Mark 14
14
Mbai dɔ njékinjanéməsje-je d’ɔm na̰’d téréré mba kar Jeju udu
Mat 26.1-5, Lug 22.1-2, Ja̰ 11.45-53
1Nai ndɔ joo mba kar dee ra naḭ Pag gə́ muru gə́ nétiee godo keneŋ lé. Mbai dɔ njékinjanéməsje-je gə njéndaji-maktubje saŋg goso né gə mba kwa ne Jeju ɓó gə karee wəi ne . 2Mbata deḛ pana: Maji ra bèe ndɔ naḭ’g el, nà banelə boo-dəwje d’a kḭ ra né dɔ neḛje’g wəl-wəl.
Dené tər ubu dɔ Jeju’g
Mat 26.6-13, Ja̰ 12.1-8
3Loo gə́ Jeju si Betani kəi lə Simo̰ gə́ njeba̰ji lé d’isi ta ka-nésɔ’g d’isi d’usɔ né ndá dené kára bèe andə aw dɔ dee’g kəi ta ka-nésɔ’g lé. Yeḛ wa ŋgoro-ubu gə́ ra gə jər gə́ ria lə albatrə lé jia’g, ubu gə́ ə̰də sululu gə́ gadee al dɔ loo to keneŋ, yeḛ wa ta ŋgoro lé pəgədə təd, tər ubu lé dɔ Jeju’g . 4Njé gə́ na̰je lé meḛ dee ḭ sə dee pu dəa’g ar dee jém ta pana: See yeḛ ɔm ubu gə́ ə̰də sululu neelé kɔ bèe gə mba ra ne ban ŋga nee wa. 5Ɓó lé ndogo gə́ ndogo ndá laree a kaḭ ŋgan larnda tɔl munda jén gə mba kar njéndooje.
Meḛ dee ḭ sə dee pu dəa’g ya. 6Nɛ Jeju ila dee keneŋ pana: Yá̰je areeje aar. See gelee ban ɓa seḭ aarje ne səa gad-gad bèe wa. Né gə́ maji ɓa yeḛ ra səm ya, 7mbata njéndooje lé d’isi sə sí gə ndɔ dee ndɔ dee ya, ɓó lé seḭ ndigi raje sə dee meemaji ndá seḭ a raje sə dee ya tɔ, nɛ ma lé m’a gə si sə sí gə ndɔm-ndɔm el . 8Né gə́ yeḛ askəm ra ɓa yeḛ ra ya, yeḛ ndəm ubu dɔm’g kédé ɓa gə mba kar dee dubum ɓəi. 9Ma m’ula sí təsərə, loo gə́ rara gə́ dɔ naŋg nee gə́ d’a gə kila mber tagə́maji lé keneŋ ndá d’a kɔr sor dené neelé mba kar meḛ dee olé ne dɔ né gə́ yeḛ ra’g lé ya tɔ.
Judas saŋg loo kula Jeju ji dee’g
Mat 26.14-16, Lug 22.3-6
10Judas Iskariot, yeḛ gə́ njekɔm dee’g dɔg-gir-dee-joo lé aw rɔ mbai dɔ njékinjanéməsje-je’g gə mba kula Jeju ji dee’g. 11Loo gə́ deḛ d’oo bèe ndá deḛ ra rɔlel d’un ndu dee gə mba karee lar ya. Ndá Judas saŋg loo gə́ kəm kula ne Jeju ji dee’g.
Jeju gə njékwakiláje d’o̰ muru na̰’d ndɔ Pag’g
Mat 26.17-25, Lug 22.7-14,21-23, Ja̰ 13.21-30
12Ndɔ gə́ dɔtar gə́ d’o̰ muru gə́ nétiee godo keneŋ lé to ndɔ gə́ d’a gə tɔl badə Pag lé keneŋ ndá njékwakila Jejuje dəjee pana: See loo gə́ ra ɓa i ndigi kar sí j’aw j’wa dɔ gɔl néra Pag keneŋ j’ari wa.
