Filipenses 3
3
Ri lik chirajawaxik wi e kakub'i' qak'u'x ruk' ri Cristo
1Ek'u wo'ora hermanos, chwi ronoje taq ri kak'ulumaj alaq, lik ki'kota alaq ruk' ri Qanimajawal. Ri'in na kinkos ta che ub'i'xikil tanchik janipa ri nutz'ib'am chi pan che alaq, ma wa' lik chirajawaxik che alaq.
2Kamb'i'ij k'u ri': Lik chajij ib' alaq chikiwach ri winaq itzel kik'u'x, ri lik na e ta saqil aj chakib', ri xa pa ke rike kakib'i'ij chirajawaxik chike konoje rachijab' kaq'at ri kulewal cha' kakoj ri retalil re circuncisión chike.#3:2 “Circuncisión”: Ri kaki'an raj judi'ab' echiri' juna ralko ala kuk'is wajxaqib' q'ij ralaxik, e kaq'at rutz'u'malil ruwi ri rulewal, k'utub'al re e jun chike rutinamit ri Dios. Yey jujun chike raj judi'ab' kikojom rub'i' ri Cristo kakib'i'ij chirajawaxik kakoj wa retalil re circuncisión chike ri creyentes na e ta aj Israel, tob' e nima'q chik. Pero ri Pablo kub'i'ij na chirajawaxik ta wa'. Ma chikiwach rike, xew ri kikojom wa' taqal chike e utinamit ri Dios. 3Pero paqatzij wi rutinamit ri Dios e ri'oj,#3:3 “Rutinamit ri Dios e ri'oj”: Pa ri ch'a'tem griego kub'i'ij “ri'oj oj re ri circuncisión”. ma ri'oj kaqaloq'nimaj uq'ij ri Dios pa saqil wi ruma ri Ruxlab'ixel Rire. Ri qaki'kotemal e ruma ri u'anom ri Qanimajawal Jesucristo quk' yey kub'ul qak'u'x ruk' Rire, na ruk' ta ri qa'anom ri'oj y na ruk' ta ri retalil kakoj che ri qacuerpo.
4We ta e la' kuaj kanyak nuq'ij ruma taq wa', taqal ri' chwe, ma na jinta junoq chike ri e aj judi'ab' u'anom más chinuwa ri'in. 5Ma xkoj ri retalil re circuncisión chwe echiri' xink'is wajxaqib' q'ij walaxik. Yey in kuk'il ri e aj Israel ma nupeteb'em lo chike ri e ralk'o'al kan ri Benjamín, ruk'ajol ri Israel. Ri'in, in jela' pacha' ri nuchu-nuqaw, lik in aj hebreo chiwalaxik.#3:5 Ri Pablo e kuk'il ri e aj judi'ab' kakiriq ri ch'a'tem hebreo y xk'iy kuk' ri lik kitaqem ri kojob'al ke kan ri kati'-kimam. No'j e k'o jujun chik e aj judi'ab' na kakiriq ta ri ch'a'tem hebreo, ma ri kich'a'tem e ri griego, yey kitaqem jujun che taq ri kojob'al ke raj griego. Yey ruma in jun chike ri fariseos, lik xinok il che taq ri taqanik ke raj judi'ab'. 6Ruma k'u xinya nuk'u'x che wa', lik xinwesaj q'ij che usachik kiwach ri kikojom rub'i' ri Cristo. Lik xintaqej ri taqanik ke raj judi'ab' y chwa k'u ri' wa', na jinta junoq katz'aqaw nuchi'.
