Tito 2
2
Ri saqil k'utunik
1No'j ri'at Tito, lik chirajawaxik e ronoje ri kak'utu xaqi junam ruk' ri saqil k'utunik re ri Dios. 2Cheb'apixab'aj rachijab' e nimaq winaq chik cha' kakich'ob' chi utz janipa ri kaki'ano, kakichajij chi utz ri kib'inik kisilab'ik chikiwach ri jujun chik, kakichajij kib' cha' na ketzaq ta pa mak, yey e saqil ri kub'ulib'al kik'u'x, ri rutzil kik'u'x y ri unimal kik'u'x.
3Yey chab'i'ij chike rixoqib' e nimaq winaq chik: K'ola xi'in ib' kuk' chwach ri Dios chwi ri kib'inik kisilab'ik, meb'u'an e aj molot, makiya kib' che q'ab'arik, e cheq'ilon chwi ri utz. 4Kik'utu k'u chike ri e k'ak'al ixoqib' cha' k'ax kekina' ri kachijil y ri kalk'o'al, 5kakichajij kib' cha' na ketzaq ta pa mak y jela' chom ri kib'inik kisilab'ik, kechakun chi utz pa ja, kakik'ut ri rutzil kik'u'x y kakitaqej ri kachijil. Kaki'an k'u ronoje wa' cha' jela' na jinta junoq tzel kach'a't chirij Rutzij Upixab' ri Dios.
6Chab'i'ij k'u chike ralab'o kakichajij kib' cha' na ketzaq ta pa mak. 7Yey ri'at Tito, e chak'utu ri utz chikiwach ruk' ri saqil ab'inik asilab'ik chwi ronoje ri ka'ano. Chatk'utun chi jusuk' ruk' saqil na'oj 8y ruk' utzilaj ch'a'tem cha' jela' we k'o junoq kach'a't chawij, utukel kuya uk'ix ma na jinta mak kariqitaj chawij.
9Yey cheb'apixab'aj raj chakib' cha' kakinimaj kitzij ri kajaw, kaki'an chi utz ronoje cha' ri kajaw keki'kot kuk' y na kek'ulila'n taj. 10Maki'an ne ki'ke che rub'itaq re ri kajaw; e ki'ana ronoje chi jusuk' cha' jela' kaq'alajinik lik chom ri k'utunik re ri Dios Qakolob'enel.
11Ma ri Dios uq'alajisam chi ri unimal rutzil uk'u'x cha' konoje ri tikawex kekolob'etajik. 12Ek'u ri' ri unimal rutzil uk'u'x ri Dios k'utuyum chiqe sa' u'anik kaqaya kan ronoje mak y ronoje ri rayib'al na utz ta uwach, yey e k'utuyum chiqe chirajawaxik kaqach'ob' chi utz ri kaqa'ano cha' waq'ij ora kojb'in jusuk' ruk' jun saqil b'inik silab'ik chwach ri Dios. 13Lik chirajawaxik kaqa'an wa' y kaqakub'a' pana qak'u'x che ri chomilaj q'ij re ki'kotemal echiri' kak'un tanchi ri Dios Qajawxel, ri Qakolob'enel Jesucristo. 14Rire xuya rib' pa kamik quma ri'oj, xojuloq'o cha' kojresaj che ronoje ri na utz taj, kuchomaj ri qab'inik qasilab'ik y jela' koju'an oj utinamit lik qaya'om qib' che u'anik chomilaj taq chak.
15E chak'utu' janipa taq wa ximb'i'ij chawe; chatpixab'an chi utz y chach'a'b'ej kipa taq ri kaki'an ri na utz taj. Cha'ana k'u wa' ma paq'ab' ri'at ya'tal wi ka'ano; maya k'u luwar che junoq kuk'aq b'i aq'ij.
Currently Selected:
Tito 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
