Mateo 20
20
Jun k'amb'al na'oj puwi rutaqanik ri Dios
1»Ri ku'an chupa rutaqanik ri Dios petinaq chila' chikaj e jela' pacha' ri xu'ano echiri' juna rajaw chak anim tan xel b'i che kitzukuxik aj chakib' keb'ajawax chupa rutiko'n re uva. 2Xch'a't kuk' raj chakib' puwi ri kajil y xkanajik kuya jun denario re jun q'ij chak chike. Tek'uchiri', xeb'utaq b'i chupa rutiko'n. 3Laj che ri ub'elej ora#20:3 “Ri ub'elej ora”: Kil “hora” pa vocabulario. anim, xel tanchi ub'i y xeburiq jujun chik kimolom kib' pa k'ayib'al na jinta kaki'ano.
4»Xub'i'ij k'u chike: “Jix ri'ix, jixe'chakuna wuk' chupa ri nutiko'n re uva y tz'aqat kixintojo” xcha'. Ek'u rike xeb'ek.
5»Pa tik'il q'ij#20:5 “Tik'il q'ij”: Kil “hora” pa vocabulario. k'u ri', ri rajaw ri chak xel tanchi ub'i che kitzuquxik más aj chak. Yey je tanchi la' xu'an che ri urox ora b'enaq q'ij.
6»Laj che k'u ri uro' ora b'enaq q'ij, xel tanchi ub'i y xeb'u'riqa lo jujun chik na jinta kaki'ano. Xub'i'ij k'u chike: “¿Su'chak ri'ix ix k'o wara y na jinta k'o xi'an wa jun q'ij?”
7»Xkik'ul k'u uwach rike: “E ruma na jinta junoq xojchokowik.”
»Ek'uchiri', xub'i'ij ri rajaw ri chak chike: “Jix, jixe'chakuna chupa ri nutiko'n re uva y tz'aqat kixintojo.”
8»Echiri' xok raq'ab', ri rajaw ri chak xub'i'ij che ri caporal: “Cheb'asik'ij konoje raj chakib' y cheb'atojo b'i. E keb'atoj nab'e ri xeb'ok k'unaj, y k'isb'al k'u re, keb'atoj ri xeb'ok nab'e pa chak.”
9»Ek'uchiri', xek'un raj chak ri xeb'ok b'enaq q'ij che ri uro' ora. Y chikijujunal k'u ri' xkik'ul jun denario. 10Tek'uchiri', xek'un lo ri eb'okinaq nab'e pa chak. E chikiwa rike más k'i ri kajil kakik'ulu. No'j na je ta la' xu'ano, ma xkik'ul chikijujunal jun denario, pacha' ri xkik'ul ri jujun chik.
11»Echiri' xkik'ul ri kajil re jun q'ij, xkijeqo kech'a't chirij ri rajaw ri tiko'n, 12jewa' xkib'i'ij che: “Wa' wa xeb'ok b'enaq q'ij chik, xa jun ora xechakunik yey xetoj la junam quk' ri'oj, tob' k'u ri' ri'oj xqakuy lo ruk'atanil ri q'ij” xecha'.
13»No'j ri rajaw chak xuk'ul uwach, jewa' xub'i'ij che jun chike: “Wamigo, mab'i'ij we na usuk' ta ri xin'an chawe. ¿Na xojkanaj ta neb'a la' katintoj jun denario? 14Chak'ama k'u rawajil ri'at y jat. Yey we ri'in kuaj kanya che ri xok k'unaj pa chak, junam ruk' ri xinya chawe ri'at, 15¿na jinta neb'a panuq'ab' ri'in kan'an sa' ri kuaj ruk' ri nupuaq? ¿O k'ax ak'u'x chwij xa ruma xink'ut ri rutzil nuk'u'x chike jujun chik?” xcha ri rajaw ri chak.
16»Jela' k'u ri', lik e k'i chike ri na jinta kiwach wo'ora, e lik kak'oji' kiwach chwach apanoq; yey lik k'u e k'i chike ri lik k'o kiwach wo'ora, chwach apanoq na jinta chi kiwach. Ma lik e k'i ri esik'im, tob' k'u xa e jujun ri echa'talik —xcha ri Jesús.
Ri Jesús kach'a't tanchi puwi rukamik
(Mr. 10:32-34; Lc. 18:31-34)
17Echiri' k'o chi ri Jesús chi b'e re ke'ek Jerusalem, xeb'uk'am b'i ri kab'lajuj utijo'n kitukel pa jun luwar y xub'i'ij chike:
18«Chitape': E wa' kojpaqi' Jerusalem, yey ek'u Ralaxel Chikixo'l Tikawex kaya' pakiq'ab' ri nimaq e aj chakunel pa Rocho Dios y raj k'utunel re ri tzijpixab' cha' kakiq'at tzij puwi' re kamik. 19Tek'uchiri', kakiya pakiq'ab' ri na e ta aj judi'ab' cha' rike kakich'amij, kakijich' upa y kakikamisaj chwa cruz. No'j churox q'ij k'ut kak'astaj b'i chikixo'l ri ekaminaq» xcha'.
