Titə 3
3
Néra majikojije lé
1Tel ula dee mba kar dee d’oso kul no̰ dəw-dɔ-looje gə njéko̰ɓeeje’g ləm, kar dee d’ila ŋgonkoji dɔ dee’g ləma, kar dee d’wa dɔ gɔl rɔ dee dɔ kula raje gə́ maji gə́ rara kara ləm tɔ. 2D’a kɔs dɔ dəw gə́ ta el ləm, d’a saŋg rəw mba kɔm dəwje na̰’d ləm, d’a kaw yururu ləma, d’a kula dɔ dee no̰ dəwje’g lai ləm tɔ. 3Mbata kédé lé jeḛ kara jeḛ n’to mbəje ləm, gə njékaltaje ləma, gə njḛ́dəmje ləm tɔ. Jeḛ n’to ɓərje lə mal néje gə́ ɓəd-ɓəd gə kaiyaje ɓəd-ɓəd ləm, néra gə́ yèr gə kəmkəḭ ɓa j’isi danee’g ləm, mar síje d’wa sí gə meḛ dee ləma, jeḛ kara j’wa dee gə meḛ sí ləm tɔ. 4Nɛ loo gə́ meemaji gə meenoji lə Ala njekaji sí mbata lə dəwje kila rəa gə́ raga 5ndá yeḛ aji sí ya, meekɔrjol ləa lé gə batɛm gə́ yeḛ sugu sí ne ɓa yeḛ oji sí ne sigi gə goo siŋgamoŋ lə Ndilmeenda 6gə́ yeḛ aree taa ne meḛ sí yal-yal gin Jeju Kristi njekaji sí’g ɓó to kula ra sí gə́ maji ɓa el, 7mba kar mbɔl dɔ noji ləa gə́ yeḛ ɔr ne ta dɔ sí’g lé jeḛ n’tel to ne njékwa səa nédɔjije lé na̰’d j’iŋga ne kəmə gə́ gə no̰ gə́ j’unda ne meḛ sí yel dɔ’g lé. 8Ta neelé to kankəmta ya.
Ma m’ndigi kari ula dee taree rədədə ya mba kar deḛ gə́ d’ɔm meḛ dee dɔ Ala’g lé néraje gə́ maji ɓa d’a kwəi keneŋ ɗigi-ɗigi. Yee ɓa to né gə́ maji ləm, to gə́ gel né gə́ a la gə dəwje lai ləm tɔ. 9Nɛ ta dəji mbə gə́ dəji ləm, gə ta gə́ wɔji dɔ ginka dəwje ləm, gə takɔl ləma, gə tamaḭ gə́ wɔji dɔ godndu lé ləm tɔ, ɔs dee rəw, mbata dee to gə́ taje gə́ to gə́ né el ləm, to gə mḭdé ba ləm tɔ. 10Dəw gə́ njekula dəwje na̰’d lé ndəjee gɔl karaje joo jén ndá ɔsee rəw rɔi’g gə́ gogo, 11mbata i gər gao, dəw gə́ togə́bè lé to dəw gə́ ndəm rəw ləm, ta kaiya gə́ yeḛ ra lé nja tegginee ɔm dəa’g ləm tɔ.
Rudu taje
12Loo gə́ m’a kula Artemas əsé Tisik gə́ rɔi’g ndá maji kari ɔs rɔi ɓad ree iŋgam Nikopolis. Mbata ma m’wɔji mba si keneŋ naḭ kuli lé. 13Maji kar məəi to dɔ Jénas, njeteggin godndu deḛ gə Apolɔs mba kari la sə dee loo gə́ d’a gə kḭ mba kaw raŋg mba kar né kára kara lal dee el. 14Maji kar njé’g lə sí kara ndoo kula noji mba kar mar deeje d’iŋga ne né gə́ d’aw ndée taajina̰’d nee ya, ɓó mba kar dɔ kó noji lə dee udu el tɔ.
15Deḛ lai gə́ d’isi səm lé rai lapia. Ra gar síje gə́ d’unda sí dan kəm dee gin meekun’g lé lapia ar sí.
Maji kar sí-seḭ lai sije dan noji’g bèdèg.
Currently Selected:
Titə 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
