Mateo 26

Ri e aj wach re ri tinamit kakich'a'tib'ej su'anik kakichap ri Jesús

(Mr. 14:1-2; Lc. 22:1-2; Jn. 11:45-53)

1Echiri' ri Jesús xuk'is ub'i'xikil ronoje wa', jewa' xub'i'ij chike rutijo'n: 2«Ri'ix iweta'am pa keb' q'ij kak'un lo ri nimaq'ij Pascua; chupa k'u ri' wa nimaq'ij, Ralaxel Chikixo'l Tikawex kaya' pa kamik chwa cruz» xcha'.

3Ek'u ri nimaq e aj chakunel pa Rocho Dios kuk' raj k'utunel re ri tzijpixab' y ri nimaq winaq e aj wach re ri tinamit, xkimol kib' che ruwa ja re ri palacio re ri Caifás, ri kajawal raj chakunel pa Rocho Dios. 4Chiri' xkich'a'tib'ej chikiwach su'anik kakichap ri Jesús ruk' sokoso'nik re kakikamisaj. 5Xkib'i'ij k'u chikiwach: «Na kaqa'an ta pa ri nimaq'ij cha' ri tinamit na ketukuk ta ruma wa'» xecha'.

Jun ixoq kuq'ej kunab'al ki' ruxlab' chu'jolom ri Jesús

(Mr. 14:3-9; Jn. 12:1-8)

6Ri Jesús k'o pa ri tinamit Betania chirocho ri Simón, ri jun xk'oji' ri yab'il lepra che. 7Xk'un k'u jun ixoq ruk'a'am jun k'olib'al nojinaq che kunab'al lik ki' ruxlab' y lik k'i rajil. Xqib' k'u ruk' ri Jesús y xuq'ej ri kunab'al chu'jolom echiri' Rire tz'ul chwa ri mexa.

8Echiri' xkil wa' rutijo'n, lik xpe koyowal che y jewa' xkib'i'ij chikiwach:

—¿Su'chak wa kunab'al xtz'ilo'xik? 9Ma ri lik usuk' e ta xk'ayix wa' chi uk'iyal puaq, y ruk' k'u ri' keto' ri nib'a'ib' —xecha'.

10Ek'u ri Jesús reta'am sa' ri kakib'i'ij chikiwach; ruma k'u ri', jewa' xub'i'ij chike:

—¿Su'chak kixch'a't chirij ri xu'an wi'xoq? Ma ri xu'an chwe e jun utzilaj chak. 11Ri nib'a'ib' e la' xaqi e k'o iwuk'; no'j ri'in na xaqi ta in k'o iwuk'. 12Yey wa xu'an wi'xoq echiri' xuq'ej wa kunab'al panuwi', wa' re uyijb'axik pan ri nucuerpo re ri muqub'al we.#26:12 Echiri' kakam junoq, raj judi'ab' kakatinisaj ri cuerpo y kakikoj kunab'al ki' ruxlab' che. 13Paqatzij wi kamb'i'ij chiwe: Pa taq katzijox wi wa Utzilaj Tzij che ronoje ruwachulew, kakuxtax k'u wi'xoq ruma ri xu'ano —xcha'.

Ri Judas kuk'ayij ri Jesús

(Mr. 14:10-11; Lc. 22:3-6)

14Jun k'u chike ri kab'lajuj utijo'n ri Jesús, Judas aj Iscariot rub'i', xe'ek kuk' ri nimaq e aj chakunel pa Rocho Dios 15y jewa' xub'i'ij chike:

—¿Sa' ri kaya alaq chwe we kanya ri Jesús paq'ab' alaq? —xcha'. Ek'u rike xkib'i'ij kakitoj treinta saqil puaq re plata che.

16Chwi k'u ri', ri Judas xujeq utzukuxik su'anik kuya ri Jesús pakiq'ab'.

Ri Jesús kutij ri cena re Pascua kuk' ri kab'lajuj utijo'n

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Chupa k'u ri nab'e q'ij re ri nimaq'ij echiri' katij ri pam na jinta levadura che, rutijo'n ri Jesús xeqib' ruk' y xkitz'onoj che:

—¿Pa ka'aj wi la ke'qayijb'a' wi ri cena re ri nimaq'ij Pascua? —xecha'.

