Marcos 15

Katz'aq uchi' ri Jesús chwach ri taqanel Pilato

(Mt. 27:11-14; Jn. 18:33-40)

1Echiri' xsaqirik, ri nimaq e aj chakunel pa Rocho Dios kuk' taq ri nimaq winaq re ri tinamit, raj k'utunel re ri tzijpixab' y konoje ri uchapom wi rib' ri q'atb'al tzij, ki'anom chi tzij chikiwach puwi sa' ri kaki'an ruk' ri Jesús. Xkik'am k'u b'i ri Jesús yututalik y xe'kiya'a chwach ri taqanel Pilato. 2Ri Pilato xutz'onoj k'u che ri Jesús:

—¿Lal kami ri' ri rey ke raj judi'ab'? —xcha che.

Ri Jesús xuk'ul uwach:

—Lal kab'i'n la re —xcha che.

3Yey ri nimaq e aj chakunel pa Rocho Dios lik kakitz'aq uchi'.

4Xutz'onoj tanchi k'u ri taqanel Pilato che:

—¿E kami la' na kak'ul ta la uwach? ¿Na kata ta kami la janipa chi mak kakikoj chi'ij la? —xcha che.

5Na ruk' ta k'u ri', ri Jesús na xuk'ul ta uwach. Ruma k'u wa', ri Pilato lik xkam ranima' che.

Kaq'at tzij re kamik puwi ri Jesús

(Mt. 27:15-31; Lc. 23:13-25; Jn. 19:1-16)

6Chupa k'u ri nimaq'ij Pascua, ri taqanel romano xex ku'an wi kuyolopij b'i jun chike ri e k'o pa cárcel, yey e ri winaq kecha'wik china ri kakaj kayolopix b'i. 7K'o k'u jun achi Barrabás rub'i', rire k'o pa cárcel kuk' jujun rachb'i'il ruma xki'an kamik echiri' xeyaktaj chirij ri taqanel aj Roma. 8Xeb'opon k'u uk'iyal winaq chwach ri taqanel Pilato y xkijeq utz'onoxik che e ku'an pacha' taq ri u'anom lo ronoje junab'.

9Ewi ri taqanel Pilato xutz'onoj chike:

—¿Ka'aj alaq kanyolopij b'i ri rey ke raj judi'ab'? —xcha'. 10Xub'i'ij wa' ma reta'am ri nimaq e aj chakunel pa Rocho Dios xe'kiya'a ri Jesús chwach, xa ruma k'ax kik'u'x chirij.

11Ek'u ri nimaq e aj chakunel pa Rocho Dios xkikoj pa kijolom ri uk'iyal winaq e kakitz'onoj kayolopix b'i ri Barrabás. Yey rike jela' xki'ano.

12Ri Pilato xutz'onoj tanchi chike:

—¿Sa' k'u ri' ka'aj alaq kan'an ruk' ri kab'i'ij alaq e rey ke raj judi'ab'? —xcha'.

13Yey ri winaq lik xesik'in tanchi che uk'ulik uwach:

—¡Kamisax chwa cruz! —xecha'.

14Ek'u ri taqanel Pilato xutz'onoj chike:

—¿Sa' k'u rumak u'anom? —xcha'.

No'j ri winaq más ko xesik'inik:

—¡Kamisax chwa cruz! —xecha'.

15Ewi ri Pilato xa ruma xraj kakanaj kan chi utz kuk' ruk'iyal winaq, e xuyolopij b'i ri Barrabás. Yey xeb'utaq ri soldados che ujich'ik upa ri Jesús. Tek'uchiri', xuya b'i pakiq'ab' re kakikamisaj chwa cruz.

