kutaq b'i jun chike wa keb' hermanos cha' kak'oji' puk'axel ri Tito che ri chak pa taq riglesias chila' Creta. chawilij katpetik cha' ko'lqariqa qib' wara Nicópolis, ma nuch'ob'om chik kink'oji' wara chupa ruq'ijol echiri' lik k'ax tew y k'o jab'.
13Kamb'i'ij chawe lik chato'o ri Zenas, ri aj k'utunel re ri tzijpixab' yey chato'o ri Apolos. Chaya'a k'u chike ronoje taq ri kajawax che ri kib'enam cha' kakimaj b'i kib'e. 14Lik chirajawaxik k'u chike konoje ri e quk'il ri'oj, ri kikojom rub'i' ri Cristo, kakimaj u'anik ri utz y kekito' k'u taq ri k'o kajawax chike cha' jela' k'o kutiqoj ri kib'inik kisilab'ik. 15Konoje taq ri e k'o wara wuk', kakiya pan rutzil awach. Y ri'at chaya'a rutzil kiwach ri kikojom rub'i' ri Dios, ri k'ax kojkina'o. Chik'ulu k'u iwonoje ri'ix ri unimal rutzil uk'u'x ri Dios. Amén.
Currently Selected:
Tito 3: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.