Mateo 25

Ri k'amb'al na'oj pakiwi lajuj q'apoj alito

1»Ri ku'ana pa rutaqanik ri Dios petinaq chila' chikaj, e jela' pacha' ri xkik'ulumaj lajuj q'apoj alito echiri' xkik'am b'i ri kicandil y xeb'ek pa jun k'ulanikil re ke'kik'ulu rala kak'uli'ik. 2E k'o k'u wo'ob' chike lik k'o kina'oj y ri wo'ob' chik na jinta kina'oj.

3»Ri wo'ob' na jinta kina'oj xkik'am b'i ri kicandil, pero na xkik'am tub'i aceite re kakinojisaj tanchik.#25:3 E rojertan e aceite 'anom ruk' ruwach ri che' re olivo ri kakoj chupa ri candil cha' kawon ri mecha. 4Ek'u ri k'o kina'oj kinojisam b'i ri kicandil che aceite, yey pa rewi kuk'a'am aceite pa jun chik k'olib'al.

5Ek'u rala kak'uli'ik xmayin che ri roponik. Ruma k'u ri', ralito xkijeqo keyuxk'a'tik y xok lo kiwaram.

6»Pa tik'il aq'ab' k'ut, xtataj jun kasik'inik, jewa' kub'i'ij: “¡Rala xk'unik! ¡Chixela lo che uk'ulik!” 7Konoje k'u ri q'apoj alito xeyaktajik y xkijeq uyijb'axik ri kicandil.

8»Ek'u ri wo'ob' alito na jinta kina'oj jewa' xkib'i'ij chike ri lik k'o kina'oj: “Chiya'a jub'iq' qaceite che ri k'o iwuk' ri'ix, ma ri qacandil ri'oj katajin uchupik.”

9»No'j ri wo'ob' chik jewa' xkik'ul uwach: “We kaqaya iwe ri'ix, na ku'an ta ri' qe qonoje. Ji'tzukuj k'u iwe'ix pa kak'ayix wi y chiloq'o'.”

10»Ek'uchiri' eb'elinaq b'i ri wo'ob' che uloq'ik aceite, xk'un lo rala. Ralito k'o kina'oj, ri kiyijb'am chi pan ri kicandil, xeb'ok junam ruk' rala pa k'ulanikil y xtz'apix k'u lo ri puerta.

11»Tek'uchiri', xetzelej lo ri wo'ob' alito y xech'aw apanoq: “Qajawal, qajawal, jaqa lo la ri puerta chiqe.”

12»Ek'u rala kak'uli'ik xuk'ul lo uwach: “Paqatzij wi kamb'i'ij chiwe: Na weta'am ta k'ana iwach.”

13»Mawar k'u iwach ri' ri'ix, ma na iweta'am tane ruq'ijol y ru'orayil echiri' kak'un lo Ralaxel Chikixo'l Tikawex.

Ri k'amb'al na'oj puwi taq ri uya'om ri Dios paqaq'ab'

14»Ri ku'ana pa rutaqanik ri Dios petinaq chila' chikaj, e pacha' ri xu'an jun achi echiri' xe'ek pa jun luwar lik naj; xeb'usik'ij k'u ri raj chakib' y xuya kan rupuaq pakiq'ab'. 15Che jun xuya kan wo'ob' mil, che jun chik xuya kan ka'ib' mil y che jun chik xuya kan mil. Wa xya' kan chike e chirij ri kakich'ij uchakuxik. Ek'uchiri', xe'ek naj.

16»Ek'u raj chak xk'amaw kan ri wo'ob' mil, xu'an uk'ay ruk' y jela' xuch'ak chi wo'ob' mil puwi'. 17Jek'ula' xu'an ri xk'amaw kan keb' mil, xuch'ak chi keb' mil puwi'. 18No'j ri xk'amaw kan jun mil, xuk'ot jun jul y chupa wa' xrewaj ri puaq ya'tal puq'ab' ruma ri rajaw.

19»Ik'owinaq chi k'u uk'iyal q'ij, xtzelej tanchi lo ri kajaw raj chakib' y xutz'onoj k'u chike sa' ri xki'an ruk' rupuaq. 20Nab'e xopon ri raj chak ri uk'amom kan wo'ob' mil. Xuya k'u che ri rajaw ri wo'ob' mil chik xuch'ak puwi ri ya'om kan che y jewa' xub'i'ij: “Wajaw, ri' ri wo'ob' mil xya kan la chwe y ri' chi wo'ob' mil, wa' e xinch'ak puwi ri xya kan la chwe” xcha'.

21»Ri rajaw xub'i'ij k'u che: “Utz ri', ri'at at utzilaj waj chak y lik at jusuk'; ma jusuk' xachakuj ri xa jub'iq' ya'tal kan paq'ab'. E uwari'che wo'ora lik k'i ri kanya paq'ab'. Chatokoq y chatki'kota wuk'” xcha'.

22»Tek'uchiri', xopon raj chak ri uk'amom kan ka'ib' mil y xub'i'ij che: “Wajawal, ri' ri ka'ib' mil xya kan la chwe y ri' chi ka'ib' mil kanya che'la, wa' e xinch'ak puwi ri xya kan la chwe” xcha'.

23»Ri rajaw xub'i'ij k'u che: “Utz ri', at utzilaj waj chak y lik at jusuk'; ma jusuk' xachakuj ri xa jub'iq' ya'tal kan paq'ab'. E uwari'che wo'ora lik k'i ri kanya paq'ab'. Chatokoq y lik chatki'kota wuk'” xcha'.

