Mark 2

Jeju aji dəw gə́ dəb rəa wəi wɔ

Mat 9.1-8, Lug 5.17-26

1Ndɔje dəs bula lam ndá Jeju tel aw Kapernawum. D’oo to gə́ yeḛ si mee kəi’g 2ndá boo-dəwje gə́ bula digi-digi d’wa dɔ na̰ gir-gir ar loo gə́ takəi’g na dee tas. Yeḛ un kudu kula dee ta. 3Yen ɓa diŋgamje sɔ d’un dəw gə́ dəb rəa wəi wɔ ree səa rəa’g. 4Nɛ d’oo kəm loo mba kandə kaw ne səa rɔ Jeju’g el mbata dəwje rusu loo tub-tub. Togə́bè ɓa deḛ d’al tar dɔ kəi’g, d’ɔr kəm loo gə́ wɔji dɔ loo gə́ Jeju si keneŋ lé. Loo gə́ deḛ woḭ kəm loo mba̰ ndá deḛ d’unee gə tira ləa gə́ yeḛ to keneŋ lé bura risi səa naŋg rɔ Jeju’g tɔ. 5Loo gə́ Jeju oo meekun lə dee al dɔ loo sula ndá yeḛ ula njerɔko̰ lé pana: Ŋgonəm, kaiya ləi ɔr dɔi’g mba̰.

6Njéndaji-maktubje gə́ na̰je d’isi keneŋ ndá deḛ d’ə̰ji ta meḛ dee’g pana: 7See gə mba ri ɓa dəw neelé pa bèe gə mbəa wa. Yeḛ ila ndɔl dɔ loo’g. See na̰ ɓa askəm kɔr kaiya dɔ dəw’g wa. See Ala nja kára ba ɓa askəm ra togə́bè el wa. 8Léegəneeya ta gə́ deḛ d’isi pa meḛ dee’g lé Jeju gər mée’g gao ndá yeḛ ila dee keneŋ pana: See ban ɓa seḭ ə̰jije taje gə́ togə́bè meḛ sí’g wa. 9See ta gə́ ra ɓa gə́ ta gə́ kəm pa kula dəw gə́ dəb rəa wəi wɔ lé ɓəi wa. See kəm pa: Kaiya ɔr dɔi’g əsé ḭta un tira ləi ɔd aw lé ɓa kəm pa ɓəi wa. 10Nɛ ma m’ndigi kar sí gərje gao to gə́ Ŋgon-dəw lé askəm kɔr kaiya dɔ dəwje gə́ dɔ naŋg nee ya. 11Yen ɓa yeḛ tel təa ula dəw gə́ dəb rəa wəi wɔ lé pana: Ma nja m’un ndum m’ari, ḭta ɓó gə un tira tooi ɔd aw ne kəi ləi.

12Léegəneeya dəw neelé ḭta un nétée ɔd aw ne raga kəm dee’g təsərə ndá kaar dee wa dee paḭ ar dee tel pidi Ala pana: Jeḛ j’ooje né gə́ togə́bè kédé gɔl kára nda̰ el ɓəi.

Jeju ɓar Ləbi

Mat 9.9-13, Lug 5.27-32

13Jeju tel aw ta koŋgo baa-boo’g ya tɔɓəi. Boo-dəwje d’ḭ kəmlə-kəmlə d’aw rəa’g ndá yeḛ ndoo dee ta. 14Ləbi, ŋgon Alpe si loo taa lar-gədɓee’g ndá Jeju ulá pana: Un rəw goom’g.

Ləbi ḭ un rəw gée’g tɔ.

15Loo gə́ Jeju si ta ka-nésɔ’g mee kəi’g lə Ləbi ndá njétaa lar-gədɓeeje gə kaiya-dəwje d’isi səa na̰’d ta ka-nésɔ’g gə njékwakiláje to mbata deḛ bula ndolè gée. 16Njéndaji-maktubje gə Parisiḛje d’oo to gə́ Jeju si ta nésɔ’g gə njétaa lar-gədɓeeje gə kaiya-dəwje ndá deḛ dəji njékwakiláje pana: See ban ɓa yeḛ o̰ gə ai gə njétaa lar-gədɓeeje gə njékaiyaje wa.

