Matiyo 8

Jeju aji njeba̰ji

Mar 1.40-45, Lug 5.12-16

1Loo gə́ Jeju ḭ dɔ mbal’g risi gə́ naŋg ndá koso-dəwje ndɔm na̰ gée’g. 2Aa ooje njeba̰ji kára ree pər gə́ rəa’g unda barmba naŋg nea̰’g pana: Mbai, ɓó lé i ndigi ndá i kaskəm kar rɔm ɔr ɓə̰dərə-ɓə̰dərə ya.

3Jeju ula jia paar ɔrɔ ne rəa pana: Ma m’ndigi səi ya, maji kar rