Misee 5
5
Betlehem, ɓee-koji mbai gə́ njekaji dəwje lé
1I Betlehem, Eprata,
I to ŋgon ɓee gə́ lam ba mbuna ŋgan-ɓeeje gə́ Juda ya,
Nɛ yeḛ gə́ a ko̰ dəwje ləm gə́ Israɛl lé
A kḭ rɔi’g ya.
Gin koji ləa to gə́ kédé par-par ləm,
To gə́ mee ndəaje gə́ kédé gə́ dɔtar ləm tɔ .
2Gelee gə́ nee ɓa yeḛ a kuba dee ne kya̰ dee
Saar kar yeḛ gə́ a gə koji ŋgon lé
A kojee ya ləm,
Saar kar ges ŋgakea̰je gə́ nai lé
D’a tel ree kiŋga ne Israɛlje ləm tɔ.
3Yeḛ a kḭ ta ndá
A kul badə-kosoje ləa gə siŋgamoŋ lə Njesigənea̰ ləm,
Gə rɔnduba lə ri Njesigənea̰, Ala ləa ləm tɔ!
D’a kiŋga loo-si dee gə́ d’a si ne gə meekulɔm,
Mbata d’a kula rɔnduba dəa’g saar kɔr rudu naŋg nee njal.
4To yeḛ nja ɓa a ree gə meekulɔm.
Loo gə́ dəw gə́ Asiri a ree mee ɓee’g lə sí ləm,
A kandə mee kəi-mbaije’g lə sí ləm tɔ ndá
J’a rɔ səa gə njékulbadje siri ləm,
Gə njékaa dɔ koso-dəwje jinaijoo ləm tɔ.
5Deḛje neelé d’a ko̰ guburu ɓee gə́ Asiri
Gə ɓee gə́ Nimrɔd gə kiambas.
Togə́bè ɓa yeḛ a taa sí ne ji dəw gə́ Asiri,
Loo gə́ yeḛ a ree mee ɓee’g lə sí ləm,
A kila gɔlee dɔ naŋg’d lə sí ləm tɔ .
6Ges Jakobje d’a nai mbuna koso-dəwje gə́ bula digi-digi’g
To gə́ mán-tàl gə́ ḭ rɔ Njesigənea̰’g ləm,
To gə́ mán-tàl gə́ wa dɔ muje’g bèe ləm tɔ,
Gə́ gelee ḭ rɔ dəwje’g el ləm,
Gə́ gəd rəa dɔ dəwje’g el ləm tɔ.
7Ges Jakobje d’a nai mbuna ginkoji dəwje gə́ bula digi-digi’g
Asəna gə toboḭ gə́ aar mbuna daje gə́ mee kag-kɔr’g bèe ləm,
Asəna gə ŋgon toboḭ gə́ aar mbuna koso-ŋgan badje’g bèe ləm tɔ.
Loo gə́ yee dəs mba kaw ndá
Yee tuba dee naŋg ləm,
Yee ti dee mbidi-mbidi ləm tɔ
Ar dəw gə́ njetaa dɔ dee godo.
8Maji kari un jii rɔ ne gə njékoma̰ seḭje ləm,
Maji kar deḛ lai gə́ to njéba̰je ləi d’udu guduru ləm tɔ.
9Njesigənea̰ pana: Mee ndəa’g neelé
N’a kar kundaje lə sí d’udu guduru ləm,
N’a tuji pusu-rɔje lə sí ləm tɔ.
10N’a kar ɓee-booje
Gə́ to mee ɓee’g lə sí tuji pugudu ləm,
N’a tɔs kəi-kaar-kɔgərɔje lə sí lai tila ləm tɔ.
11N’a kar nésukəmlooje gə́ to ji sí’g tuji ləm,
Njétən kéréméje kara d’a godo ləm tɔ.
12N’a kar magəje gə néndajije
Godo mbuna sí’g ləm,
Seḭ a kundaje barmba no̰ né’d
Gə́ seḭ raje gə ji sí lé el ŋga ləm tɔ,
13N’a kar magə-Astartéje godo mbuna sí’g ləm,
N’a tuji ɓee-booje lə sí ləm tɔ.
14N’a dal ba̰ lə neḛ gə oŋg gə meekḭ jugugu
Dɔ ginkoji dəwje gə raŋg gə́ to mbim-oo-ta-elje lé.
Currently Selected:
Misee 5: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.