Jakari 2
2
Némḭdi gə́ njekɔm’g joo gə́ wɔji dɔ gaji da gə́ sɔ lé
1Ma m’un kəm gə́ tar ndá aa oo, ma m’oo gaji daje sɔ. 2Ma m’dəji kura gə́ dara gə́ njekwɔji səm ta lé m’pana: Gaji daje neelé see wɔji dɔ ɗi wa.
Ndá yeḛ ulam pana: Dee to gaji daje gə́ sané ne Judaje gə Israɛlje gə njé gə́ Jerusalem lé.
3Njesigənea̰ am m’oo njékɔrje sɔ. 4M’dəjee m’pana: See dee ree gə mba ra ɗi wa.
Ndá yeḛ ilam keneŋ pana: Dee to gaji daje gə́ sané ne Judaje saar d’ar dəw kára kara ɔr dəa tar el lé. Njékɔrje neelé ree mba kɔm ɓəl dɔ dee’g ləm, gə mba təd gaji ginkoji dəwje gə raŋg gə́ rɔ ne gə Judaje gə gaji dee ləm, gə mba sané ne dəwje gə́ mee ɓee’g lé kad-kad ləm tɔ.
Némḭdi gə́ njekɔm’g munda gə́ wɔji dɔ kúla-kwɔji-né lé
5M’un kəm gə́ tar m’aa loo gərərə ndá aa oo, dəw kára aar gə kúla-kwɔji-né jia’g. 6Ma m’dəjee m’pana: See aw gə́ ra wa.
Ndá yeḛ ilam keneŋ pana: M’a gə kaw kwɔji Jerusalem gə mba koo tadee ləm, gə ŋgalee ləm tɔ.
7Aa oo, kura gə́ dara gə́ njekwɔji səm ta lé aw lam gə́ kédé ndá kura gə́ dara gə́ raŋg ree iŋgá. 8Yeḛ ulá pana: Aḭ aw ula basa neelé pana: Jerusalem lé a to ɓee-boo gə́ to raga ndəgsə lal ndògo-bɔrɔ gə mbata dəwje gə́ bula digi-digi gə́ d’isi keneŋ ləm, gə nékulje gə́ dum tura gə́ d’a kaar keneŋ ləm tɔ. 9Njesigənea̰ pa pana: Ma nja m’a to asəna gə ndògo lə pər gə́ gugu dəa sub ləm, m’a riba dɔ rɔnduba ləm keneŋ ləm tɔ.
10Njesigənea̰ pana:
Seḭ gə́ ma m’sané sí dɔkum looje gə́ sɔ lé
Maji kar sí ḭje ɓee gə́ dɔgel aḭje.
Njesigənea̰ pa bèe.
11Seḭ njé gə́ Sio̰,
Seḭ gə́ síje ɓee-ɓər gə́ Babilɔn lé
Maji kar sí aḭje ajije rɔ sí.
12Mbata Njesigənea̰ gə́ njeboo-néje pa togə́bè pana: Goo néje gə́ neelé ɓa rɔnduba a ree ɓəi. Yeḛ ulam rɔ ginkoji dəwje gə́ njékṵda sí banrɔje lé:
Mbata nana ɓa gə́ ɔrɔ rɔ sí ndá
Ɔrɔ rɔ ŋgonkəm neḛ-neḛ nja.
13Aa ooje, neḛ n’tɔji dee ji neḛ
Ndá deḛ d’a tel to nékunda-ba̰rɔ lə ɓərje lə dee gə́ ra kula d’ar dee kédé lé.
Bèe ɓa seḭ a gərje ne gao to gə́ Njesigənea̰ gə́ njeboo-néje ɓa ulam ya.
14Maji kar sí raje né wəl gə boo-rɔkal
Alje ne rɔ sí,
Seḭ gə́ síje Jerusalem lé
Mbata aa ooje,
M’isi m’ree ndá m’a si mbuna sí’g,
Njesigənea̰ ɓa pa bèe.
15Mee ndəa’g neelé ginkoji dəwje gə raŋg bula
D’a ree kɔm gə Njesigənea̰ na̰’d
Ndá d’a tel to dəwje ləm,
Ndá m’a si mbuna sí’g,
Bèe ɓa seḭ a gərje gao to gə́ Njesigənea̰ gə́ njeboo-néje ɓa ulam rɔ sí’g ya.
16Njesigənea̰ a kiŋga Judaje
Kar dee to nékea̰je
Dɔ naŋg’d gə́ to gə kəmee,
Tɔɓəi yeḛ a kɔr Jerusalem kundá gə kəmee ya ɓəi tɔ.
17Maji kar dəw-kundaje lai d’isi ta dee mundu no̰ Njesigənea̰’g.
Mbata yeḛ unda loo mee loo-siée’d gə́ to gə kəmee teḛ ya.
Currently Selected:
Jakari 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
