Mateo 16
16
Ri fariseos y ri saduceos kakitz'onoj milagros
(Mr. 8:11-13; Lc. 12:54-56)
1Ri fariseos y ri saduceos xeb'opon ruk' ri Jesús re kakik'am upa. Xkitz'onoj k'u che ku'an juna k'utub'al re chila' chikaj chikiwach cha' jela' kaq'alajinik we Rire taqom lo ruma ri Dios.
2Ek'u ri Jesús xuk'ul uwach:
«Echiri' ke'ek la q'ij, ralaq kab'i'ij alaq: “Lik utz ri qatiempo ma kaq ruwa kaj.” 3Echiri' anim tan, kab'i'ij alaq: “Waq'ij lik na utz ta ri qatiempo. ma kaq ruwa kaj y q'eqmuj.” ¡Ralaq xa keb' palaj alaq! Ma kariq alaq uch'ob'ik chi utz sa' ru'anom ruwa kaj, yey na kamaj tane alaq usuk' sa' taq ri katajin ri Dios che uk'utik chiwach alaq waq'ij ora. 4Ri kakitz'onoj k'utub'al re ruchuq'ab' ri Dios e ri winaq re waq'ij ora, ri itzel kik'u'x y na jusuk' ta ri kanima' chwach ri Dios. Pero na kaya'taj ta k'u wa' chike, ma xew kaya'i' chikiwach ri k'utub'al x'ani' ojertan ruk' ri q'alajisanel Jonás»#Mt. 12:39-40 xcha'. Ek'uchiri', xeb'uya kanoq y xe'ek.
Ri kik'utunik ri fariseos
(Mr. 8:14-21)
5Echiri' xeb'opon rutijo'n ch'aqa mar, xk'un chikik'u'x na xkik'am tub'i pam. 6Xub'i'ij k'u ri Jesús chike:
—Chitape': Lik chichajij iwib' chwa ri levadura ke ri fariseos y ri saduceos#16:6 Jela' pacha' ri levadura kusipowirisaj upa ri pam, jek'ula' ri kik'utunik ri fariseos y ri saduceos na jampatana kuyoj ri kina'oj ri winaq. —xcha'.
7Rutijo'n xa chikiwach xkib'i'ij: «Rire kub'i'ij wa', ma na xqak'am ta lo pam» xecha'.
8Ri Jesús xreta'maj sa' ri kakich'a'tib'ej chikiwach, xub'i'ij k'u chike:
—¡E ri'ix na nim ta k'ana ri kub'ulib'al ik'u'x wuk'! ¿Su'chak e kub'isoj ik'u'x ri na jinta pam iwuk'a'am loq? 9¿K'amaja' neb'a kimaj usuk'? ¿Na kak'un ta neb'a chik'u'x echiri' xeb'enutzuq ri wo'ob' mil chi achijab' ruk' wo'ob' pam y janipa lo chakach xinojisaj ruk' ri kiqax? 10¿Yey na kak'un ta neb'a chik'u'x echiri' xeb'enutzuq kajib' mil chi achijab' ruk' wuqub' pam y janipa lo chakach xinojisaj ruk' ri kiqax? 11¿Cha'taj na ximaj ta usuk' na e ta chwi ri pam xinch'a't wi echiri' ximb'i'ij: “Chichajij iwib' che ri levadura ke ri fariseos y ri saduceos”? —xcha'. 12K'a ek'uchiri' xkimaj usuk' na chwi ta ri levadura re ri pam xch'a't wi ri Jesús, ma e chwi ri kik'utunik ri fariseos y ri saduceos.
Ri Pedro kuq'alajisaj ri Jesús e ri Cristo
(Mr. 8:27-30; Lc. 9:18-20)
13K'o jun q'ij xeb'opon ri Jesús che taq ri luwar re ri tinamit Cesarea re Filipo,#16:13 K'o keb' tinamit Cesarea kib'i'. Wa' wa jun e ri k'o chwa ri juyub' Hermón, pa xtaqan wi ri Felipe ruk'ajol ri Herodes. y xutz'onoj k'u chike rutijo'n:
—Chikiwa ri winaq, ¿china nawi Ralaxel Chikixo'l Tikawex? —xcha'.
14Rutijo'n xkib'i'ij che:
—K'o keb'i'n re e Juan Aj Ya'l Bautismo; jujun chik kakib'i'ij e Elías; y jujun chik, e Jeremías o junoq chik chike ri q'alajisanelab' re ojertan —xecha'.
