Colosenses 1
1
Ri Pablo kuya pan rutzil kiwach ri hermanos e k'o Colosas
1Ri'in in Pablo in taqo'n re ri Qanimajawal Jesucristo; e ri Dios intaqayom re ma e xraj ri' chwe. Junam ruk' ri hermano Timoteo, 2kaqataq b'i wa carta che alaq ri k'o alaq pa ri tinamit Colosas, ri k'o alaq puq'ab' ri Cristo y tikil alaq chi utz chupa rub'i'. K'ulu k'u alaq ri unimal rutzil k'u'xaj y ri utzil chomal re ri Qaqaw Dios y re ri Qanimajawal Jesucristo.
Ri Pablo ku'an orar pakiwi ri hermanos e k'o Colosas
3Echiri' kaqa'an orar pawi' alaq, xaqi kojtioxin k'u chwach ri Dios, Ruqaw ri Qanimajawal Jesucristo. 4Ma ri'oj qatom puwi ri kub'ulib'al k'u'x alaq ruk' ri Qanimajawal Jesucristo y puwi ri rutzil k'u'x alaq kuk' konoje ri kikojom rub'i'. 5Jek'ula' 'anom alaq ma ralaq e kub'am pan k'u'x alaq che uk'ulik ri uk'olom ri Dios che alaq chila' chikaj; yey wa' eta'am alaq ruma ri saqil Utzilaj Tzij tom chi alaq. 6Ek'u wa' wa Utzilaj Tzij xtzijox che alaq, e katajin utzijoxik che ronoje ruwachulew. Yey k'iyarinaq kiwach ri kekojow re y lik k'o kutiqoj che ri kib'inik kisilab'ik taq ri tikawex. Y jela' u'anom chixo'lib'al ralaq chwi lo echiri' xta alaq puwi ri unimal rutzil uk'u'x ri Dios y xk'ul alaq wa' paqatzij wi. 7Jela' rutzijoxik xu'an ri Epafras che alaq. Rire e jun qachb'i'il na loq' ta k'ax kana'w re yey e jun utzilaj aj chak re ri Cristo k'o chiwach alaq. 8Rire utzijom chiqe puwi ri rutzil k'u'x alaq, ri uya'om ri Ruxlab'ixel ri Dios pa anima' alaq.
9Ek'u uwari'che, chwi lo echiri' xqata wa', e la' na oj uxlaninaq ta che kaqa'an orar pawi' alaq cha' ri Dios kuq'alajisaj che alaq janipa ri karaj Rire ka'an alaq y cha' kamaj alaq usuk' ronoje taq ri saqil na'oj petinaq ruk' ri Ruxlab'ixel. 10Y jek'ula' kab'in alaq jusuk' pacha' ri taqal chike ri e ralk'o'al ri Dios y ka'an k'u alaq janipa ri karaj ri Dios cha' k'o kutiqoj ri utzilaj chak ka'an alaq y jela' kak'oji' más na'oj alaq che reta'maxik uwach ri Dios. 11Kaqatz'onoj k'u che ri Dios chuya'a chuq'ab' alaq e chirij runimal uchuq'ab' Rire cha' kach'ij alaq uchuq'ab' ri kik'owib'ej alaq ruk' unimal k'u'xaj y cha' ruk' unimal ki'kotemal 12katioxin k'u alaq chwach ri Qaqaw, ma e Rire x'anaw chiqe ri'oj utz kaqak'ul janipa rub'i'tisim chike rutinamit e k'o pa ri Q'ijsaq. 13Ri Dios xojresaj chupa ruchuq'ab' ri q'equ'malil y xojuq'atisaj chupa rutaqanik Ruk'ajol, ri lik k'ax kuna'o. 14Ruk' k'u ri' ri Cristo k'o qakolob'etajik y k'o kuyb'al qamak ruma rukik'el xturuwik.
Ruma ri Cristo kojk'oji' chi utzil chomal chwach ri Dios
15Tob' na jinta junoq iliyom uwach ri Dios, pero ri Cristo e kak'utub'en uwach. Yey ri Cristo xex chi k'o wi echiri' xwinaqir ronoje ri k'o che ruwachulew. 16Ruma k'u ri Cristo, ri Dios xu'an ronoje taq ri k'olik: taq ri e k'o chila' chikaj y ri e k'o che ruwachulew, taq ri kilitaj uwach y ri na kilitaj ta uwach; ri e taqanelab' y ri e aj q'atal tzij, tob' ne ri ángeles, ri k'o kiwach y ri k'o kichuq'ab'. Ronoje taq k'u ri' ri k'olik, x'an ruma ri Cristo yey e re yakb'al uq'ij Rire.