7Echiri' k'amaja' kankoj rub'i' ri Cristo, xinch'ob'o e ronoje taq wa' e re yakb'al nuq'ij chwach ri Dios; no'j wo'ora kanmaj usuk' na e ta u'anom ri', ma na ruma ta wa' xinweta'maj uwach ri Cristo. 8Y na xew tane la', ma chinuwach ri'in, ronoje ri kan'ano o ronoje ri k'o wuk', na jinta k'ana uwach chwa ri reta'maxik uwach ri Cristo Jesús, ri Wajawal, ma Rire na jinta k'ana kajunimax wi. Ruma k'u ri Jesús, xinya kan ranima' ronoje; e taq ri k'o wuk' xa e chi pacha' raq'es chinuwach ri'in, ma e lik nuya'om wib' che reta'maxik uwach ri Cristo 9y jek'ula' in u'anom xa jun ruk' Rire. Y na e ta k'u kan'an jusuk' che wib' ruma ri lik nutaqem ri taqanik re ri Moisés; ma xew ri Dios ka'anaw jusuk' chwe, yey wa' e ruma ri kub'ulib'al nuk'u'x ruk' ri Cristo. 10Ek'u ri lik kuaj ri'in e kanweta'maj más uwach ri Cristo. Yey kuaj kak'oji' ruchuq'ab' Rire wuk', jela' pacha' ri xuk'utu echiri' xuch'ij uchuq'ab' ri kamik y xk'astaj lo chikixo'l ri ekaminaq. Yey na jinta k'o kub'i'ij nuk'u'x che tob' ne kantij k'ax y kinkamisaxik jela' pacha' x'an che Rire echiri' xuya rib' pa kamik. 11Ronoje k'u ri kan'ano e ruma lik kacha nuk'u'x che kaya'taj chwe ri k'aslemal na jinta utaqexik echiri' ri Dios kinuk'astajisaj lo chikixo'l ri ekaminaq.
Qaya'a qib' che u'anik janipa ri karaj ri Dios chiqe
12Na e ta k'u kamb'i'ij ri' nuriqom chi ronoje wa' y na jinta chi k'ana kajawax che ri nub'inik nusilab'ik chwach ri Dios. Na e ta ri'. Ma e pacha' k'a kintajin pan chi b'e yey e lik kantij uq'ij kinopon che ronoje ri xraj ri Qanimajawal Jesucristo chwe echiri' xinusik'ij. 13Hermanos, ri'in na kamb'i'ij taj we nuch'ijom chi u'anik ronoje ri karaj ri Dios chwe. Ek'u ri kan'ano e kanya ronoje nuchuq'ab' cha' e kinel pan ruk' ri k'a k'o chinuwach y na e ta chi kanch'ob' raqan puwi ri ik'owinaq chik. 14Jek'uri'la' lik jusuk' kin'ek k'a pa ku'k'isa wi ri nub'e q'atital chinuwach, cha' jela' kank'ul ri chomilaj sipanik, ri ub'i'tisim ri Dios chiqe ri ojusik'im cha' koje'k'ola ruk' chila' chikaj ruma oj re ri Jesucristo.
15Qonoje k'u ri lik oj tikil chi utz chupa ri Q'ijsaq, e lik ub'e ri' we jela' ri qana'oj. Yey we k'o junoq chixo'lib'al alaq junwi ri kuch'ob'o, e ri Dios kaq'alajisan che we utz o na utz ta ri kuch'ob'o. 16Pero ri lik chirajawaxik chiqe e kaqa'an ronoje ri uk'utum chi ri Dios chiqawach.
17Hermanos, 'ana che ri b'inik alaq pacha' ri nub'inik ri'in. Yey e chetaqej alaq ri kaki'an jela' pacha' ri qak'utum ri'oj. 18Ma e k'i ri na kaki'an ta wa'. Uk'iyal laj in ch'a'tinaq chi uk' alaq pakiwi rike, y ruk' oq'ej kamb'i'ij tanchik: Lik q'alaj ruma ri kib'inik kisilab'ik, rike e aj retzelal k'u'x chirij ri Utzilaj Tzij puwi rukamik ri Cristo chwa ri cruz. 19Kopon na k'u ri q'ij echiri' kasach na kiwach, ma ri kidios rike e taq ri rayib'al re ri kiti'jil.#3:19 “Ri rayib'al re ri kiti'jil”: Pa ri ch'a'tem griego kub'i'ij “ri kidios rike e ri kipa”. Kaki'an ne nim che kib' ruma taq ri kaki'ano tob' wa' lik k'ixb'al uwach, yey lik kakiya kina'oj che taq ri xa re ruwachulew. 20No'j k'u ri qatinamit ri'oj e ri k'o chila' chikaj, pa qoye'em wi kape ri Qakolob'enel, ri Qanimajawal Jesucristo. 21Y echiri' kak'un Rire, kujalk'atij na qawach ri'oj. Jek'uri'la' ri qacuerpo, tob' na jinta uq'ij wo'ora, ku'ana jela' pacha' runimal uchomalil rucuerpo Rire echiri' xk'astaj lo chikixo'l ri ekaminaq. Jela' ku'ana Rire ruk' ri chuq'ab' ya'tal che cha' kuch'ij uchuq'ab' ronoje taq ri k'olik.
Currently Selected:
Filipenses 3: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.