18Ri Jesús xub'i'ij k'u chike:

—Jix pa ri tinamit y chila' ki'riqa jun achi; chib'i'ij k'u che: “Ri tijonel qe'oj jewa' kub'i'ij: Ri nuq'ijol ri'in xa naqaj chi k'o wuloq, y chupa ri ocho la kan'an wi ri nimaq'ij Pascua junam kuk' ri nutijo'n” —xcha'.

19Rutijo'n ri Jesús e xki'ano jela' pacha' ri xeb'utaq Rire che, xe'kiyijb'a' k'u ri cena re ri nimaq'ij Pascua.

20Echiri' xok raq'ab', ri Jesús xok chwa ri mexa junam kuk' ri kab'lajuj utijo'n. 21Ek'uchiri' kewa'ik, ri Jesús xub'i'ij chike:

—Paqatzij wi kamb'i'ij chiwe: K'o jun chiwe ri'ix kak'ayin we —xcha'.

22Ek'uchiri', rutijo'n lik xeb'uchap b'is y xkijeq chikijujunal kakitz'onoj che:

—Qajawal, ¿k'axtaj in ri'? —kecha'.

23Ri Jesús xuk'ul uwach:

—E ri kumu' lo rupam junam wuk' chupa ri laq, e ri' ri kak'ayin we ri'in. 24Paqatzij wi Ralaxel Chikixo'l Tikawex e katajin che rik'owib'exik janipa ri tz'ib'ital kan puwi Rire chupa Ruch'a'tem ri Dios. Pero ¡lik toq'o' uwach rachi kak'ayin re! E ne más utz che wa'chi tamaji xalaxik —xcha'.

25Ek'uchiri', xch'aw ri Judas, ri jun kuk'ayij ri Jesús, jewa' xub'i'ij:

—Wajawal, ¿k'axtaj in ri'? —xcha'.

Ri Jesús xuk'ul uwach:

—Are'; at xatb'i'n re —xcha'.

26Xaloq' k'u ri' kewa'ik, ri Jesús xuk'am ri pam y xutioxij che ri Dios. Tek'uchiri' xuwech'o, xujach chike rutijo'n y jek'uwa' xub'i'ij:

—Chik'ama' y chitija', ma e nucuerpo wa' —xcha'.

27Tek'uchiri' xuk'am ri k'olib'al k'o vino chupa, xutioxij che ri Dios, xuya chike y jek'uwa' xub'i'ij:

—Chitija iwonoje chuchi' wa' wa k'olib'al k'o vino chupa, 28ma e nukik'el wa', ri katuruw na kuma uk'iyal tikawex re kuyb'al kimak, yey e kujikib'a' uwach ri k'ak' tzij.#Jer. 31:31-34 29Y kamb'i'ij k'u chiwe: Chwi wo'ora na kantij ta chi ruwa'al uva k'ate ki'ntija tanchi junam iwuk' chupa ruq'ijol rutaqanik ri Nuqaw —xcha'.

Ri Jesús kuq'alajisaj ri ku'an ri Pedro echiri' karewaj we reta'am uwach

(Mr. 14:26-31; Lc. 22:31-34; Jn. 13:36-38)

30Echiri' xkik'is ub'ixoxik ri b'ix,#26:30 K'isb'al re ri cena re Pascua, ri e aj judi'ab' kakib'ixoj ri Salmos 115–118. xeb'ek chwa ri juyub' Olivos. 31Ek'uchiri', ri Jesús xub'i'ij chike:

—Waq'ab' iwonoje ri'ix kiwesaj na iwib' chwij, ma e pacha' kub'i'ij Ruch'a'tem ri Dios:

Kankamisaj raj chajinel

y taq rub'exex kakikich b'i kib' Zac. 13:7

kacha'.

32No'j echiri' kink'astaj lo chikixo'l ri ekaminaq, kinnab'ej b'i chiwach k'a Galilea —xcha'.

