Mateo 15
15
Ri kach'ulan re ri tikawex
(Mr. 7:1-23)
1Ek'uchiri', jujun chike ri fariseos y raj k'utunel re ri tzijpixab' e petinaq Jerusalem, xeqib' ruk' ri Jesús y xkitz'onoj che:
2—¿Su'chak ri tijo'n la kakipalajij ri kik'utu'n kan ri qati'-qamam? Ma rike na kakich'aj ta ri kiq'ab' nab'e na echiri' kewa'ik —xecha'.
3Ek'u ri Jesús xutz'onoj chike:
—¿Su'chak ralaq kapalajij alaq Rutzij Upixab' ri Dios ruma e ka'an alaq taq ri kik'utu'n kan ri mam alaq? 4Ma ri Dios jewa' xtaqan che:
Chaloq'oj kiq'ij rachu-aqaw Éx. 20:12
yey
We k'o junoq keb'uyaj ruchu-uqaw ruk' itzel ch'a'tem,
ri' lik taqal che kakamisaxik Éx. 21:17
xcha ri Dios.
5»No'j ralaq kab'i'ij alaq: “Utz we junoq kub'i'ij chike ruchu-uqaw: Na utz taj kanto' alaq, ma ri to'b'al kajawax che alaq, nub'i'tisim chik re nuqasa'n chwach ri Dios.” 6Yey chiwach ralaq, china ri kab'i'n re wa', na chirajawaxik ta chi che keb'uto' ruchu-uqaw. Jek'ula' 'anom alaq che Rutzij Upixab' ri Dios pacha' na jinta uchak, ma e taqem alaq ri xa no'jib'al alaq.
7»¡Xa keb' palaj alaq! Lik k'u qatzij ri ub'i'im lo ri Dios pawi' alaq ruma ri q'alajisanel Isaías, echiri' xub'i'ij:
8Wa' wa tinamit xa ruk' ruwake' kakiyak nuq'ij,
no'j ri kanima' lik naj k'o wi chwe.
9Na jinta k'ana kutiqoj kakiloq'oj nuq'ij,
ma ri k'utunik kaki'ano xa taqanik ke achijab' Is. 29:13
—xcha'.
10Ek'uchiri', xeb'usik'ij ruk'iyal winaq y xub'i'ij chike:
—Lik tape alaq y lik maja alaq usuk' wa': 11Ri kok b'i puchi' ri tikawex na e ta ri kach'ulan re; no'j ri ch'a'tem kel lo puchi', e wa' ri kach'ulan re —xcha'.
12E taq k'u rutijo'n xeqib' ruk' y xkib'i'ij che:
—Qajawal, ¿xeta'maj la lik xpe koyowal ri fariseos echiri' xkita ri xb'i'ij la? —xecha'.
13Ri Jesús xuk'ul uwach:
—Wa' wa'chijab' na jinta runa'oj ri Dios kuk', pacha' e tiko'n na e ta tikom ruma ri Nuqaw k'o chila' chikaj; ruma k'u ri', kamich' b'i k'a pa ratz'ayaq. 14Mixok il chike, ma rike pacha' e potz' e k'amal kiwach kach e potz'. Yey we juna potz' kuk'am uwach juna chik potz', kikab'ichal k'u ri' keb'e'tzaq b'i pa siwan —xcha'.
15Ek'uchiri', ri Pedro xub'i'ij che ri Jesús:
—Q'alajisaj la chiqe sa' ke'elawi wa jun k'amb'al na'oj —xcha'.
16Xub'i'ij k'u ri Jesús chike:
—¿Ix neb'a kuk'il ri na jinta kina'oj puwi wa'? 17¿Na kimaj ta neb'a usuk'? Ma e janipa ri kok b'i puchi' ri tikawex ke'ek pa rupa y tek'uchiri', ku'pamaj b'i. 18No'j ri ch'a'tem kel lo puchi', pa ranima' kawinaqir wuloq y ek'u wa' ri kach'ulan re ri tikawex. 19Ma pa ranima' ri tikawex kel wi lo taq wa': ritzel na'oj, ri kamisanik, ri makunik chirij ri k'ulanikil, ri karetz'ab'ej uwa uq'ij ruk' jun chik na uk'ulel taj, ri eleq', ri raq'ub'al y ri itzel ch'a'tem chirij junoq. 20E taq wa' ri kach'ulan ke ri tikawex. No'j ri kawa' junoq yey na kuch'aj ta ruq'ab' nab'e, wa' na kuch'ulaj ta rub'inik junoq —xcha'.
