Hebreos 13

Pixab'anik chike rutinamit ri Dios

1Moq'otaj alaq ri k'ax kana' ib' alaq chiwach alaq, ma ralaq chaq' ib' alaq chupa rub'i' ri Cristo. 2Mik'ow chik'u'x alaq ri kek'ul alaq chi utz janipa ri keb'opon chi ocho alaq, ma e k'o ri xeb'anaw wa' y na xkina'b'ej taj e ángeles ri xekik'ulu. 3Memesk'utaj alaq ri e k'o pa cárcel, e 'ana alaq pacha' k'o alaq kuk' pa ri cárcel; yey memesk'utaj ne alaq ri e k'o pa k'ax, e 'ana alaq pacha' katij alaq k'ax junam kuk' rike.

4Lik chu'ana nim uq'ij ri k'ulanikil chiwach onoje alaq y mach'ulaj ne k'ana alaq ri tzij 'anom alaq chiwach alaq; ma konoje ri kaketz'ab'ej uwa kiq'ij kuk' jujun chik na kik'ulel taj y konoje ri kemakun chirij ri k'ulanikil, wa' kaq'at tzij pakiwi' ruma ri Dios.

5Me'ek k'u'x alaq chwi ri puaq. E ki'kota alaq ruk' ri k'o uk' alaq, ma jewa' ub'i'im ri Dios:

Na katinya ta kan k'enoq

y na kanwoq'otaj ta ato'ik Dt. 31:6-8; Jos. 1:5

xcha'. 6E uwari'che lik kaqajikib'a' uwach ri tz'ib'ital kan pa Ruch'a'tem ri Dios:

Ri Nuqaw Dios, e Rire ri kato'w we'in;

na kanxi'ij tane k'ana wib' che ri na utz taj

ku'an juna tikawex chwe Sal. 118:6

kojcha'.

7Chek'una chik'u'x alaq ri e aj k'amal wach e alaq, ri xetzijon Ruch'a'tem ri Dios che alaq. Ch'ob'o alaq raqan janipa ri utz xuk'am lo ri kib'inik kisilab'ik y e k'ama alaq re ri kub'ulib'al kik'u'x ruk' ri Cristo.

8Ri Qanimajawal Jesucristo na kajalk'atitaj taj; Rire jela' pacha' rojertan, jela' wo'ora y chiqawach apanoq. 9Mataqej k'u alaq juna k'utunik junwi y na usuk' taj. Ma e k'o ri lik keb'ok il che taq ri taqanik puwi sa' ri katijik, yey wa' na jinta k'ana kutiqoj che ri kib'inik kisilab'ik chwach ri Dios. Ek'u ri lik kuya qachuq'ab' ri'oj e ri katiki' ri qanima' chupa ri unimal rutzil uk'u'x ri Dios.

10Ri oj re ri Cristo, k'o ri altar qe'oj (wa' e rukamik ri Cristo chwa ri cruz). Ek'u ri keloq'niman pa ri Rocho Dios ruk' awaj ekamisam, na kaya'taj ta chike kakik'ul janipa ri ya'tal chiqe ri'oj ruma rukamik ri Cristo.#13:10 Pa ri ch'a'tem griego kub'i'ij “na kaya'taj ta chike kakitij re ri altar qe'oj”. 11Ri ku'an ri kajawal raj chakunel pa Rocho Dios e kukoj b'i chupa ri Luwar lik Santo ri kikik'el rawaj ekamisam ruma ri mak ke ri tinamit, yey ek'u ri kiti'jil kesax b'i chupa ri tinamit re kaporoxik. 12Jek'ula' ri Jesús xesax b'i chupa ri tinamit echiri' xkamisaxik cha' ruk' rukik'el kujosq'ij ri kanima' ri tikawex. 13Jo' k'u ri' ruk' ri Jesús, e pacha' junam ruk' Rire chojelub'i chupa ri tinamit y qak'ulu qe'oj ri k'aqb'al b'i qaq'ij jela' pacha' x'an che Rire. 14Ma wara che ruwachulew na jinta juna tinamit lik kakowinik pa utz koj-jeqi' wi; ruma k'u ri', e qoye'em ri jun qatinamit na kasach ta uwach.

15Ruma k'u la', xaqi e qaya'a chwach ri Dios ri qaqasa'n re yakb'al uq'ij ruma ri Qanimajawal Jesucristo. Qayaka k'u uq'ij rub'i' Rire, e qab'i'ij Rire e Qanimajawal. 16Lik mik'ow chik'u'x alaq xaqi e 'ana alaq ri utz y to'o ib' alaq chiwach alaq. Ma wa' e jun qasa'n lik kuk'ul uk'u'x ri Dios.

17Lik kojo alaq kitzij ri e aj k'amal wach e alaq y ya'a ib' alaq chitaqik kuma, ma chwikiq'ab' rike ya'tal wi ruchajixik ri k'aslemal alaq chwach ri Dios. Yey rike kakiq'alajisaj chwach ri Dios su'anik xki'an taq ri kichak uk' alaq. Lik chirajawaxik k'u ri' kaya ib' alaq chitaqik kuma cha' jela' rike utz kaki'an ri kichak ruk' ki'kotemal y na ruk' ta b'is ruma ri ku'an alaq alk'ayew chike; ma we e ri', na jinta kutiqoj ri kichak uk' alaq.

18Lik 'ana k'u alaq orar paqawi'. Ri'oj lik kaqana' chiqak'u'x utz ri qa'anom, y ruk' k'u ri qab'inik qasilab'ik kaqaj kaqa'an chi utz ronoje. 19Yey kantz'onoj ko che alaq, e 'ana alaq orar panuwi' cha' kaya'taj tanchi chwe ri'in kinopon tan uk' alaq.

K'isb'al ch'a'tem chike taq riglesias

20Ri Dios, ri aj ya'l utzil chomal, xuk'astajisaj lo ri Qanimajawal Jesucristo chikixo'l ri ekaminaq. Y ri Cristo e ri Nimalaj Aj Chajinel ke rutinamit ri Dios; yey ruk' rukik'el Rire, xujikib'a' uwach ri k'ak' tzij na jinta utaqexik. 21Kantz'onoj k'u ri' che ri Dios, chuto'o alaq cha' ka'an alaq ri utz y jela' ka'an k'u alaq janipa ri karaj Rire. Chu'ana k'u Rire uk' alaq ruma ri Qanimajawal Jesucristo janipa ri rajawal uk'u'x Rire. Che Rire taqal wi ri yakb'al uq'ij waq'ij ora y na jinta chi utaqexik chiqawach apanoq. Amén.

22Yey kantz'onoj che alaq hermanos, lik ya'a ib' alaq che umajik usuk' wa' wa keb' oxib' pixab'anik xintz'ib'aj pan che alaq y k'ulu alaq chi utz.

23Kuaj keta'maj alaq e ri qa hermano Timoteo elinaq chi lo pa cárcel, yey we xk'un tan loq, kank'am b'i wuk' echiri' ki'nwila alaq.

24Ya'a alaq rutzil kiwach konoje ri e aj k'amal wach e alaq kuk' konoje rutinamit ri Dios. Ri e aj Italia kakiya pan rutzil wach alaq. 25K'ulu k'u onoje alaq ri unimal rutzil uk'u'x ri Dios. Amén.

Currently Selected:

Hebreos 13: acrN

Highlight

Copy