Mateo 21

Ri winaq kakiyak uq'ij ri Jesús echiri' kok Jerusalem

(Mr. 11:1-11; Lc. 19:28-40; Jn. 12:12-19)

1Ri Jesús kuk' rutijo'n xa naqaj chik e k'o che ri tinamit Jerusalem, ya e ri' keb'ok pa raldea Betfagé, ri k'o chwach ri juyub' Olivos. Ek'uchiri', ri Jesús xeb'utaq b'i ka'ib' chike rutijo'n cha' kenab'ej apanoq, 2jewa' xub'i'ij chike:

«Jix pa raldea k'o pan chiqawach. Chiri' ki'riqa jun axna yuqulik yey k'o ri ral ruk'. Chikira loq y cheb'ik'ama lo chwe. 3We k'o k'u junoq kutz'onoj chiwe sa' ri ki'ano, jewa' chib'i'ij che: “Rawaj keb'ajawax che ri Qajawal, yey k'ate kutaq tanchi uloq” kixcha'.»

4E xu'an wa' cha' e ku'ana rub'i'im kan ri q'alajisanel echiri' xub'i'ij:

5Chib'i'ij chike ri e aj Sion:

“Chiwilape', ri Rey iwe'ix kak'un iwuk',

u'anom lo ch'uti'n che rib';

ukojom lo jun buru,

wa' jun q'apoj buru, ral jun awaj aj eqa'n” Zac. 9:9

xcha'.

6Ek'uchiri', xeb'ek rutijo'n y xki'ano janipa ri xub'i'ij b'i ri Jesús chike. 7Xkik'am k'u lo ri axna junam ruk' ri ral y xkirip ri kimanta#21:7 Ri “manta” e jun k'ul kakikoj ri aj Israel re ojertan, tob' achijab' o ixoqib', pacha' po't woka'j re karab'exik. chikij. Tek'uchiri', ri Jesús xukoj b'i. 8Uk'iyal winaq xkiwiq ri b'e pa kik'ow wi ri Jesús, xkilik' taq ri kimanta pa ri b'e; yey e k'o jujun chik xkiq'at raltaq ko uq'ab' che' y xkilem pa la b'e re yakb'al uq'ij.

9Ek'u ri winaq e nab'e chwach kuk' ri eteran lo chirij xkijeqo lik kesik'inik, kakib'i'ij:

«¡Qayaka uq'ij ri Ralk'o'al kan ri rey David!

¡Nim uq'ij ralaxik ri jun petinaq

chupa rub'i' ri Dios Qajawxel!#Sal. 118:26

¡Qayaka uq'ij ri Dios k'o chila' chikaj!» kecha'.

10Echiri' xok ri Jesús Jerusalem, xetukuk konoje ri winaq re ri tinamit y lik e k'i ri kakitz'onob'ej chikiwach:

—¿China nawi wa jun achi? —kecha'.

11Ek'u ri winaq kakib'i'ij:

—E ri q'alajisanel Jesús, ri aj Nazaret re Galilea —kecha'.

Ri Jesús keb'eresaj b'i raj k'ay chupa ri Rocho Dios

(Mr. 11:15-19; Lc. 19:45-48; Jn. 2:13-22)

12Ek'uchiri', xok ri Jesús pa ri Rocho Dios y xeb'eresaj b'i konoje ri kek'ayinik y ri keloq'ow chupa. Xuk'aqala' taq b'i ri kimexa raj jachal uwach puaq y taq ri kixila raj k'ay palomax. 13Xub'i'ij k'u chike:

«Ri Dios jewa' kub'i'ij chupa Ruch'a'tem:

Che ri Wocho kab'i'xik:

“E luwar re oración” Is. 56:7

kacha'.

No'j ralaq 'anom alaq che ri Wocho e jun luwar ke eleq'omab'»#Jer. 7:11 xcha'.

14Chiri' k'u ri' chupa ri Rocho Dios, xeqib' ruk' ri Jesús jujun potz' kuk' jujun sik, y ri Jesús xeb'ukunaj. 15Ri nimaq e aj chakunel pa Rocho Dios kuk' raj k'utunel re ri tzijpixab' lik xpe koyowal echiri' xkil wa milagros y xkito lik kesik'in rak'alab' pa ri Rocho Dios, kakib'i'ij: «¡Qayaka uq'ij ri Ralk'o'al kan ri rey David!» kecha'.

16Xkib'i'ij k'u ri' che ri Jesús:

—¿Kata la sa' ri kakib'i'ij rak'alab' che'la? —xecha'.

Ek'u ri Jesús xuk'ul uwach:

—Qatzij wi kanto. ¿Na ajilam ta neb'a alaq ri kub'i'ij Ruch'a'tem ri Dios pakiwi rak'alab'? Ma jewa' kub'i'ij:

Chikichi' rak'alab' y ri ketz'umanik

yijb'am la ri chomilaj b'ix re yakb'al q'ij la Sal. 8:2

—xcha ri Jesús.