Ri kub'ulib'al uk'u'x jun ixoq na kuk'il ta ri aj judi'ab'
(Mr. 7:24-30)
21Ri Jesús xel b'i chiri' y xopon pa taq ri luwar re Tiro y re Sidón. 22K'o k'u jun ixoq aj Canaán jeqel chiri', rire kasik'inik xk'un chwach ri Jesús, jewa' kub'i'ij:
—¡Wajawal, lal ri Ralk'o'al kan ri rey David, chinjuch' ka'n ko che'la! Ma k'o jun walit lik k'ax uk'ulumam ruma k'o puq'ab' jun itzel uxlab'ixel —xcha'.
23No'j ri Jesús na xuk'ul ta k'ana uwach. Ek'u rutijo'n xeqib' ruk' y lik xeb'elaj che ri Jesús:
—Ch'a'b'ej kan la li'xoq ma lik kasik'inik teran lo chiqij —xecha'.
24Ek'uchiri', xub'i'ij ri Jesús:
—Ri'in intaqom lo xew kuma rutinamit ri Dios e aj Israel, ri pacha' e b'exex e sachinaq —xcha'.
25No'j rixoq xqib' ruk' ri Jesús, xuxuk rib' chwach y xub'i'ij che:
—¡Wajawal, chinto'o ko la! —xcha'.
26Ri Jesús xub'i'ij che:
—Na usuk' taj we k'o junoq kumaj ri kiwa ri ralk'o'al y kuk'aq chikiwa ri tz'i' —xcha'.
27Xub'i'ij k'u rixoq:
—Qatzij, Wajawal, pero ri tz'i' kakitij ne ruk'aj ri wa katzaq chuxe' rumexa ri kajaw —xcha'.
28Ek'uchiri', xub'i'ij ri Jesús che:
—¡Ixoq, lik nim ri kub'ulib'al k'u'x la! E chu'ana uk' la sa' ri ka'aj la —xcha'. Chupa k'u ri' la joq'otaj ri ralit xkunutajik.
Ri Jesús keb'ukunaj uk'iyal yewa'ib'
29Ri Jesús xel b'i chiri' y xik'ow chuchi' ri mar re Galilea; tek'uchiri', xaq'an chwa ri juyub' y xtz'uyi'ik. 30Uk'iyal k'u winaq xeb'opon chila' pa k'o wi Rire. Yey xekik'am lo ri e sik, ri e potz', ri e me't, ri e t'um kaqan kiq'ab' y uk'iyal yewa'ib' chik. Xekiya k'u chwach ri Jesús, y Rire xeb'ukunaj konoje. 31Ek'u ri winaq lik xkam kanima' che echiri' xkilo xech'aw ri e me't, ri e t'um kaqan kiq'ab' kekunutajik, ri e sik keb'inik, ri e potz' ketzu'nik. Y xkijeq k'u kakiyak uq'ij ri Dios re Israel.
Ri Jesús keb'utzuq kajib' mil achijab'
(Mr. 8:1-10)
32Ek'uchiri', ri Jesús xeb'usik'ij rutijo'n y xub'i'ij chike:
—Lik kajuch' ka'n nuk'u'x chike wa tikawex, ma e urox q'ij wa' e k'o wuk' yey na jinta chi kiwa. Na kuaj taj keb'enutaq b'i chikocho e la' na jinta k'o kitijom, ma k'axtaj keb'e'q'ochq'ob' pa b'e —xcha'.
33Xkib'i'ij k'u rutijo'n che:
—¿Pa ke'qariqa wi wa re keb'eqatzuq wa uk'iyal tikawex? Ma chupa wa luwar na jinta ne k'o e jeqelik —xecha'.
34Ri Jesús xutz'onoj chike:
—¿Janipa chi pam k'o iwuk'? —xcha'.
Rike xkib'i'ij:
—Wuqub' pam k'o quk' y jujun raltaq ko kar —xecha'.
35Ek'uchiri', ri Jesús xtaqan che ketz'uyi' ri tikawex chu'lew. 36Xuk'am k'u ri wuqub' pam puq'ab' ruk' taq ri kar, y xtioxin chwach ri Dios puwi wa'. Tek'uchiri' xuwech' upa y xuya b'i chike rutijo'n yey rike xkijach chike ri winaq. 37Konoje xewa'ik y lik xenoj chi utz. Tek'uchiri', ruk' taq ruqax ri wa'im xkimolo, xkinojisaj wuqub' chakach. 38Ri xewa'ik e kajib' mil chi achijab' yey na xeb'ajilax tane rixoqib' y rak'alab'.
39Ek'uchiri', ri Jesús xeb'uch'a'b'ej kan ri winaq; xok b'i pa jun barco y xe'ek pa taq ri luwar re Magdala.
Currently Selected:
Mateo 15: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
