Hebreos 5

1Ri kajawal raj chakunel pa Rocho Dios cha'tal chikixo'l rachijab'. Rire kojotalik re kach'aw pakiwi ri tikawex chwach ri Dios y re kuya chwach ri Dios ri qasa'n y rawaj ekamisam pakik'axel ri tikawex ruma ri kimak. 2Ek'u rire, utz kuk'ut ri k'axna'b'al uk'u'x chike ri ketzaq pa mak tob' na u'anikil taj kemakunik, ma rire na kuch'ij tane u'anik janipa ri kub'i'ij Rutzij ri Dios. 3Ruma k'u wa', chirajawaxik che rire kuya chwach ri Dios rawaj ekamisam ruma rumak rire y na xew ta ruma ri kimak ri tinamit.#Lv. 9:7 4Na jinta k'u junoq ku'an che rib' kajawal ke raj chakunel pa Rocho Dios we na kojotal ta ruma ri Dios, jela' pacha' ri xu'an ruk' ri Aarón. 5Jek'ula' ri Cristo na xutak'ab'a' ta uwach uq'ij chirib'il rib' y na xa ta pa re xu'an Qajawal kach'aw paqawi' chwach ri Dios, ma e ri Dios jewa' xub'i'ij che:

Ri'at at Nuk'ajol yey Ri'in in Aqaw;

waq'ij k'u ri' kanq'alajisaj wa'. Sal. 2:7

6Yey je tanchi wa' xub'i'ij:

Ri'at na jinta utaqexik katk'oji'ik at waj chak,

ri katch'aw pakiwi ri tikawex chinuwach Ri'in

jela' pacha' ri Melquisedec#Gn. 14:17-20; Heb. 7:2 Sal. 110:4

xcha'.

7Ri Cristo echiri' xjeqi' wara che ruwachulew lik xu'an orar, ruk' oq'ej y ruk' sik' lik xelaj chwach ri Dios,#Mt. 26:36-46 ri k'o puq'ab' kukolob'ej chwa ri kamik; y ri Dios lik xuta re ruma ri lik uya'om rib' puq'ab'. 8Ek'u ri Cristo, tob' e Uk'ajol ri Dios, xumaj ukojik utzij ri Dios ruma ri k'axk'ob'ik xrik'owib'ej. 9Ruma k'u xutz'aqatisaj uwach ronoje ri xraj ri Dios che, xu'ana aj ya'l kolob'etajik na jinta utaqexik chike janipa ri kekojow utzij Rire. 10Ek'u ri Dios xkojow re cha' ku'an Qajawal kach'aw paqawi' jela' pacha' ri Melquisedec.

Pixab'anik chwi ri qak'iyib'al chwach ri Dios

11Lik k'o kuaj kamb'i'ij puwi wa', pero lik k'ayew uq'alajisaxik che alaq ma k'ayew che alaq kamaj alaq usuk'. 12Lik k'o tan q'ij lo ri' xtzijox ri Utzilaj Tzij che alaq; ek'u ri lik ub'e e tane e la' alaq chi aj k'utunel re wa'. Na ruk' ta k'u ri', lik ne kajawaxik kak'ut tanchi che alaq ronoje ri nab'e xmaj lo alaq puwi ri Utzilaj Tzij re ri Dios. E pacha' kajawax tanchi che alaq katij alaq tz'um ma k'amaja' kamaj alaq utijik ri kowilaj wa'im. 13Ma e junoq k'amaja' umajom usuk' ri kub'i'ij Rutzij Upixab' ri Dios puwi sa' ri usuk' y sa' ri na usuk' taj, ri' e pacha' juna ne' k'a kutij utz'um. 14Ri kowilaj wa'im xew taqal chike ri e nima'q chik; jek'ula' k'o k'utunik chupa Rutzij Upixab' ri Dios xew kemajaw usuk' ri keta'am sa' ri utz y sa' ri na utz taj chwach ri Dios yey lik kitaqem k'u u'anik ri utz.

Currently Selected:

Hebreos 5: acrN

Highlight

Copy