Popular Bible Verses from Colosenses 2

Share

Ralaq xkoj alaq rub'i' ri Qanimajawal Jesucristo y xya ib' alaq puq'ab'; ek'u uwari'che b'ina alaq jela' pacha' ri taqal che junoq ukojom rub'i' Rire. Tikib'a' k'u ib' alaq chi utz ruk' ri Cristo y jikib'a' ri kub'ulib'al k'u'x alaq ruk' Rire cha' jela' k'o k'iyib'al alaq chwach Rire; e 'ana alaq jela' pacha' ri xk'ut che alaq yey xaqi tioxin alaq chwach ri Dios.

Lik chajij k'u ib' alaq cha' na kasokotaj ta alaq ruk' taq na'oj na jinta uchak, ri xa no'jib'al ke ri tikawex re ruwachulew y na e ta k'u chirij runa'oj ri Cristo.

Ma ralaq rojertan kaminaq alaq pa mak yey na kojotal tane ri retalil re circuncisión che alaq. No'j k'u wo'ora ri Dios xuya k'ak' k'aslemal alaq junam ruk' ri Cristo y xukuy ronoje ri mak alaq; xresaj k'u ri q'atb'al tzij uq'atom chi paqawi' ruma ri qamak y xusach uwach wa' ruma rukamik ri Cristo chwa ri cruz.

Ma ronoje ruk'u'xib'al ri Dios k'o ruk' ri Cristo, y wa' lik xq'alajin che rub'inik usilab'ik echiri' xu'an tikawex che ruwachulew. Ruma k'u wa', ya'tal che alaq ronoje ri kajawax che ri b'inik silab'ik alaq ma k'o alaq puq'ab' ri Cristo, ri kataqan pakiwi konoje ri k'o kiwach y ri k'o kichuq'ab'.

E uwari'che mak'o mach'a'tib'en e alaq xa ruma ri katij alaq o ri kaqum alaq, o ruma ri ka'an alaq chupa taq nimaq'ij, chupa ri jeqeb'al re taq ri ik' o taq ri q'ij re uxlanib'al. Ma ronoje ne wa' xa e ilib'al pan re ri katajin loq; no'j ri Jun kuk'utub'ej uwach pa saqil wi, e ri Cristo.