Misee 6
6
Njesigənea̰ ila ta dɔ koso-dəwje’g ləa
1Ooje ta gə́ Njesigənea̰ pa ɓa nee:
Maji kam m’ḭta,
M’aw m’ɔr ta no̰ mbalje’g ləm,
M’ar dɔdərlooje d’oo ndum ləm tɔ!
2Seḭ mbalje ləm gə gin naŋgje gə́ ŋgəŋgje ŋgəŋ-ŋgəŋ lé
Maji kar sí ooje ta gə́ Njesigənea̰ pa.
Mbata Njesigənea̰ aw gə koso-dəwje ləa gə ta ləm,
Yeḛ ndigi dəji Israɛlje gel néra dee ləm tɔ.
3Yeḛ pana: Seḭ koso-dəwje ləm lé,
See ɗi ɓa m’ra sə sí wa.
See né gə́ m’ar sí daoje ne to ɗi wa.
Ilamje keneŋ ɓa!
4See to mbata kar gə́ m’ar sí undaje loo mee ɓee gə́ Ejiptə teḛje lé wa.
See to mbata kɔr gə́ m’ɔr sí ɓee-ɓər’g m’ɔm sí tar ləm
Gə kula gə́ m’ula Moyis gə Aaro̰ gə Mari
M’ar dee d’aw no̰ sí’g lé wa .
5Ǝi seḭ dəwje ləm, arje meḛ sí olé dɔ né gə́ Balak,
Mbai gə́ Moab wɔji gə mba ra ləm,
Gə ta gə́ Balaam, ŋgolə Beɔr ilá keneŋ ləm tɔ.
Arje meḛ sí olé dɔ né gə́ teḛ dɔ sí’g
Un kudee ɓee gə́ Sitim saar teḛ ne Gilgal
Gə mba kar sí gərje ne némajije gə́ Njesigənea̰ ra lé .
Né gə́ Njesigənea̰ ndigi kiŋga rɔ dəwje’g lé
6See ɗi ɓa m’a ra mba kaar ne no̰ Njesigənea̰’g ləm,
Gə mba kula ne dɔm naŋg no̰ Ala gə́ Njekurdɔloo’g lé ləm tɔ wa.
See m’a kaw kaar nea̰’g
Gə nékinjanéməsje gə́ ka̰ roo ləm,
Gə ŋgan maŋgje gə́ ra ləb dee kára-kára ləm tɔ wa.
7See bàl badje gə́ bula digi-digi ləm,
Gə ubu gə́ ula kəŋgəŋ-kəŋgəŋ ləm tɔ lé
A taa kəm Njesigənea̰ wa.
See m’a kun ŋgondərm kuga ne dɔ kal gə́ m’al dɔ godnduje ləm,
Gə ŋgan meemje kuga ne dɔ kaiya ləm ləm tɔ wa.
8I dəw lé d’ulai né gə́ maji gə́ wɔji dɔi
Gə né gə́ Njesigənea̰ ndigi kiŋga rɔi’g to:
To mba kari ra né gə́ to gə dɔ najee ləm,
Gə unda meekɔrjol dan kəmi’g ləma,
Gə njaa gə Ala ləi gə ŋgonkoji ləm tɔ.
Njesigənea̰ ar bo̰ néŋgɔm gə néra gə́ kərm-kərm ɔs ta debee’g
9Ndu Njesigənea̰ ɓar dan ɓee-boo’g,
Yeḛ gə́ to njekəmkàr ndá a ɓəl ria.
Maji kar sí ooje ta lə ndəi ləm, gə yeḛ gə́ njekunda sí ləm tɔ.
10See nébaoje gə́ to kḛji ləm,
Gə nékwɔji-né gə́ as el
Gə́ a kar néndɔl oso dɔ loo’g ləm tɔ lé
To mee kəi’g lə njemeeyèr ya ɓəi wa.
11Nékwɔji-kwɔi lə né gə́ gə goo rəbee el ləm,
Gə kwɔi lə né gə́ gə ŋgɔm gə́ to mee ɓɔl’g ləm tɔ lé
See taree a lal kwa dɔ njea wa.
12Baoje gə́ mee ɓee’g neelé néra gə́ kərm-kərm ɓa taa rɔ dee pəl-pəl ləm,
Dəw-mee-ɓeeje lé taŋgɔm ɓa oji na̰ ta dee’g ləma,
Ndo̰ dee teḛ gə ta sukəmloo ləm tɔ.
13Gelee gə́ nee ɓa n’a kunda sí ne gə nékəmndoo ləm,
N’a tuji sí ne mbata lə kaiyaje lə sí ləm tɔ.
14Seḭ a sɔje né ya nɛ a ndanje el,
Ndá ɓó a tɔl sí yaa̰ meḛ sí’g ya tɔɓəi.
Seḭ a ŋgəmje né ya nɛ a kajije ne el,
Né gə́ seḭ a gə kajije ne rɔ sí lé
N’a taa gə kiambas.
15Seḭ a dubuje kó ya
Nɛ a kinjaje dəa el ləm,
Seḭ a kasje ubu kandə koiyo ya
Nɛ a ndèmje ubee el ləma,
Seḭ a mbulaje kandə nduú ya
Nɛ a kaije manee el ləm tɔ.
16Seḭ ndolèje goo néjiɓeje lə Ɔmri ləm,
Gə néraje lə njémeekəije lə Akab ləma,
Seḭ njaaje goo ta kwɔji kəmkàrje’g lə dee ləm tɔ.
Gelee gə́ nee ɓa m’a kya̰ sí ne dan tuji’g ləm,
M’a kar dəw-mee-ɓeeje lə sí
Tel to ne nékogo lə dəwje ləm tɔ .
Currently Selected:
Misee 6: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
