Filipenses 4
4
1Ek'u uwari'che hermanos, lik jikib'a' k'u'x alaq chirij ri Qanimajawal. Ri'in lik k'ax kanna' alaq y lik kuaj kanwil tanchi wach alaq, ma ralaq e alaq nuki'kotemal y alaq ri tojb'al re ri nuchak. Lik k'o alaq pa wanima'.
Chirajawaxik kaqayijb'a' chiqawach taq ri ch'a'oj k'o chiqaxo'l
2Lik k'u kantz'onoj ko chike ri hermana Evodia y ri hermana Síntique chu'ana xa jun kik'u'x chikiwach, jela' pacha' ri taqal chike ri e ralk'o'al ri Qaqaw. 3Ek'u ri'at, ri at saqil wachb'i'il chupa ruchak ri Qaqaw, kantz'onoj ko chawe: Lik cheb'ato'o wa' wi'xoqib' cha' kek'oji' chi utzil chomal chikiwach. Ma rike lik xkiya kib' pa k'ax junam wuk' ri'in che utzijoxik ri Utzilaj Tzij; lik xinkito'o, junam ruk' ri Clemente y ri jujun chik wachb'i'il, ri k'o chi ri kib'i' chupa ri libro pa tz'ib'ital wi china taq ri k'o kik'aslemal ruk' ri Dios.
K'isb'al pixab'anik puwi ri utzil chomal kuya ri Dios
4Hermanos, lik xaqi ki'kota alaq ruk' ri Qanimajawal. Kamb'i'ij julaj chik: ¡Lik ki'kota alaq! 5K'utu alaq ri relej k'u'x alaq chike konoje ri tikawex cha' jela' rike kakil wa' che ralaq. Ri Qanimajawal xa naqaj chi k'o lo wi. 6Lik mak'o mutoq' k'u'x alaq; ri 'ana alaq e lik ch'a'ta alaq ruk' ri Dios puwi ronoje. Tz'onoj k'u alaq che Rire janipa taq ri kajawax che alaq yey mik'ow chik'u'x alaq katioxij alaq che ri Dios ronoje ri uya'om che alaq. 7We ka'an k'u alaq taq wa', ri Dios kuya ri utzil uchomalil pa anima' alaq cha' na kapax ta k'u'x alaq y na kasach ta na'oj alaq ruma kub'ul k'u'x alaq ruk' ri Qanimajawal Jesucristo. Ek'u wa' wa utzil chomal na kakimaj ta usuk' ri tikawex.
8K'isb'al k'u re, kanya wa pixab'anik che alaq hermanos: Lik ya'a ib' alaq che uch'ob'ik puwi taq wa': ri lik qatzij, ri lik k'o uq'ij, ri lik jusuk', ri na jinta k'ana ch'ul che, ri lik k'o uchomalil, ri lik utz chikiwach konoje ri tikawex; janipa taq k'u ri utz y ri taqal che kayak uq'ij, puwi taq wa' k'ola wi ri na'oj alaq. 9Ek'u 'ana alaq janipa ri nuk'utum chiwach alaq, wa' e ri majom alaq, ri tom alaq y ri ilom alaq chwe. Jek'ula', ri Dios, ri aj ya'l utzil chomalil, kak'oji' uk' alaq.
Ri Pablo katioxin che riglesia k'o Filipos
10Lik kinki'kotik y kintioxin che ri Qaqaw ma xk'ut alaq jumul chik ri rutzil k'u'x alaq ruk' ri qasa'n xtaq lo alaq chwe. Weta'am xaqi in k'o chik'u'x alaq, pero k'a e tanchi wa' xriq alaq su'anik kinto' alaq. 11Kamb'i'ij k'u wa' na e ta ruma lik k'o kajawax chwe, na e ta ri'. Ma ri'in lik uk'amom chi rib' chwe kinki'kotik tob' sa' ri in k'o wi. 12Kinki'kotik tob' na jinta wuk' ri kajawax chwe o echiri' kik'ow ne uwi' taq ri k'o wuk'. Lik numajom ri kinki'kot chupa ronoje taq ri kinik'ow wi, tob' kuriq rib' sa' ri kantijo o kantij numik, tob' k'o ronoje ri kajawax chwe o tob' na jintaj. 13Kinel k'u pan chi utz che ronoje ri kinik'ow chupa, ma e ri Cristo kaya'w nuchuq'ab'. 14Na ruk' ta k'u ri', lik utz ri x'an alaq, ma ri to'b'al e alaq lik xuriq uchak chwe pa ri k'axk'ob'ik in k'o wi.
15Eta'am chi alaq, ri nab'e laj xinopon pa ri luwar re Macedonia cha' kantzijoj ri Utzilaj Tzij, na jinta juna chik iglesia xto'w we ruk' qasa'n, xew ralaq. Ma echiri' xinel b'i Macedonia, ralaq xya b'i alaq qasa'n chwe, to'b'al we che ri chak kan'ano. 16Y na xew ta wa'. Ma echiri' k'a in k'o Macedonia pa ri tinamit Tesalónica, na xa ta julaj xinto' alaq ruk' ri kajawax chwe. 17Na kamb'i'ij ta wa' cha' kaya alaq más qasa'n chwe, ma ri lik kuaj ri'in e lik kak'iyar uwach ri kak'ul alaq che ri Dios ruma taq ri utzilaj chak ka'an alaq chwach. 18Ma ri sipanik xtaq lo alaq chwe ruk' ri Epafrodito e pacha' jun qasa'n lik ki' ruxlab' chwach ri Dios, yey ri Dios lik kaki'kot che wa'. Ruk' k'u ri nuk'ulum che alaq, k'o chi ri kajawax chwe y kik'ow ne uwi'. 19Ek'u ri nu Dios e kaya'w na ronoje taq ri kajawax che alaq, ma sa'chi ri chomilaj b'eyomalil k'o ruk' Rire; yey kuya k'u wa' chiqe ri oj re ri Cristo Jesús. 20Qayaka k'u uq'ij ri Qaqaw Dios waq'ij ora y chiqawach apanoq na jinta chi utaqexik. Amén.
K'isb'al uch'a'tem ri Pablo che riglesia k'o Filipos
21Ya'a pan alaq rutzil kiwach konoje ri kikojom rub'i' ri Cristo Jesús e k'o chila' Filipos. Kakiya pan rutzil wach alaq ri hermanos e k'o wuk' 22junam kuk' konoje ri hermanos e k'o wara Roma. Yey ri hermanos kechakun pa ri palacio re ri nimalaj taqanel re Roma, rike lik kakiya pan rutzil wach alaq. 23K'ola k'u pa anima' onoje alaq ri unimal rutzil uk'u'x ri Qanimajawal Jesucristo. Amén.
Currently Selected:
Filipenses 4: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.