33Ek'u ri Pedro xuk'ul uwach:

—Tob' ne konoje kakesaj kib' chi'ij la, ri'in na kan'an ta k'ana wa' —xcha'.

34Yey ri Jesús xuk'ul uwach:

—Paqatzij wi kamb'i'ij chawe: Wa jun aq'ab' echiri' k'amaja' ne kab'ixon ri teren, ri'at oxlaj chik ab'i'im na aweta'am ta nuwach —xcha'.

35Xub'i'ij k'u ri Pedro che:

—Tob' ne chirajawaxik kinkam junam uk' la, ri'in na kanwewaj taj weta'am wach la —xcha'. Jek'ula' ri' xkib'i'ij konoje rutijo'n.

Ri Jesús ku'an orar pa ri werta Getsemaní

(Mr. 14:32-42; Lc. 22:39-46)

36Tek'uchiri', ri Jesús xeb'uk'am b'i rutijo'n pa jun luwar Getsemaní rub'i', y xub'i'ij k'u chike:

—Chixtz'ula kan wara, no'j ri'in ki'n'ana orar chile' apanoq —xcha'.

37Yey xeb'uk'am k'u b'i ri Pedro y ri keb' uk'ajol ri Zebedeo ruk'. Y xujeq k'u ri' lik kab'isonik y lik kak'axk'ob' ri ranima'. 38Ek'uchiri', xub'i'ij chike:

—K'o jun unimal b'is re kamik chinuk'u'x. Chixk'ola kan wara; mixwarik, e lik chi'ana orar wuk' —xcha'.

39Tek'uchiri', Rire xqib' chi pan jub'iq' chwach, xuxukub'a' rib' y xuqasaj umejelem k'a chu'lew, y xu'an k'u orar, jewa' xub'i'ij:

«Lal Nuqaw, 'ana ko la ri' chinkolob'ej ko la cha' na kinik'ow ta chupa wa' wa k'axk'ob'ik. No'j na e ta k'u chu'ana ri kuaj ri'in, ma e chu'ana janipa ri ka'aj Rilal» xcha'.

40Tek'uchiri', xtzelej lo pa e k'o wi kan rutijo'n y xeb'o'lu'riqa' kewarik. Xub'i'ij k'u che ri Pedro:

—¿Lik kami na xich'ij ta k'ana ri waram cha' ki'an orar wuk', tob' tane xa juna ora? 41Mixwar k'ut y lik chi'ana orar cha' kich'ij uchuq'ab' ri k'amb'al ipa kapetik. Paqatzij wi, lik kacha ik'u'x che u'anik ri utz, pero wa' lik k'ayew chiwe ma e ri iti'jil na jinta ukowil —xcha'.

42Xe'ek tanchi chukalaj, xu'ana orar, jewa' xub'i'ij:

«Lal Nuqaw, we lik chirajawaxik kinik'ow na che wa k'axk'ob'ik, e chu'ana k'u ri' janipa ri ka'aj Rilal» xcha'.

43Tek'uchiri', xtzelej tanchi lo kuk' rutijo'n y xeb'o'lu'riqa' kewarik, ma ri kiwach lik na kukuy ta chi ri waram.

44Xeb'uya tanchi kanoq y xu'ana orar churox laj, yey e mismo ri xutz'onoj che ri Dios.

45Ek'uchiri', xe'ek tanchi pa e k'o wi kan rutijo'n y xub'i'ij chike:

—¿K'a kixwar kami ri' ri'ix? ¿K'a kixuxlanik? Ma e wa' xopon ru'orayil cha' Ralaxel Chikixo'l Tikawex kaya' pakiq'ab' raj makib'. 46¡Chixwa'lijoq! ¡Jo'! Ma ri kak'ayin we ri'in e la' xk'unik —xcha'.