17Ek'uchiri', xeb'uya kanoq y xel b'i pa ri tinamit; xe'ek k'u Betania y chiri' xkanaj kan wi la jun aq'ab'.

Ri Jesús kuchaqisaj jun che' re higo

(Mr. 11:12-14, 20-26)

18Anim tan, echiri' ri Jesús katzelej tanchi pa ri tinamit, xpe numik che. 19Xril k'u jun che' re higo k'o chuchi' ri b'e. Xe'rila' k'ut yey na xuriq ta tob' xa juna uwach ri che', xew ruxaq k'olik.

Ek'uchiri', xub'i'ij ri Jesús che ri che':

—¡Na jinta chi k'ana ajiq'ob'alil kaya'o! —xcha'. Y na jampatana xchaqij ri che'.

20Echiri' xkil wa' rutijo'n, lik xkam kanima' che y xkitz'onoj k'u che:

—¿Cha'taj xchaqij tan wa che'? —xecha'.

21Ri Jesús xuk'ul uwach:

—Paqatzij wi kamb'i'ij chiwe: We ta lik k'o kub'ulib'al ik'u'x ruk' ri Dios y na keb' ta k'ana ipa ruk', ri' na xew ta jewa' ki'an ri'ix pacha' wa xin'an ri'in che ri higo. Ma utz ne ri' kib'i'ij che wa juyub': “Chatela wara y jate'k'ola chupa ri mar” kixcha' y e ku'ano. 22Jek'ula' ri', e janipa ri kitz'onoj che ri Dios ruk' kub'ulib'al ik'u'x, kik'ul na —xcha'.

China xya'w puq'ab' ri Jesús kataqanik

(Mr. 11:27-33; Lc. 20:1-8)

23Echiri' xopon ri Jesús pa ri Rocho Dios, xujeq kak'utunik. Ek'u ri nimaq e aj chakunel re ri Rocho Dios kuk' ri nimaq winaq re ri tinamit xeqib' ruk' y xkitz'onoj che:

—¿China xya'w paq'ab' la ka'an taq la wa'? ¿China xtaqaw la che ka'an taq la wa'? —xecha'.

24Ri Jesús xuk'ul uwach:

—Ri'in kan'an jun tz'onob'al che alaq. We xk'ul alaq uwach chwe, kamb'i'ij k'u ri' che alaq china ya'yom panuq'ab' kan'an wa'. 25¿China k'u xtaqaw re ri Juan kuya ri bautismo? ¿E ri Dios o e rachijab'? —xcha'.

Ek'u rike xkijeq kech'a't chikiwach puwi wa': «We xqak'ul uwach che: “E ri Dios xtaqaw re”, ri' kub'i'ij rire chiqe: “¿Su'chak k'u ri' na xkoj ta alaq ri xub'i'ij?” kacha chiqe. 26Yey kaqaxi'ij qib' kaqab'i'ij: “Xa achijab' xetaqaw re” ma konoje ri tinamit kakich'ob'o ri Juan e jun q'alajisanel re ri Dios» xecha chikiwach.

27Xkib'i'ij k'u che ri Jesús:

—Na qeta'am taj —xecha'.

Ek'u ri Jesús xub'i'ij chike:

«Jek'uri'la', ri'in na kamb'i'ij ta che alaq china ya'yom panuq'ab' kan'an taq wa'.

Ri k'amb'al na'oj pakiwi keb' alab'o kichaq' kib'

28»Yey chiwach ralaq ¿sa' ke'elawi wa'? K'o jun achi e k'o ka'ib' uk'ajol y xub'i'ij che jun chike: “Nuk'ajol, jat waq'ij pa chak, ma kan'an numolonik re uva.”

29»Ruk'ajol xuk'ul uwach: “Na kuaj taj” xcha'. Pero k'ate na xujalk'atij runa'oj y xe'ek pa ruchak ruqaw. 30Tek'uchiri', rachi xqib' ruk' ri jun chik uk'ajol y xub'i'ij che pacha' ri xub'i'ij che ri ratzixel.

»Ek'u rala xuk'ul uwach: “Utz ri', tat, kin'ek pa ri chak” xcha'. Yey na xe'ek ta k'u ri'.»

31Xutz'onoj k'u ri Jesús chike ri e aj wach:

—Chiwach ralaq, ¿china nawi chike wa ka'ib' alab'o e xu'an ri karaj ri kiqaw? —xcha'.

Xkib'i'ij k'u rike:

—E ri nab'e —xecha'.