17Loo gə́ Jeju oo taree ndá yeḛ ila dee keneŋ pana: Dəwje gə́ to njérɔko̰je ɓa meḛ dee a ndiŋga njekuma̰ ɓó dəwje gə́ rɔ dee to kɔgərɔ ɓəi lé ndá d’a ndiŋga njekuma̰ el tɔ. Ma lé m’ree gə mba ɓar njémeekarabasurje ɓa el, nɛ m’ree gə mba ɓar kaiya-dəwje ɓa.

Ta dəji gə́ wɔji dɔ kɔg-mee-ɓoo

Mat 9.14-17, Lug 5.33-39

18Ndɔ kára bèe njékwakila Ja̰je gə ka̰ Parisiḛje d’ɔg meḛ dee ɓoo. Yen ɓa deḛ ree rɔ Jeju’g dəjee pana: See gelee ban ɓa njékwakila Ja̰je gə Parisiḛje d’ɔg meḛ dee ɓoo ŋga njé’g ləi lé see d’ɔg meḛ dee ɓoo el gə mba ɗi wa.

19Jeju ila dee keneŋ pana: See loo gə́ njedené-sigi nja si gə kuramareeje na̰’d ɓəi lé see d’a kun kəm dee rəw dɔ nésɔ’g wa. Wah! d’a kun kəm dee rəw dɔ’g el mbata yeḛ nja si sə dee na̰’d ɓəi. 20Ndɔ gə́ d’a kɔr njedené-sigi mbuna dee’g kigi səa ndá ndəa neelé ɓa gə́ ndɔ gə́ d’a gə kɔg meḛ dee ɓoo keneŋ ɓəi tɔ.

21Dəw kára kara a kun mbida ta kubu gə́ sigi kɔr ne kəm ŋgisi kubu el, mbata yee gə́ sigi neelé siŋga a kur dɔ nje gə́ ləw gə́ neelé ndá a kunda bərəŋ-bərəŋ til karee dum nje gə́ kédé ŋga. 22Dəw kára kara a kɔm mán-nduú gə́ sigi mee ɓɔl-ndar gə́ ləw’g el mbata loo gə́ mán-nduú neelé a kḭ njem-njem ndá a kar ɓɔl-ndar gə́ ləw lé inja uguju kar mán-nduú lé ən naŋg səd ləm, ɓɔl-ndar kara a tuji ləm tɔ. Bèe ndá maji kar dee d’ɔm mán-nduú gə́ sigi mee ɓɔl-ndar gə́ sigi.

Ta gə́ wɔji dɔ ndɔ-kwa-rɔ lé

Mat 12.1-8, Lug 6.1-5

23Ndɔ kára bèe gə́ to ndɔ-kwa-rɔ lé Jeju tal mee ndɔ’g ndá njékwakiláje riba barkəm kó rii gə ji dee d’usɔ#TtG 23.26. 24Parisiḛje d’oo bèe ndá d’ulá pana: Aa loo oo, see ban ɓa deḛ ra né gə́ d’ɔg dee dɔ’g gə ndɔ-kwa-rɔ lé wa.

25Jeju tel ila dee keneŋ pana: See seḭ turaje maktub sorta néraje lə Dabid ooje el nja ɓəi wa. To ndɔ gə́ Abiatar to ne ŋgɔ-njekinjanéməs lé ndá Dabid gə deḛ gə́ d’aw səa lé lab ɔr dee#1Sam 21.2-7. 26Yen ɓa d’andə mee kəi-Ala’g ndá muru gə́ d’unda gə kəmee doi d’wɔji ne dɔ njékinjanéməsje ya gə kar dee ba lé Dabid aw un o̰ ɓa ya̰ ar deḛ gə́ d’aw səa lé kara d’o̰ tɔ#Ləb 24.9.

27Tɔɓəi Jeju ula dee pana: D’unda ndɔ-kwa-rɔ mbata lə dəw ɓó d’unda dəw mbata lə ndɔ-kwa-rɔ ɓa el. 28Gelee gə́ nee ɓa Ŋgon-dəw lé to mbai dɔ ndɔ-kwa-rɔ lé tɔ.

Currently Selected:

Mark 2: SBA2015

Highlight

Copy