Colosenses 2
2
1Kuaj k'ut keta'maj alaq, e ri'in lik kanya wib' che to'ik alaq, junam kuk' ri e k'o Laodicea y ri jujun chik k'amaja' kaketa'maj nuwach ri'in, 2cha' kanimarisax kik'u'x konoje ri kikojom rub'i' ri Cristo, ku'ana xa jun ri rutzil kik'u'x chikiwach y ke'kimaja usuk' chi utz ronoje ri saqil na'oj q'alajisam chi lo ruma ri Qaqaw Dios y ruma ri Cristo. 3Ma ruk' ri Cristo k'o wi ronoje ruk'u'xib'al ri na'oj y ri kajawax umajik.
4Kamb'i'ij k'u wa' che alaq cha' na jinta junoq kach'akach'o'n e alaq ruk' ch'a'tem lik chakojo' katatajik yey na qatzij taj. 5Ma tob' ri'in na in jinta uk' alaq chiwachil, pero pa wanima' e kanna' ri'in pacha' in k'o uk' alaq. Lik kinki'kotik ma kanwilo junam kachakun alaq yey lik tikil alaq chi utz che ri kub'ulib'al k'u'x alaq ruk' ri Cristo.
6Ralaq xkoj alaq rub'i' ri Qanimajawal Jesucristo y xya ib' alaq puq'ab'; ek'u uwari'che b'ina alaq jela' pacha' ri taqal che junoq ukojom rub'i' Rire. 7Tikib'a' k'u ib' alaq chi utz ruk' ri Cristo y jikib'a' ri kub'ulib'al k'u'x alaq ruk' Rire cha' jela' k'o k'iyib'al alaq chwach Rire; e 'ana alaq jela' pacha' ri xk'ut che alaq yey xaqi tioxin alaq chwach ri Dios.
Ri k'ak' b'inik taqal chike ri e re ri Cristo
8Lik chajij k'u ib' alaq cha' na kasokotaj ta alaq ruk' taq na'oj na jinta uchak, ri xa no'jib'al ke ri tikawex re ruwachulew y na e ta k'u chirij runa'oj ri Cristo. 9Ma ronoje ruk'u'xib'al ri Dios k'o ruk' ri Cristo, y wa' lik xq'alajin che rub'inik usilab'ik echiri' xu'an tikawex che ruwachulew. 10Ruma k'u wa', ya'tal che alaq ronoje ri kajawax che ri b'inik silab'ik alaq ma k'o alaq puq'ab' ri Cristo, ri kataqan pakiwi konoje ri k'o kiwach y ri k'o kichuq'ab'. 11Ruma k'u k'o alaq puq'ab' ri Cristo, k'o chi ri retalil re circuncisión che ri anima' alaq, tob' wa' wa circuncisión na e ta ri kakoj xa ruma juna achi; ma ri ke'elawi e ri Cristo xresaj alaq puq'ab' taq ri rayib'al re ri ti'jil alaq. 12Ek'uchiri' xk'ul alaq ri bautismo, e pacha' xmuq alaq junam ruk' ri Qanimajawal Jesucristo yey xk'astaj lo alaq junam ruk' Rire; ma xkoj alaq ri Dios ruk' ruchuq'ab' xuk'astajisaj lo ri Cristo chikixo'l ri ekaminaq. 13Ma ralaq rojertan kaminaq alaq pa mak yey na kojotal tane ri retalil re circuncisión che alaq.#2:13 Ri e k'o Colosas na kojotal ta ri retalil re circuncisión chike ruma na e ta aj judi'ab'. No'j k'u wo'ora ri Dios xuya k'ak' k'aslemal alaq junam ruk' ri Cristo y xukuy ronoje ri mak alaq; 14xresaj k'u ri q'atb'al tzij uq'atom chi paqawi' ruma ri qamak#2:14 Pa ri ch'a'tem griego kub'i'ij: “Ri Dios xusach uwach ri wuj pa tz'ib'ital wi sa' taq ri qamak”. y xusach uwach wa' ruma rukamik ri Cristo chwa ri cruz. 15Ruma k'u rukamik ri Cristo, ri Dios xuch'ij kichuq'ab' taq ri itzel uxlab'ixel lik k'o kiwach y k'o kichuq'ab', xuk'aq b'i kiq'ij y xuq'alajisaj k'ut Rire e más k'o uchuq'ab' chikiwa rike.
Qatzukuj taq ri k'o chila' chikaj
16E uwari'che mak'o mach'a'tib'en e alaq xa ruma ri katij alaq o ri kaqum alaq, o ruma ri ka'an alaq chupa taq nimaq'ij, chupa ri jeqeb'al re taq ri ik' o taq ri q'ij re uxlanib'al. 17Ma ronoje ne wa' xa e ilib'al pan re ri katajin loq; no'j ri Jun kuk'utub'ej uwach pa saqil wi, e ri Cristo.#2:17 Ri Tzij Pixab' xuya ri Dios chike rutinamit echiri' k'amaja' kalax ri Cristo, e kuk'utub'ej pan ruk'unik Rire. 18Chajij ib' alaq ma k'axtaj ruma junoq na kak'ul ta alaq ri karaj kuya ri Dios che alaq chila' chikaj. Ma'an k'u e alaq kuk' ri kakiloq'nimaj kiq'ij taq ri ángeles. Ma ri keb'anaw wa' e lik ke'ek kina'oj puwi ri na kakimaj ta usuk'. Lik chakojo' ki'anom ch'uti'n che kib', pero kaki'an k'u nim che kib' ruma no'jib'al xa e rike eno'jiyom re. 19Rike na kakaj ta k'u kakitaqej ri Cristo. Rire e ujolom riglesia y riglesia e ucuerpo. Ri Cristo e 'anayom xa jun chike konoje ri e k'o puq'ab' jela' pacha' taq ri ub'aqil juna cuerpo uchapom rib' ruk' taq rigonsiyil y rib'och'il. Yey e ri Cristo ri kuya che ru iglesia ronoje ri kajawax che cha' utz kak'iy ruk' ri k'iyib'al kuya ri Dios.
20Ma we ralaq xkam alaq ruk' ri Cristo,#Col. 2:12; Ro. 6:6-11; Gl. 2:19 wa' ke'elawi na jinta chi alaq chuxe' ri taqanik xa no'jital che ruwachulew. Kantz'onoj k'u che alaq: ¿Cha'taj k'a kab'in alaq pacha' keb'in ri e re ruwachulew y kaya k'u ib' alaq puq'ab' ri taqanik jewa' kub'i'ij: 21«Machapab'ej ne wa', matij nenare' y machap ne k'enoq»? 22Ronoje wa' wa taqanik xa kino'jib'al achijab' y e puwi taq ri na kakowin taj, ri xa kak'isik. 23Wa' wa k'utunik lik chakojo' e saqil na'oj. Yey ri kakitaqej taq wa k'utunik e pacha' lik kakiloq'nimaj uq'ij ri Dios ruk' wa', pero ri kaki'ano xa kuk' rike kano'jitaj wi. Kaki'an pacha' ch'uti'n che kib' ma kakiya pa k'axk'ob'ik ri kicuerpos; pero ronoje taq wa' na jinta kutiqoj re kuq'atej taq ri rayib'al re ri kiti'jil ri tikawex.
Currently Selected:
Colosenses 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