Ek'u ri Jesús xub'i'ij chike:

«Paqatzij wi kamb'i'ij chiwe: E raj tz'onol puaq re tojonik#21:31 “Raj tz'onol puaq re tojonik”: Kil “cobrador de impuestos” pa vocabulario. y rixoqib' na chom ta ri kib'inik kisilab'ik, e rike ri nab'e nenare' keb'ok chupa rutaqanik ri Dios chiwach ralaq. 32Ma ri Juan Aj Ya'l Bautismo xk'un chiwach ralaq, xolu'k'utu' su'anik kajeqi' alaq chi jusuk' che ruwachulew, yey ralaq na xkoj ta alaq. No'j k'u raj tz'onol puaq re tojonik y rixoqib' na chom ta ri kib'inik kisilab'ik, rike xkikojo. Ek'u ralaq, tob' xil alaq wa', na xjalk'atij ta ri na'oj alaq cha' kakoj alaq rutzij.

Ri k'amb'al na'oj pakiwi raj chak itzel kiwachlib'al

(Mr. 12:1-12; Lc. 20:9-19)

33»Tape alaq wa jun chik k'amb'al na'oj: K'o jun achi rajaw jun ulew. Ek'u rire xu'an tiko'n re uva chwach. Xusut rij ruk' coral, xuk'ot jun luwar pa kayitz' wi ruwa'al ri uva y xuyak jun ja naj uwi' re chajib'al re. Xuya k'u kan pa tunulik chike jujun aj chakib'. Tek'uchiri', xe'ek naj.

34»Echiri' xopon ruq'ijol ri molonik, xeb'utaq lo jujun raj chakib' cha' kakitz'onoj chike raj tunulel ri taqalik kuk'ul rire che ri molonik. 35No'j raj tunulel xekichap raj chakib' eb'utaqom loq. Lik xki'an k'ax che jun chike, xkikamisaj jun chik y k'o jun chik xki'an pa'b'aj.

36»Ek'u ri rajaw xeb'utaq tanchi lo más aj chakib', yey wa' más e k'i chwa ri xeb'utaq lo nab'e. Ewi raj tunulel je tanchi la' xki'ano pacha' ri xki'an chike ri e nab'e.

37»K'isb'al k'u re, ri rajaw ri tiko'n e xutaq lo ruk'ajol kuk' raj tunulel, ma xuch'ob'o: Kakik'ul na chi utz wa nuk'ajol.

38»No'j raj tunulel echiri' xkil uwach ruk'ajol, jewa' xkib'i'ij chikiwach: “Wa' e uk'ajol ri rajaw rulew, ri ku'ana na rajaw we xkam ruqaw. Jo' je'qakamisaj cha' rulew ku'an kan qe'oj” xecha'.

39»Ewi xkichapo, xkesaj b'i chupa wa' wu'lew y xkikamisaj» xcha ri Jesús.

40Tek'uchiri', xutz'onoj chike ri e aj wach:

—Chiwach ralaq, echiri' kak'un ri rajaw rulew, ¿sa' nawi ku'an chike raj tunulel? —xcha'.

41Rike xkik'ul uwach:

—Na kukuy ta k'ana kimak. Kusach na k'u kiwach ri itzel kiwachlib'al y kuya tanchi ri rulew pa tunulik chike jujun chik aj chakib', yey rike kakiya na ri molonik che chupa ruq'ijol —xcha'.

42Tek'uchiri', xub'i'ij ri Jesús chike:

—¿Na ajilam ta neb'a ralaq ri tz'ib'ital kan chupa Ruch'a'tem ri Dios? Ma jewa' kub'i'ij:

E rab'aj k'aqital kan kuma raj yakal ja,

e ab'aj wa' lik xajawaxik cha' katiki' lo ri ja.#Is. 28:16

Wa' e ri Dios Qajawxel x'anaw re

y ri'oj lik kakam qanima' che Sal. 118:22-23

kacha'.

43Ek'u uwari'che kamb'i'ij che alaq: Kamajataj na k'u che alaq rutaqanik ri Dios y kaya'taj chike jujun chik tinamit cha' kuya ri jiq'ob'alil karaj ri Dios che rutaqanik. 44China k'u ri katzaq puwi la' la'b'aj, lik k'ax ri kuk'ulumaj; yey we rab'aj katzaq puwi junoq, ri' xa jumul kusach uwach —xcha'.

45Echiri' ri nimaq e aj chakunel pa Rocho Dios kuk' ri fariseos xkita taq ri k'amb'al na'oj xutzijoj ri Jesús, xkimaj usuk' chikij rike xb'i'x wi wa'. 46Ruma k'u ri' wa', lik xkaj kakichap ri Jesús; no'j e xkixi'ij kib' chike ri tinamit ma rike kakich'ob'o ri Jesús e jun q'alajisanel re ri Dios.

Currently Selected:

Mateo 21: acrN

Highlight

Copy