16Ri soldados xkik'am k'u b'i ri Jesús che ruwa ja re rupalacio ri taqanel. Chiri' xmoli' kichi' konoje taq ri soldados. 17Ek'u ri soldados xkikoj jun k'ul morato#15:17 “Morato”: Kil “púrpura” pa vocabulario. che ri Jesús. Che k'u rujolom xkikoj jun corona pach'um ruk' k'iix. 18Xkijeq k'u kesik'in che, jewa' kakib'i'ij:

—¡Nim uq'ij ri rey ke raj judi'ab'! —kecha'.

19Kakich'ay rujolom ruk' jukutaj tani y kakichub'aj rupalaj. Kakixukub'a' k'u kib' chwach, lik xa u'anikil kakiyak uq'ij. 20Echiri' ya lik xkich'amij, xkesaj ri k'ul morato kikojom che y xkikoj tanchi ruq'u'. Xkesaj k'u b'i cha' ke'kikamisaj chwa cruz.

Rukamik ri Jesús chwa ri cruz

(Mt. 27:32-56; Lc. 23:26-49; Jn. 19:17-30)

21K'o k'u jun achi aj Cirene petinaq pa juyub' e ri' kik'ow chiri'. Ek'u ri soldados xkitaq che kutelej b'i ri cruz re ri Jesús. Rachi, Simón rub'i', rire e kiqaw ri Alejandro y Rufo.

22Y xkik'am b'i ri Jesús pa jun luwar Gólgota kab'i'x che, wa' ke'elawi “luwar re ub'aqil ujolom anima'”. 23Yey xkiya' che ri Jesús vino kojotal mirra ruk'; no'j Rire na xutij taj.

24Echiri' kiya'om chi ri Jesús chwa ri cruz, ri soldados ruk' jun sorteo xkijach kib' puwi ruq'u' cha' kakilo sa' taq ri kakik'am b'i chikijujunal.

25Anim che ri ub'elej ora,#15:25 “Ri ub'elej ora”: Kil “hora” pa vocabulario. xkiya ri Jesús chwa ri cruz. 26Chwi k'u lo rucruz ri Jesús tz'ib'italik su'b'e xq'at tzij puwi', jewa' kub'i'ij: «ri rey ke raj judi'ab'.»

27Xekiya k'u ka'ib' eleq'omab' chwa cruz, jun puwikiq'ab' y jun pumox ri Jesús.

28Ek'u xu'ana ri' ri tz'ib'ital kan chupa Rutzij Upixab' ri Dios:

E jun Rire xajilax b'i kuk' ri winaq itzel kik'u'x. Is. 53:12

29Ri winaq keb'ik'ow chiri' kakiyoq' kanoq, kakiyiriya' ri kijolom che y jek'uwa' kakib'i'ij che:

—¡Ah! At pe' ri ab'i'im kawulij ri Rocho Dios y xa pa oxib' q'ij kayak tanchik. 30Chakolob'ej k'u awib' ri' y chatqaj lo chwa ri cruz —kecha'.

31Jenela' ri' xki'an ri nimaq e aj chakunel pa Rocho Dios junam kuk' raj k'utunel re ri tzijpixab'; rike lik kakich'amij, jewa' kakib'i'ij chikiwach:

—Lik wa' k'ut e k'i ri xeb'ukolob'ej che taq yab'il y che kamik, yey na kuriq ta wa' ukolob'exik rib' rire. 32La' la'chi kab'i'x “Cristo, Rey ke Raj Israel” che, qaja lo ri' utukel chwa ri cruz cha' kaqilo y jela' kaqakojo e rire ri Ucha'o'n lo ri Dios —kecha'.

Y jenela' ri ka'ib' eya'om chwa cruz junam ruk', lik xkich'amij Rire.

33Ek'uchiri' xtik'oj ri q'ij, xok q'equ'm che ruwachulew y wa' xu'k'isa k'a che ri urox ora b'enaq q'ij. 34Chupa k'u la' la ora, ri Jesús lik ko xsik'inik, jewa' xub'i'ij pa ri ch'a'tem kach'a't wi Rire:

—Eloi, Eloi, ¿lama sabactani? —xcha'. Wa' ke'elawi: “Lal nu Dios, Lal nu Dios, ¿su'b'e xinoq'otaj kan la?”#Sal. 22:1

35Jujun k'u chike ri e k'o chiri', echiri' xkita wa', xkib'i'ij:

—Chitape', wa'chi e kusik'ij ri q'alajisanel Elías —xecha'.