13Yen ŋga, yeḛ ɔr njékwakiláje joo ula dee pana: Ɔd awje mee ɓee-boo’g, seḭ a kiŋgaje diŋgam gə́ odo kulum mán ndá awje gée’g. 14Kəi gə́ yeḛ andə aw keneŋ lé ndá maji kar sí dəjije njekəi lé pajena: Mbai pana: See loo gə́ ra ɓa neḛ gə njekwakila neḛje n’a sɔje né Pag keneŋ wa. 15Ndá yeḛ a tɔji sí kəi gə́ boi gə́ dɔ maree’g tar, gə néje lai to keneŋ jəb-jəb mba̰. Lée neelé ɓa seḭ a kwaje dɔ gɔl né gə mba kar sí n’raje ne Pag keneŋ ya.
16Njékwakiláje lé d’ɔd d’aw teḛ mee ɓee’g ndá d’iŋga néje to gə́ yeḛ ula dee lé ndá d’wa dɔ gɔl néra Pag lé keneŋ.
17Kàr uru naŋg mba̰ ndá yeḛ ree keneŋ gə deḛ gə́ dɔg-gir-dee-joo lé ŋga. 18Loo gə́ d’isi ta ka-nésɔ’g d’isi d’usɔ lé ndá Jeju ula dee pana: Ma m’ula sí təsərə, dəw kára mbuna sí’g gə́ sɔ səm né lé a gə kun dɔm .
19Deḛ d’un kudu kwa ndòo rɔ dee, d’un ta dəjee kára-kára lai pana: See’d ma əsé nawa.
20Yeḛ tel ila dee keneŋ pana: Yeḛ gə́ kára gə́ mbuna sí-seḭ gə́ dɔg-gir-sí-joo gə́ a gə kula jia mee ka-nésɔ’g səm na̰’d lé nja. 21Ŋgon-dəw lé kɔd kuru kaw to gə́ ndaŋg taree wɔji ne dəa. Nɛ meeko̰ a nai dɔ dəw gə́ njekun dɔ Ŋgon-dəw’g lé. Débee neelé d’ojee el kara maji tɔ.
D’ɔm na̰ sad dɔ muru’g lə Mbaidɔmbaije
Mat 26.26-30, Lug 22.15-20, 1Kɔr 11.23-25
22Loo gə́ d’isi d’usɔ né mba̰ Jeju un pil muru kára ra ne Ala oiyo ɓa wa gaji dana ar dee pana: Taaje, yeḛ gə́ neelé to gə́ darɔm ya.
23Tɔɓəi yeḛ un ŋgo-kai-né gə́ mán-nduú to keneŋ ra ne Ala oiyo ɓa ula ar dee ɓəi ndá deḛ lai d’ai. 24Yeḛ ula dee pana: Yee neelé to gə́ məsm, yee ɓa to məs manrɔ gə́ ula dɔ naŋg nee mbata lə dəwje bula . 25Ma m’ula sí təsərə, m’a kai sə sí nduú gə́ togə́bè lé gogo pai el saar njena m’a kai sə sí nje gə́ sigi mee ɓeeko̰’g lə Ala lé.
26Loo gə́ d’ɔs pa mba̰ ndá deḛ d’ḭ d’aw dɔ mbal gə́ ria lə Koiyoje.
Jeju pata maḭ gə́ Piɛrə a gə maḭta gəree lé
Mat 26.31-35, Lug 22.31-34, Ja̰ 13.36-38
27Jeju ula dee pana: Seḭje lé seḭ a kubamje kya̰’mje lai ya to gə́ deḛ ndaŋg mee maktub’g pana: M’a kunda njekulbadje ndá badje lai d’a kaḭ sanéna̰ kad-kad . 28Nɛ loo gə́ m’a kunda loo teḛ dan njé gə́ d’wəi’g mba̰ ndá m’a kaw no̰ sí’g Galile .