15Ek'uchiri', xub'i'ij chike rutijo'n:
—Yey chiwach ri'ix, ¿in china ri'in? —xcha'.
16Ek'u ri Simón Pedro xub'i'ij che:
—Rilal lal ri Cristo, lal Ruk'ajol ri Dios k'aslik —xcha'.
17Ri Jesús xuk'ul uwach:
—Lik nim aq'ij awalaxik ri'at Simón at uk'ajol ri Jonás; ma na e ta juna tikawex xq'alajisan wa' chawe, e ri Nuqaw k'o chila' chikaj. 18Ri'in kamb'i'ij k'u chawe: Ri'at at Pedro.#16:18 “Pedro”: Wa b'i'aj ke'elawi “ab'aj”. Y chwi k'u wa' wa'b'aj kantik wub'i ri nu iglesia, yey ruchuq'ab' ri kamik na kuch'ij tane k'ana usachik uwach ri nu iglesia. 19Y ri'in kanya paq'ab' ri'at ri lawe re rutaqanik ri Dios petinaq chila' chikaj. Ek'u janipa ri kaxim wara che ruwachulew, kaximitaj chila' chikaj; yey janipa ri kakir wara che ruwachulew, kakiritaj chila' chikaj#Mt. 18:18; Jn. 20:23 —xcha'.
20Ek'u ri Jesús xeb'utaq rutijo'n che cha' na kakitzijoj ta k'ana che junoq we Rire e ri Cristo, Rucha'o'n lo ri Dios.
Ri Jesús kach'a't puwi rukamik y ruk'astajib'al
(Mr. 8:31–9:1; Lc. 9:22-27)
21Chwi k'u ri', ri Jesús xujeq uq'alajisaxik chike rutijo'n janipa ri kuk'ulumaj: E lik chirajawaxik che ke'ek Jerusalem, kaya'i' na k'u pa k'ax kuma taq ri nimaq winaq re Israel, ri nimaq e aj chakunel pa Rocho Dios y raj k'utunel re ri tzijpixab', yey kakamisaxik; no'j churox q'ij kak'astaj loq.
22Ek'u ri Pedro xresaj b'i ri Jesús chikixo'l y xuch'a'b'ej upa, jewa' xub'i'ij che:
—¡Wajawal, lik ne muya luwar ri' ri Dios e kak'ulumaj la wa'! —xcha'.
23Ek'u ri Jesús xutzu' lo uwach ri Pedro y xub'i'ij che:
—¡Chatel chinuwach, Satanás! Ri'at at latz'anel chwe, ma na e ta kach'ob' puwi ri uch'ob'om lo ri Dios, xew e kach'ob' jela' pacha' ri kakich'ob' ri winaq —xcha'.
Ri chirajawaxik chike ri kakaj keterej chirij ri Jesús
(Mr. 8:34-35; Lc. 9:23-27)
24Ek'uchiri', xub'i'ij ri Jesús chike rutijo'n:
—We k'o junoq karaj katerej lo chwij, lik chirajawaxik che mu'an xew ri karaj rire, e chukuyu ri k'ax kape puwi' ruma ukojom ri nub'i', y tereja lo chwij. 25Ma china ri na kuya ta ranima' ruk'aslem, ri' e kujam ri chomilaj k'aslemal chwach ri Dios; no'j ri kuya ranima' ruk'aslem wuma ri'in, ri' e kuriq ri chomilaj uk'aslemal chwach ri Dios. 26Ma ¿sa' k'u kutiqoj ri' che ri tikawex we ku'an rajaw ronoje ruwachulew yey kusach k'u uwach ruk'aslemal? ¿O k'o nawi rajil kutoj rachi chwa ruk'aslemal cha' jela' na kujam taj? ¡Na jintaj!
27»Ma Ralaxel Chikixo'l Tikawex kak'un ruk' runimal yakb'al uq'ij Ruqaw y kuk' taq ru ángeles. Ek'uchiri' kuya chike chikijujunal ri tikawex, ri rajil uk'axel e chirij taq ri ki'anom. 28Paqatzij wi kamb'i'ij chiwe: E k'o jujun chike wa e k'o wara na kekam tana we na xkil tub'i Ralaxel Chikixo'l Tikawex kak'un che rutaqanik —xcha'.
Currently Selected:
Mateo 16: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