Ri xutz'onoj ri kichu ri Jacobo y ri Juan che ri Jesús
(Mr. 10:35-45)
20Ek'uchiri', xqib' ruk' ri Jesús ri kichu ri keb' uk'ajol ri Zebedeo,#20:20 “Ri keb' uk'ajol ri Zebedeo”: Wa' e ri Jacobo y ri Juan. y ek'u la' e rachb'i'il ri ralab'; xuxukub'a' rib' chwach ri Jesús ma k'o karaj kutz'onoj che.
21Ri Jesús xutz'onoj che:
—¿Sa' ri ka'aj la? —xcha'.
Rixoq xuk'ul uwach:
—Wajawal, ya'a la chike wa keb' walab' ketz'uyi' uk' la pa ri taqanik la, jun pawikiq'ab' la y ri jun chik, pa mox la —xcha'.
22Ek'u ri Jesús xuk'ul uwach, y jewa' xub'i'ij chike ri keb' utijo'n:
—Ri'ix na iweta'am taj sa' ri kitz'onoj. ¿Kich'ij neb'a ri'ix ri kinik'ow wi ri'in y ri k'ax kape panuwi'? —xcha'.
Rike xkib'i'ij:
—Kaqach'ijo —xecha'.
23Ri Jesús xub'i'ij chike:
—Qatzij, ri'ix kich'ij na ri k'ax kinik'ow wi ri'in y ri k'axk'ob'ik kape panuwi'. Pero ri kixtz'uyi' pa nuwikiq'ab' y pa numox, ri' na in ta kinya'w re. Ma xew kaya'taj chike ri echa'tal chi ruma ri Nuqaw cha' ku'ana na ke —xcha'.
24Echiri' xkita wa' ri lajuj chik utijo'n, lik xpe koyowal chikij ri keb' kichaq' kib'. 25Ek'u ri Jesús xeb'usik'ij y xub'i'ij chike:
—Iweta'am ri'ix, ri ketaqan pakiwi ri nimaq tinamit keb'u'ana pacha' e rajaw ronoje; yey ri lik k'o kiwach kik'ow uwi' ri taqanik kaki'an pakiwi ri eya'tal pakiq'ab'. 26No'j chixo'l ri'ix na ub'e taj jela' ku'ano. Ma we k'o junoq chiwe ri'ix karaj ku'ana aj wach, e chuya'a rib' ku'an nimanel iwe'ix. 27Yey e junoq chiwe karaj ku'ana nab'e chixo'lib'al, e chuya'a rib' ku'an nimanel ke konoje 28jela' pacha' ri ku'an Ralaxel Chikixo'l Tikawex. Ma Rire na xk'un taj re kanimaxik; xk'unik re ko'lnimanoq y re kolu'ya'a rib' pa kamik che kikolob'exik uk'iyal tikawex —xcha'.
Ri Jesús keb'ukunaj ka'ib' potz'
(Mr. 10:46-52; Lc. 18:35-43)
29Echiri' ri Jesús kuk' rutijo'n katajin b'i kelik pa ri tinamit Jericó, lik uk'iyal winaq xeterej b'i chirij Rire. 30E k'o k'u ka'ib' potz' etz'ul chuchi' ri b'e. Echiri' xkito katajin rik'owik ri Jesús, lik xesik'in pan che:
—¡Qajawal, lal ri Ralk'o'al kan ri rey David, choj-juch' ka'n ko che'la! —xecha'.
31Ek'u ri winaq xekich'a'b'ej kipa cha' na kesik'in ta chik, no'j ri ka'ib' potz' más ne ko xesik'inik, xkib'i'ij:
—¡Qajawal, lal ri Ralk'o'al kan ri rey David, choj-juch' ka'n ko che'la! —xecha'.
32Ek'uchiri', xtak'i' ri Jesús, xeb'usik'ij y xutz'onoj chike:
—¿Sa' ri kiwaj kan'an chiwe? —xcha'.
33Ri ka'ib' potz' xkik'ul uwach:
—Qajawal, chojkunaj ko la cha' kojtzu'nik —xecha'.
34Ek'u ri Jesús xejuch' ka'n pa ranima' y xuya ruq'ab' puwi ri kiwach. Na jampatana k'u ri' xetzu'nik y xeterej b'i chirij ri Jesús.
Currently Selected:
Mateo 20: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
