Matiyo 9
9
Jeju ɔr rɔko̰ rɔ dəw gə́ dəb rəa wəi wɔ’g
Mar 2.1-12, Lug 5.17-26
1Jeju uru mee to’g ndá yeḛ gaŋg mán teḛ mee ɓee-boo’g ləa. 2Aa ooje, deḛ ree gə njerɔko̰ rəa’g, to diŋgam gə́ dəb rəa wəi wɔ, ar dee d’unee gə twa-rɔko̰ ləa bura. Loo gə́ Jeju oo meekun lə dee ndá yeḛ ula dəw gə́ dəb rəa wəi lé pana: Ŋgonəm, nda məəi kaḭ-kaḭ, kaiya ləi ɔr dɔi’g.
3Yen ɓa njéndaji-maktubje gə́ na̰je pata meḛ dee’g pana: Diŋgam neelé ila ndɔl dɔ loo’g.
4Jeju gər takə̰ji lə dee gao ndá yeḛ dəji dee pana: See ban ɓa seḭ ə̰jije ta gə́ yèr meḛ sí’g, ɔmje dɔm’g wa. 5See ri ɓa a moŋg dum pa wa. Kaiya ləi ɔr dɔi’g, əsé ḭta njaa wa. 6Bèe ndá m’a kar sí ooje, Ŋgon-dəw lé siŋgamoŋ ləa as kɔr kaiya dɔ dəwje gə́ dɔ naŋg nee.
Tɔɓəi yeḛ tel ula dəw gə́ dəb rəa wəi lé pana: Ḭta un twa ləi aw ɓée.
7Diŋgam lé ḭta ɔd aw kəi ləa. 8Loo gə́ koso-dəwje d’oo ndá deḛ ɓəl, d’ula ne rɔnduba dɔ Ala gə́ njekar rɔ dəwje ŋgəŋ togə́bè lé.
Jeju ɓar Matyo
Mar 2.13-17, Lug 5.27-32
9Jeju ḭ keneŋ aw gə kuree waga, yeḛ oo diŋgam gə́ si takəi taa lar-gədɓee’g ria lə Matiyo. Jeju ulá pana: Maji kari ree goom’g.
Léegəneeya, diŋgam neelé ḭta ɔd aw gée’g tɔ.
10Loo gə́ Jeju si ta ka-nésɔ’g gə́ mee kəi’g ndá njétaa lar-gədɓeeje deḛ gə kaiya-dəwje gə́ na̰je d’aw d’isi səa ta ka-nésɔ’g na̰’d gə njékwakiláje#Lug 15.1-2. 11Parisiḛje d’oo ndá deḛ dəji njékwakiláje pana: See gə mba ɗi ɓa mbai lə sí lé si gə njétaa lar-gədɓeeje gə kaiya-dəwje lé sɔ sə dee né wa.
12Jeju oo ta lə dee ila dee keneŋ pana: Deḛ gə́ rɔ dee to kari lé d’aw ndòo njekuma̰ el, njérɔko̰je ɓa d’aw ndée. 13Awje ndooje ginta nee: Meekɔrjol ɓa taa kəm ɓó nékinjaməs el. Togə́bè ɓa m’ree m’ɓar kaiya-dəwje ɓó njémeekarabasurje el#Mar 12.7, Oje 6.6.
Jeju teggin ta kɔg-mee-ɓoo
Mar 2.18-22, Lug 5.33-39
14Yen ɓa njekwakila Jasee ree rəa’g dəjee pana: See gə mba ɗi ɓa jeḛ gə Parisiḛje j’ɔg meḛ sí ɓoo nɛ njékwakilaije d’ɔg meḛ dee ɓoo el wa.
15Jeju ila dee keneŋ pana: Baokuraje lə njedené-sigi lé see d’a kula rɔ dee ndòo loo gə́ njedené-sigi nai sə dee ɓəi wa. Ndəa gə́ kàree a teḛ lé d’a kɔr njedené-sigi mbuna dee’g ndá d’a kɔg meḛ dee ɓoo ɓəi.
16Tɔɓəi dəw kára kara a kun ta kubu gə́ sigi gə mba kɔr ne kəm ŋgisi kubu el nà banelə ta kubu gə́ sigi lé a kunda nje gə́ ləw bərəŋ-bərəŋ til. 17Dəwje d’ɔm mán-nduú gə́ sigi mee ɓɔl-ndar gə́ ləw’g el mbata ɓɔl-ndar lé a kinja bim ndá mán-nduú gə́ sigi a kɔm naŋg ləm, ɓɔl-ndar a tuji ləm tɔ. Man-nduú gə́ sigi lé d’ɔm mee ɓɔl-ndar gə́ sigi’g tɔ ndá mán-nduú ləm, gə ɓɔl-ndar ləm tɔ lé d’a kwa naŋg jəb ya.