29Piɛrə ilá keneŋ pana: Lée dəwje lai d’a kubai kya̰’i kara ma ɓa yḛ̀ m’a kubai kya̰’i pai godo.
30Yen ɓa Jeju tel ilá keneŋ pana: Ma m’ulai təsərə, mee til’g neelé ya kona a no̰ ndia joo el ŋga ndá i a maḭ dɔ rɔi dɔm’g gɔl munda.
31Nɛ Piɛrə tel pa kədərə unda nje gə́ kédé pana: Lé gə́ kwəi nja kara m’a kwəi səi na̰’d ya, ɓó m’a maḭ dɔ rɔm dɔi’g el.
Deḛ lai pa togə́bè gə́ gée’g ya tɔ.
Jeju ra tamaji loo gə́ Gesemane
Mat 26.36-46, Lug 22.39-46
32Deḛ d’ɔd keneŋ d’aw loo gə́ kára bèe gə́ deḛ ɓaree Gesemane. Jeju ula njékwakiláje pana: sije loo gə́ nee’g loo gə́ m’a gə kaw ra tamaji.
33Yeḛ ɔr Piɛrə gə Jak gə Ja̰ njɔl aw sə dee ndá meeko̰ un kudu kḭ səa jugugu ləm, mée tɔsee gə no̰ mbigi-mbigi ləm tɔ. 34Yeḛ ula dee pana: Meem ḭ səm jugugu al dɔm sula saar a kas yoom, maji kar sí sije dɔkəji sí’g kəgəgə loo gə́ nee.
35Tɔɓəi yeḛ ɔd aw gə kuree rəgəsə ndá yeḛ oso naŋg bəbərə dəb kəmee naŋg ra tamaji mba kar ɓó lé to kəm ra ndá kar kàr né gə́ a gə teḛ dəa’g lé sa rəa rəw gə́ raŋg. 36Jeju pana: Aba, Bɔm, né gə́ njedumi godo. Maji kari ɔs ŋgo-kai némeeko̰ neelé rɔm’g rəw gə́ raŋg. Lé riri kara né gə́ məəi wɔji ɓa m’a ra ɓó m’a ra né gə́ məəm ma ɓa wɔji el.
37Yeḛ rəm ree rɔ njékwakiláje’g ndá iŋga dee dɔ ɓi’g. Yeḛ ula Piɛrə pana: Simo̰, see i lé aw toɓi gə́ to ɓa nee wa! See i askəm si kəmba dɔkur-kàr kára el wa! 38Sije dɔ kəji sí’g kəgəgə raje tamaji mba kar sí osoje ne dan nékərje’g el. Meḛ sí to kəmba ya nɛ darɔ sí ɓa wəi wɔ-wɔ.
39Yeḛ sa rəa aw ra tamaji to gə́ kédé lé ɓəi. 40Yeḛ ɔs tel ree iŋga dee dɔ ɓi’g ya tɔɓəi, mbata ɓi uba kəm dee’g bo̰-bo̰. Deḛ d’oo ta gə mba kilá keneŋ el.
41Yeḛ ɔs tel ree rɔ dee’g ɔm’g gɔl munda ndá ula dee pana: As ŋga! Tojeɓi ɓasinè aw waje ne rɔ sí. Aa ooje, kàr kula Ŋgon-dəw ji njékaiyaje’g lé teḛ mba̰. 42Ubaje naŋg ḭje tar ar sí j’awje. Aa ooje, yeḛ gə́ a gə kulam ji dee’g lé si aw gə́ nee dəb ŋga.