Kachap b'i ri Jesús

(Mr. 14:43-50; Lc. 22:47-53; Jn. 18:1-11)

47K'a kach'a't ne ri Jesús echiri' xk'un lo ri Judas, jun chike ri kab'lajuj utijo'n. Ek'u rire erachb'ilam lo uk'iyal winaq kuk'a'am lo espada y che'. Taq wa' etaqom lo kuma ri nimaq e aj chakunel pa Rocho Dios y kuma ri nimaq winaq re ri tinamit. 48Ek'u ri Judas, ri kaya'w b'i re pakiq'ab', ub'i'im chi lo chike su'anik kaketa'maj china ri kakichapo, jewa' ub'i'im: «E ri jun kantz'ub' uchi', e ri' rire. Chapa k'u b'i alaq.»

49Xqib' k'u ri Judas ruk' ri Jesús y xuya rutzil uwach, xub'i'ij che:

—Wajawal —xcha'. Y xutz'ub' uchi'.

50Ek'u ri Jesús xub'i'ij che:

—Wamigo, ¿sa' ri kola'ana'? —xcha'.

Tek'uchiri', xeqib' ri winaq ruk' y xkichapo cha' kakik'am b'i pa q'atb'al tzij.

51K'o k'u jun chike ri e k'o ruk' ri Jesús, xresaj lo ru espada y xujochij b'i jun uxikin ri raj chak ri kajawal raj chakunel pa Rocho Dios.

52Ek'u ri Jesús xub'i'ij che:

—Chak'olo ra espada chupa ruk'olib'al; ma konoje ri kech'o'jin ruk' espada, ruk' espada kekamik. 53¿Na aweta'am ta kami, we ta kuaj ri'in kantz'onoj che ri Nuqaw wo'ora, Rire keb'utaq lo juna kab'lajuj legiones#26:53 Jun legión e k'o waqib' mil soldados che. re ángeles wuk'? 54No'j we ta e xin'an ri', ¿su'anik k'u ri' ku'ana janipa ri kub'i'ij Ruch'a'tem ri Dios panuwi ri'in? —xcha'. 55Ek'uchiri', xub'i'ij chike ri soldados:

—¿Su'chak petinaq alaq ruk' espada y che'? ¿Petinaq kami alaq che uk'amik b'i juna eleq'om? Wa petinaq loq ronoje q'ij wa' k'ut in tz'uyi'naq chiwach alaq, e la' kink'utun pa ri Rocho Dios. ¿Su'chak k'u ri' k'a e la' kino'lchapa alaq? 56No'j jek'uwa' ku'ano cha' e ku'ana ri kiq'alajisam kan ri q'alajisanelab' pa Ruch'a'tem ri Dios —xcha'.

Tek'uchiri', konoje rutijo'n xeb'animajik y jela' xkiya kan ri Jesús.

Ri Jesús k'o chikiwach raj q'atal tzij e aj judi'ab'

(Mr. 14:53-65; Lc. 22:54, 66-71; Jn. 18:12-14, 19-24)

57Ri xechapaw b'i ri Jesús xkik'am b'i chwach ri Caifás, ri kajawal raj chakunel pa Rocho Dios, pa kimolom wi kib' raj k'utunel re ri tzijpixab' y ri nimaq winaq re ri tinamit.

58Ek'u ri Pedro xa naj teran pan chirij ri Jesús, jela' xe'ela che ruwa ja re ri rocho ri kajawal raj chakunel pa Rocho Dios. Xok k'u b'i y xe'tz'ula kuk' ri e chajinel cha' karilo sa' ri kuk'isb'ej ronoje wa'.

59Ri nimaq e aj chakunel pa Rocho Dios kuk' taq ri nimaq winaq y konoje ri uchapom wi rib' ri q'atb'al tzij, kakitzukuj su'anik kakitz'aq uchi' ri Jesús cha' jela' utz kaq'at tzij re kamik puwi'. 60No'j na jinta k'o xkiriq chirij, tob' uk'iyal winaq xkinuk' raq'ub'al chirij. Tek'uchiri', xeb'opon na ka'ib' xe'kitz'aqa uchi' ruk' raq'ub'al, 61jewa' xkib'i'ij:

—Wa' wa'chi jewa' xub'i'ij: “Ri'in k'o panuq'ab' kanwulij ri Rocho Dios y xa pa oxib' q'ij kanyak tanchik” —xecha'.