24»Ek'uchiri', xopon ri jun chik aj chak ri ya'om kan xa jun mil che, y jewa' xub'i'ij che ri rajaw: “Wajaw, ri'in weta'am lal jun achi lik titz'itik, ma ka'an la molonik pa na awaninaq ta wi la yey kamolon ne la pa na jinta jopopem wi la. 25E uwari'che ri'in lik xinxi'ij wib'. Xin'ek k'ut y xinmuq ri puaq la pulew. Ri' ri mil ya'om kan la chwe, ma e la” xcha'.

26»Ri rajaw xub'i'ij che: “At jun waj chak lik na utz taj y at xepu. We xach'ob'o kan'an molonik pa na in awaninaq ta wi yey kanmol pa na jinta nujopopem wi, 27xa'ya'a ta k'u ri' ri nupuaq pa juna banco cha' echiri' kintzelej loq, kank'ul ri nupuaq junam ruk' ruch'akom chik” xcha'.

28»Tek'uchiri', xub'i'ij chike jujun chik raj chak e k'o chiri': “Chimaja che wa jun aj chak ri mil k'o ruk' y chiya'a che ri k'o lajuj mil ruk'. 29Ma china ri lik k'i k'o ruk', kaya'i' más che y jela' kak'oji' ne uwi' ri k'o ruk'. No'j ri na jinta k'o ruk', kamaj ne che ri xa jub'iq' k'o ruk'. 30Ek'u wa' wa jun aj chak na jinta uchak, ji'k'aqa b'i pa ri q'equ'm; chiri' k'u ri' koq' wi y kaqich'ich' wi ruwi' re'” xcha'.

Ri q'atb'al tzij pakiwi taq ri tinamit

31»Echiri' Ralaxel Chikixo'l Tikawex kak'un ruk' runimal uchuq'ab' kuk' konoje ri santowilaj ángeles, katz'uyi' na k'u ri' chupa ri chomilaj tz'ulib'al re rutaqanik. 32Konoje taq k'u ri tinamit che ruwachulew kakimol kib' chwach y Rire kujach kipa chikijujunal, jela' pacha' ku'an juna chajinel keb'eresaj ri b'exex chikixo'l ri kaprux. 33Keb'uya k'u ri b'exex puwikiq'ab' Rire yey ri kaprux keb'uya pumox.

34»Ek'uchiri', ri rey kub'i'ij chike ri e k'o puwikiq'ab' Rire: “¡Chixpetoq! ¡Lik nim iq'ij iwalaxik ri'ix! Chixok k'u chupa rutaqanik ri Dios y chik'ulu janipa ri uyijb'am chi pan chiwe chwi lo ri jeqeb'al re ruwachulew. 35Ma xink'oji' pa numik y ri'ix xiya nuwa; xink'oji' pa tzajin chi' y ri'ix xiya numiq'ina'; xintzukuj pa kinkanaj kan wi y ri'ix xinik'ul pa iwocho. 36Na jinta ko nuq'u' y ri'ix xiya nuq'u'; xink'oji' pa yab'il y xixe'b'ina wuk'; xink'oji' pa cárcel y xini'wila'” kacha'.

37»Ek'u ri e jusuk' echiri' kakita wa', jewa' kakib'i'ij: “Qajawal, ¿jampala' xqil la lal k'o la pa numik y xqaya wa la? ¿Jampala' xqil la lal k'o la pa tzajin chi' y xqaya miq'ina' la? 38¿Jampala' xqil la katzukuj la pa kakanaj kan wi la y xqak'ul la pa qocho? ¿Jampala' xqil la na jinta q'u' la y xqaya q'u' la? 39¿Jampala' xqil la lal yewa' o k'o la pa cárcel yey xe'qila la?” kecha'.

40»Y ri rey kuk'ul uwach chike: “Paqatzij wi kamb'i'ij chiwe: Ronoje k'u ri xi'an chike wa watz-nuchaq' na jinta ko kiwach, chwe ri'in xi'an wi” kacha'.

41»Ek'uchiri', kub'i'ij ri rey chike ri e k'o pumox: “Ri'ix itzel iwachlib'al, chixela wuk'; kix'ek k'u chupa ri aq' na kachup ta chik, ri yijb'ital chi pan che ritzel winaq kuk' konoje ru ángeles eteran chirij. 42Ma ri'in xink'oji' pa numik yey ri'ix na xiya ta nuwa; xink'oji' pa tzajin chi', yey ri'ix na xiya ta numiq'ina'. 43Xintzukuj pa kinkanaj kan wi, yey ri'ix na xinik'ul ta pa iwocho. Na jinta ko nuq'u', yey ri'ix na xiya ta nuq'u'. Xink'oji' pa yab'il y xink'oji' pa cárcel, yey ri'ix na xini'wila taj” kacha'.

44»Ek'uchiri', kakib'i'ij rike che: “Qajawal, ¿jampala' xqil la kanum la yey katzajin chi' la? ¿Jampala' xqil la katzukuj la pa kakanaj kan wi la? ¿Jampala' xqil la na jinta q'u' la? ¿Jampala' xqil la lal yewa' o k'o la pa cárcel, yey ri'oj na xqanimaj ta la?” kecha'.

45»Ri rey kuk'ul k'u uwach chike: “Paqatzij wi kamb'i'ij chiwe: Ronoje ri na xi'an ta chike wa watz-nuchaq' na jinta ko kiwach, chwe ri'in na xi'an ta wi” kacha'.

46»Konoje k'u ri' wa' keb'ek pa ri k'axk'ob'ik na jinta utaqexik, no'j ri e jusuk' keb'ek pa ri k'aslemal na jinta utaqexik» xcha ri Jesús.

Currently Selected:

Mateo 25: acrN

Highlight

Copy