Kwa gə́ d’wa Jeju lé
Mat 26.47-56, Lug 22.47-53, Ja̰ 18.3-12
43Léegəneeya, loo gə́ ta nai gə́ təa’g ɓəi ndá Judas gə́ njekɔm dee’g dɔg-gir-dee-joo lé tɔ gə boo-dəwje dəa’g pɔs-pɔs gə nékadje gə ɗuguru-kagje ji dee’g kel-kel, mbai dɔ njékinjanéməsje-je gə njéndaji-maktubje gə ŋgatɔgje lə dee ɓa d’ula dee. 44Yeḛ gə́ njekun dəa lé tɔji dee nda né gə́ d’a gə gəree ne ula dee pana: Yeḛ gə́ m’a gə kil ɓɔlee njɔd-njɔd ndá to yeḛ nja kən-ə, ubáje wáje kègègè awje səa né lə sí. 45Loo gə́ Judas teḛ keneŋ ndá yeḛ rəm pər gə́ rɔ Jeju’g ulá pana: Mbai!
Ɓa yeḛ ɔd il ɓɔlee ɓəi. 46Yen ŋga dəwje neelé d’ɔd d’ur dɔ Jeju’g d’ubá d’wá ya tɔ. 47Dəw kára mbuna deḛ gə́ d’aar keneŋ lé wa kiambas lə haar ɔr, tuga ne mbi kura lə ŋgɔ-njekinjanéməs lé lɔd ɔr. 48Jeju un ta ula dee pana: Seḭ reeje gə nékadje gə ɗuguru-kagje ji sí’g kel-kel gə mba kwamje ne asəna gə gayim-ɓogo bèe. 49M’isi sə sí gə ndɔm-ndɔm m’ndoo sí né mee kəi-Ala’g nɛ seḭ wamje gə ji sí peb ndɔ kára bèe el. Yee gə́ nee ɓa to mba kar ta gə́ to mee maktub gə́ to gə kəmee lé aw ne lée’g béréré ya .
50Yen ŋga deḛ lai d’ubá d’yá̰ buŋga na̰ d’aḭ.
51Basa kára un rəw gée’g nɛ yeḛ tɔ kubu gə́ bərərə ya kára ba rəa’g. Deḛ d’al d’ubá d’wá, 52nɛ yeḛ sɔd rəa teḛ ya̰ kubu ləa lé ji dee’g teḛ aḭ kudee dum ba aw.
Jeju aar no̰ njégaŋ-rəwtaje’g
53Deḛ ndɔr Jeju d’aw səa kəi lə ŋgɔ-njekinjanéməs, loo gə́ mbai dɔ njékinjanéməsje-je ləm, gə njé gə́ tɔgje ləma, gə njéndaji-maktubje ləm tɔ mbo̰ dɔ na̰ keneŋ. 54Piɛrə dan gée jan-jan saar uru səa gadloo’g lə ŋgɔ-njekinjanéməs. Yeḛ si gə kuraje ta pər’d si ndibi pər.
55Mbai dɔ njékinjanéməsje-je gə njégaŋ-rəwtaje lə Jibje saŋg ta mba kila dɔ Jeju’g gə mba karee udu ne, nɛ d’iŋga ta kára kara el. 56Mbata njé gə́ na̰je d’ḭ gaŋg taŋgɔm badə-badə d’ɔm dəa’g nɛ ta lə dee ɔm dee’g el. 57Njé na̰je d’uba naŋg d’ḭ tar gaŋg taŋgɔm d’unda təa’g pana:
58Jeḛ j’oo ta təa’g pana: Neḛ n’a tuji kəi-Ala nee gə́ dəwje ra gə ji dee ndá ndɔ neḛ munda ba ya n’a kunda maree gə́ raŋg gə́ ji dəw ɓa a ra el toree’g .
59Nɛ ta gə́ d’ɔr neelé kara ɔm dee’g el nja dɔrɔ ɓəi.
60Yen ŋga ŋgɔ-njekinjanéməs uba naŋg ḭta kəm deḛ gə́ d’wa dɔ na̰’g neelé dəji Jeju pana: See i a teḛ tai kila sí ta’g el nja saar wa. See ɗi ɓa dəwje neelé d’ɔm ne ta dɔi’g bèe ɓəi wa.