36K'o k'u jun xe'ek lik kanik, xumu' jun esponja pa vinagre, xuxim k'u chutza'm jun tani y xuya pan che ri Jesús re kutz'ub'u, y jek'uwa' xub'i'ij:

—Qila pe' we kak'un ri Elías re kolu'qasaj lo chwa ri cruz —xcha'.

37No'j ri Jesús lik ko xsik'inik y jela' xkamik. 38Ek'uchiri', ri telón k'o chupa ri Rocho Dios#15:38 “Telón”: E jun k'ul kujach upa ri Luwar Santo ruk' ri Luwar lik Santo. Éx. 26:31-33; Heb. 6:19; 9:3-12 xrich'rob' chunik'ajal; xujeq lo puwi' y xo'lk'is k'a chuxe'.

39Ek'u ri capitán#15:39 “Capitán”: Wa' e aj wach ke cien soldados. tak'al chwach ri Jesús, echiri' xuto xsik'inik yey xrilo sa' rukamik, jewa' xub'i'ij:

—¡Paqatzij wi, wa' wa'chi e Uk'ajol ri Dios! —xcha'.

40E k'o k'u jujun ixoqib' kakitzutza' pana chinimanaj. Chikixo'l wa' e k'o ri María ri aj Magdala, ri Salomé y ri María kichu ri Jacobo (ri más k'ak'al) y ri José. 41Wa' wa ixoqib' lik xeterej chirij ri Jesús y lik kinimam loq echiri' Rire k'o Galilea. Rike kuk' jujun chik uk'iyal ixoqib', xepaqi' lo ruk' pa ri tinamit Jerusalem.

Ri Jesús kamuqik

(Mt. 27:57-61; Lc. 23:50-56; Jn. 19:38-42)

42B'enaq q'ij, echiri' raj judi'ab' kakiyijb'a' pan janipa ri kajawax chike pa ri q'ij re uxlanib'al, 43ri José aj Arimatea xok chwach ri taqanel Pilato y na xuxi'ij ta k'ana rib' xutz'onoj rucuerpo ri Jesús#15:43 Chupa taq rutaqanik ri Dios kub'i'ij we k'o junoq kakamisax chwa che', chirajawaxik kamuqik echiri' k'amaja' kok raq'ab'. Ruma k'u wa', ri José xraj kumuq kan rucuerpo ri Jesús echiri' k'amaja' kajeqer ri q'ij re uxlanib'al yey wa' kajeqer pa rokib'al aq'ab'. Dt. 21:22-23 cha' kuk'am b'i. (Ri José lik k'o uwach chike ri uchapom wi rib' ri q'atb'al tzij yey lik roye'em ruk'unib'al rutaqanik ri Dios.)

44Ri Pilato lik xkam ranima' che echiri' xuto kaminaq chi ri Jesús. Ewi xusik'ij ri capitán cha' kutz'onoj che we qatzij. 45Echiri' xuta chi uchi' ri capitán kaminaq chi ri Jesús, xuya luwar che ri José kuk'am b'i rucuerpo.

46Ek'u ri José xuloq' jun manta, xuqasaj lo rucuerpo ri Jesús chwa ri cruz y xupis b'i chupa ri manta. Xu'ya'a k'u ri' chupa jun muqub'al k'otom pa'b'aj y xutaq uketeb'axik kan jun nimalaj ab'aj chuchi' re tz'apib'al re. 47Yey ri María ri aj Magdala y ri María ruchu ri José, xkilo pa xmuq kan wi.

Currently Selected:

Marcos 15: acrN

Highlight

Copy