62Ewi ri kajawal raj chakunel pa Rocho Dios xyaktajik y xub'i'ij che ri Jesús:

—¿E kami la' na jinta k'ana kab'i'ij ri'at? ¿Sa' k'u ri kak'ulub'ej uwach puwi wa ketajin che ukojik chawij? —xcha'.

63No'j ri Jesús na jinta k'o xub'i'ij. Ek'uchiri', jewa' xub'i'ij ri kajawal raj chakunel pa Rocho Dios:

—Chab'i'ij chupa rub'i' ri Dios k'aslik, we ri'at at ri Cristo, Ruk'ajol ri Dios —xcha'.

64Ri Jesús xub'i'ij che:

—Are', e ri xb'i'ij la. Y kamb'i'ij k'u che onoje alaq: Kil na k'u alaq Ralaxel Chikixo'l Tikawex tz'ul puwikiq'ab' ri Dios, ri lik k'o unimal uchuq'ab' yey kil k'u alaq ri' echiri' kak'un lo pa sutz' chwa ri kaj#Dn. 7:13; Ap. 1:7 —xcha'.

65Ek'u ri kajawal raj chakunel pa Rocho Dios xurich'ij ruq'u' y xub'i'ij:

—Wa' wa'chi lik xmakun chirij ri Dios ruk' wa xub'i'ij. ¡Na jinta chi uchak más e aj kojol umak! Ma lik e la' xta alaq xub'i'ij ri na taqal ta che. 66¿Sa' k'u ri' kab'i'ij ralaq che? —xcha'.

Rike xkib'i'ij:

—Lik chirij umak y taqal k'u che kakamisaxik —xecha'.

67Ewi e k'o jujun xkijeq kakichub'aj rupalaj y lik kaki'an pa t'o'y. E k'o jujun chik xkipach' q'ab' chupalaj 68y kakib'i'ij che:

—At ri Cristo, Rucha'o'n lo ri Dios, ¡chana'ij pe k'u ri' china xch'ayaw awe! —kecha che.

Ri Pedro kub'i'ij na reta'am ta uwach ri Jesús

(Mr. 14:66-72; Lc. 22:55-62; Jn. 18:15-18, 25-27)

69Ek'u ri Pedro tz'ul che ruwa ja echiri' jun ali aj chak xqib' ruk' y xub'i'ij che:

—Rilal lal jun chike ri eteran chirij ri Jesús, ri jun aj Galilea —xcha'.

70No'j ri Pedro xrewaj chikiwach konoje, jewa' xub'i'ij:

—Ri'in na weta'am tane sa' puwi' katch'a't wi —xcha'.

71Ek'u ri' kel b'i ri Pedro chuchi' ri puerta yey xilitaj ruma jun chik ali aj chak, y wa'li jewa' xub'i'ij chike ri e k'o chiri':

—Wa' wa jun achi e jun chike ri eteran chirij ri Jesús ri aj Nazaret —xcha'.

72Ri Pedro xrewaj tanchik y lik xujikib'a' uwach ub'i'xikil:

—Ri'in na weta'am ta k'ana uwach la' la'chi —xcha'.

73Joq'otaj k'u ri', ri e k'o chiri' xeqib' ruk' ri Pedro y xkib'i'ij che:

—Paqatzij wi rilal lal jun chike rutijo'n; ma lik q'alaj, ri kach'a't la e junam ruk' ri kech'a't rike —xecha'.

74Ek'u ri Pedro xujeq ub'i'xikil itzel taq tzij y lik xujikib'a' uwach, xub'i'ij:

—Ri'in na weta'am ta k'ana uwach la' la'chi —xcha'.

Xew xuk'is ub'i'xikil wa', xb'ixon lo ri teren. 75Ek'uchiri', xk'un lo chuk'u'x ri Pedro ri xb'i'x lo che ruma ri Jesús: «K'amaja' ne kab'ixon ri teren, ri'at oxlaj chik ab'i'im na aweta'am ta nuwach.» Ewi xel b'i ri Pedro chiri' y lik xoq'ik ruma ruk'axk'olil uk'u'x.

Currently Selected:

Mateo 26: acrN

Highlight

Copy