61Jeju ila təa maree’g ndaŋg si, ar təa teḛ ja̰ el. Ŋgɔ-njekinjanéməs tel dəjee tɔɓəi pana: See i to Kristi, Ŋgon-Ala gə́ kəm pidee lé wa.
62Jeju ilá keneŋ pana: Ma m’to yeḛ nja m’isi’n. Ndá seḭ a kooje Ŋgon-dəw gə́ si dɔ jikɔl siŋgamoŋ lə Ala lé ləm, seḭ a kooje loo kḭ gə́ yeḛ a kḭ dara teḛ dan loo-kil’g lə ndi lé ləm tɔ .
63Yen ŋga ŋgɔ-njekinjanéməs lé wa kubu gə́ rəa’g hao̰-hao̰ til ula dee pana: See ɗi tɔɓəi ɓa j’a dəji ne njékɔrgootareeje gə́ raŋg gə mbəa tɔɓəi wa. 64Seḭ ooje ta ndɔl gə́ teḛ təa’g neelé gə mbi sí mba̰. See meḛ sí-seḭ’g ban ɓəi wa .
Deḛ lai gə́ d’isi keneŋ lé pana: Yeḛ ɓa yḛ̀ ra né as yoo ya.
65Njé gə́ na̰je d’un kudu tibi yiro kəmee’g ləm, deḛ ndèm kəmee gə kubu tɔsee gə ji dee dul-dul ləm tɔ pana: Gər yeḛ gə́ njekundai ar sí j’oo səi.
Njéŋgəmlooje gə́ d’aa dəa lé kara kunda kwɔjee ka-ka tɔ.
Piɛrə maḭta gər Jeju lé
Mat 26.69-75, Lug 22.56-62, Ja̰ 18.15-18,25-27
66Loo gə́ Piɛrə si gin dee’g naŋg gadloo’g lé ndá ŋgonjelookisi gə́ dené lə ŋgɔ-njekinjanéməs lé ree rəa’g. 67Yeḛ aa loo oo Piɛrə gə́ si ndibi pər ndá yeḛ aa kəmee gərərə ulá pana: I kara i to gə́ njeboalookaw lə Jeju gə́ Najaret lé ya tɔ.
68Yeḛ maḭ dɔ rəa’g pana: Ta gə́ i pa neelé ma m’gər gelee el.
Tɔɓəi yeḛ uba naŋg ḭ mba kaw loo-Kandə-tarəw’g lé ndá kona no̰ wəl. 69Ŋgonjelookisi gə́ dené lé loo gə́ yeḛ aa loo ée tɔɓəi ndá ula deḛ gə́ d’aar keneŋ lé tɔɓəi pana: Yeḛ gə́ aa’n lé to dəw lə dəwje neelé ya tɔ. Piɛrə lé tel maḭ dɔ rəa’g nja tɔɓəi.
70Waga ndá deḛ gə́ d’aar keneŋ lé tel d’ula Piɛrə pana: Tɔgərɔ, i lé to gə́ ka̰ dee-deḛ ya mbata i to gə́ dəw gə́ Galile.
71Yen ŋga yeḛ un kudu ndo̰ naji ubu ne rəa ula dee ne pana: Dəw gə́ seḭ paje ta ləa neelé ma m’gəree godo.
72Léegəneeya kona no̰ wəl ɔm gə́ gɔl joo ndá mee Piɛrə olé teḛ dɔ ta gə́ Jeju ulá kédé’g pana: Kona a na̰ ndia joo el nja ndá i a maḭ dɔ rɔi dɔm’g gɔl munda. Loo gə́ yeḛ si ə̰ji taree bèe-bèe ndá no̰ wá jiim.
Currently Selected:
Mark 14: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
