Hebreos 8

Ri k'ak' tzij

1Ek'u ruk'u'xib'al wa kojtajin che ub'i'xikil e wa': K'o ri Jun kach'aw paqawi' chwach ri Dios, wa' e ri Qajawal, ri xtz'uyi' pa ri luwar lik k'o uwach puwikiq'ab' ri Dios, ri Nimalaj Taqanel chila' chikaj. 2Kach'aw k'u paqawi' chupa ri saqil Rocho Dios chila' chikaj; yey wa' e ri Dios Qajawxel x'anaw re, na juna achi taj.

3Konoje k'u ri kajawal raj chakunel pa Rocho Dios xekojik cha' kakiya chwach raltar ri qasa'n y rawaj kekamisaxik. Jek'ula' chirajawaxik k'o kuya ri Qajawal chwach ri Dios. 4We ta k'a k'o ri Jesús che ruwachulew, ri' na aj ta chakunel pa Rocho Dios, ma wara k'a e k'o aj chakunel kakiq'atisaj ri qasa'n chwach ri Dios pacha' ri kub'i'ij ri taqanik tz'ib'ital kan ruma ri Moisés. 5Yey ri chak kaki'an rike, xa e uk'axwach y k'utub'al re ri ka'an chila' chikaj. Ma echiri' xtaq che ri Moisés kuyak ri Rocho Dios xa kakirik, jewa' xub'i'ij ri Dios che:

Chawilape', ri wocho kayako, e cha'ana ronoje che

jela' pacha' ri xink'ut chawach chwa wa juyub' Éx. 25:40

xcha'.

6No'j wo'ora ruchak ri Qajawal más utz chwa ri kichak raj chakunel pa Rocho Dios, ma ruma Rire ri Dios xu'an jun k'ak' tzij quk' ri'oj. Yey chupa wa tzij k'o b'i'tisinik más chom chwa ri re ojertan. 7We ta ek'u la' lik tz'aqat xel ri nab'e tzij,#8:7 Wa nab'e tzij e ri xu'an ri Dios kuk' rutinamit Israel chwa ri juyub' Sinaí. ri' paqatzij wi na kajawax tane juna k'ak' tzij. 8Ma ri Dios xuya wa pixab'anik chike rutinamit, jewa' xub'i'ij:

¡Chitape'! kacha ri Dios Qajawxel.

Kopon na ri q'ij echiri' Ri'in kan'an jun k'ak' tzij

kuk' ri tinamit e aj Israel y kuk' ri tinamit e aj Judá.#8:8 Chwi lo ri taqanik re ri Salomón, xkijach kib' rutinamit ri Dios. Xeb'u'an keb'; jun kab'i'x “Israel” che y ri jun chik, “Judá”.

9Yey wa' na je ta la' pacha' ri tzij xin'an kuk' ri kichu-kiqaw ojertan

echiri' nuchapom che ri kiq'ab', xeb'enuwesaj lo Egipto.

Pero rike na xkitaqej ta ri tzij xin'an kuk';

ruma k'u ri', xeb'enuya kanoq, kacha ri Dios Qajawxel.

10K'isb'al k'u re taq la' la q'ij,

e tzij wa' kan'an kuk' ri tinamit Israel, kub'i'ij ri Dios Qajawxel:

Kankoj ri nutzijpixab' pa kijolom

y kantz'ib'aj pa kanima'.

Ek'u Ri'in kinu'an in ki Dios y rike keb'u'an e nutinamit.

11Yey na kajawax ta nenare' k'o junoq keb'upixab'aj

ri rachb'i'il y ri ratz-uchaq',

jewa' kub'i'ij chike: “Chaweta'maj uwach ri Dios Qajawxel.”

Ma chupa la' la q'ij konoje keta'am nuwach Ri'in,

chinima'q chich'uti'q.

12Kankuy k'u kimak

y na kak'un ta chi ne k'ana chinuk'u'x ri na utz taj xki'ano Jer. 31:31-34

xcha'. 13Echiri' kab'i'x “k'ak' tzij”, e ke'elawi k'o jun q'ij ri nab'e xa kik'owik, ma janipa taq ri ku'an q'e'l y na jinta chi uchak, ri' katajin usachik uwach.

Currently Selected:

Hebreos 8: acrN

Highlight

Copy