Ŋgolə Jayirus aji kəbərə
Mar 5.21-43, Lug 8.40-56
18Loo gə́ yeḛ si pa taje neelé bèe-bèe ndá mbai gə́ njekəi-kwa-dɔ-na̰ kára ree rəm yəm ɔs kəjee naŋg nea̰’g pana: Ŋgonəm gə́ dené wəi ɓasinè ya ɓəi. Nɛ gə́ ree, ila jii dəa’g ndá a si kəmba ya.
19Jeju gə njékwakiláje d’ḭta d’orè səa rəw na̰’d kára ba. 20D’isi d’aw ndá dené gə́ rɔko̰-məs rəa as ləb dɔg-giree-joo uru mbuna dee’g ɔrɔ ta kubu ləa. 21Mbata yeḛ ə̰ji ta mée’g pana: Ɓó lé n’a kɔrɔ ta kubu ləa ya ndá n’a kaji.
22Jeju ɔm rəd ndá ulá pana: Ŋgonəm, ndá məəi kaḭ, meekun ləi taa né ari aji ne ya.
Léegəneeya, rɔ dené lé to kari péd-péd.
23Loo gə́ Jeju ree kəi lə mbai lé ndá yeḛ oo njékimtébéje na̰’d gə koso-dəwje gə́ ra né birim-birim. 24Yeḛ ula dee pana: Ɔdje gə́ gogo, ŋgon gə́ dené neelé wəi el ɓəi nɛ yeḛ toɓi gə́ to ɓa.
Deḛ kɔgee. 25Loo gə́ koso-dəwje d’ɔr rɔ dee mba̰ ndá yeḛ andə mee kəi’g wa ji ŋgon lé ndá yeḛ ḭta. 26Taree oso gə mee loo mbidi-mbidi.
Jeju ar kəm njékəmtɔje joo inja
27Jeju ḭ keneŋ ndá njékəmtɔje joo d’oré gée, deḛ ra né gə ndu dee gə́ boi wəl pana: Ŋgon Dabid, oo kəmtondoo lə sí ya kari.
28Loo gə́ yeḛ ree kəi mba̰ ndá njékəmtɔje rəm pər gə́ rəa’g. Jeju dəji dee pana: See gə́ meḛ sí’g pana: M’askəm ra togə́bè wa.
Deḛ tel d’ilá keneŋ pana: Oiyo, Mbaidɔmbaije, i askəm ra togə́bè ya.
29Yen ɓa yeḛ ɔrɔ kəm dee pana: Meekun lə sí ɓa a taa né gə́ seḭ awje ndée lé kar sí ya.
30Léegəneeya kəm dee teḛ. Jeju ndəji dee pana: Yen, maji kar dəw kára kara oo né neelé el.
31Loo gə́ deḛ teḛ raga mba̰ ndá d’ila riɓar dəa’g d’ula ne loo wɔr-wɔr mee ɓeeko̰’g neelé.
Jeju ar njegwɔskudu pata
32Loo gə́ d’isi d’aw ɓəi ndá dəwje ree gə njegwɔskudu kára rəa’g. Loo gə́ Jeju tuba ndil gə́ majel mée’g ndá njegwɔskudu lé pata. 33Koso-dəwje lé kaar dee wa dee paḭ ar dee pana: Wah, jeḛ j’oo né gə́ togə́bè lé ɓee lə Israɛlje gɔl kára el nja ɓəi. 34Nɛ Parisiḛje pana: Mbɔl dɔ mbai lə ndilje gə́ majel ɓa Jeju tuba ne ndilje gə́ majel meḛ dəwje’g#Mat 10.25, 12.24, Mar 3.22, Lug 11.15.
Jeju oo kəmtondoo lə koso-dəwje
35Jeju aw gə dɔɓee-dɔɓee, mee ɓee-booje gə ŋgan-ɓeeje ndoo dee ta mee kəi-kwa-dɔ-na̰’g lə dee. Yeḛ tɔji dee ta gə́ wɔji dɔ ɓeeko̰ lə Ala lé ləm, rɔko̰ gə́ rara kara yeḛ aree ḭ rɔ dee’g kə̰geŋ ləm tɔ#Mat 4.23, Mar 1.39, Lug 4.44. 36Loo gə́ yeḛ oo koso-dəwje ndá mée aw taḭ-taḭ mbata yeḛ oo dee asəna gə ŋgan badje gə́ lab ɔr dee ləm, njekul dee kara godo ləm tɔ#BI 27.17, 1Mb 22.17, 2SgI 18.16, Ejk 34.5, Mar 6.34. 37Yeḛ ula njékwakiláje pana: Ko gə́ kəm kinja to yaa̰ nɛ njékḭjaje ti el#Lug 10.2. 38Bèe ndá raje tamaji mba kar njeko lé ula njékḭjaje loo-kó’g ləa ya.
Currently Selected:
Matiyo 9: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