17Ri Cristo xex chi k'o wi chwa ronoje taq ri k'olik y Rire e chapayom re ronoje taq wa'. 18Ri Cristo e ujolom riglesia. E Rire ri nab'e che ronoje taq ri k'olik y ri nab'e xk'astaj lo chikixo'l ri ekaminaq, cha' e Rire ri lik k'o uwach chwa taq ronoje ri k'olik. 19Ma lik e xuk'ul uk'u'x ri' ri Dios ri kak'oji' ronoje ruk'u'xib'al Rire ruk' ri Cristo. 20Ruma k'u ri Cristo, ri Dios xu'ano cha' ronoje taq ri k'olik kak'oji' tanchi puq'ab' Rire, wa' e taq ri k'o che ruwachulew y taq ri k'o chila' chikaj, y jek'ula' konoje kek'oji' chi utzil chomal chwach Rire ruma rukik'el ri Cristo xturuw chwa ri cruz.
21Ek'u ralaq rojertan na alaq ta utinamit ri Dios y alaq ne aj retzelal k'u'x chirij ri Dios ruma na chom ta ri na'oj alaq y ruma taq ri na utz taj x'an alaq. No'j wo'ora ri Dios uya'om alaq chi utzil chomal chwach Rire. 22Xu'an k'u wa' ruma rukamik ri Cristo cha' jela' ku'ana alaq jusuk', na jinta k'ana mak alaq y na jinta katz'aqaw chi' alaq chwach Rire. 23Ruma wa' lik chirajawaxik wi kachuq'ub'ej ib' alaq y katiki' alaq chi utz chupa ri kub'ulib'al k'u'x alaq ruk' ri Dios. Yey moq'otaj k'u alaq roy'exik ri kub'am pan k'u'x alaq che, wa' e janipa ri b'i'tisim chupa ri Utzilaj Tzij tom chi alaq. Wa' wa Utzilaj Tzij e ri katajin utzijoxik pa taq ronoje luwar che ruwachulew. Yey ri'in Pablo, ya'tal chwe kantzijoj wa'.
Ruchak ri Pablo pa taq ri tinamit che ruwachulew
24Ek'u ri'in wo'ora lik kinki'kot che taq ri k'axk'ob'ik kantijo we ruk' wa' kanto' alaq. Jek'ula' e kantz'aqatisaj chwi ri nucuerpo janipa ri k'axk'olil ya'tal chwe ruma in re ri Cristo, yey wa kank'ulumaj e to'b'al che riglesia, rucuerpo Rire. 25Xinu'an jun aj chak re Rire cha' kanto' riglesia, ma e ri Dios uya'om chwe kantzijoj pa tz'aqat wi ri Utzilaj Tzij chiwach ralaq ri na alaq ta aj judi'ab'. 26Lik ojertan lo ri' na q'alajisam ta wa' chikiwach ri tikawex, no'j k'u wo'ora ri Dios e xuq'alajisaj wa' chike ri e re Rire. 27Chike k'u rike, ri Dios lik xraj kuq'alajisaj ri unimal chomalil uch'ob'om loq kuya chike taq ri tinamit na e ta aj judi'ab'; wa' e ri kajeqi' ri Cristo pa anima' ralaq, y ruma k'u ri' lik kub'am k'u'x alaq che uk'ulik ri chomilaj k'aslemal chila' chikaj.
28Ek'u ri'oj e kaqatzijoj rub'i' ri Cristo pa taq koj'ek wi. Keb'eqapixab'aj konoje ri tikawex y kojk'utun chikiwach ruk' saqil na'oj, cha' keb'eqaya ri e re ri Cristo chwach ri Dios ruk' jun jusuk' kib'inik kisilab'ik. 29Lik k'u kantij uq'ij che u'anik wa' ruk' ronoje nuk'u'x, yey ronoje ri kan'ano e ruma runimal uchuq'ab' ri Cristo k'o wuk'.
Currently Selected:
Colosenses 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
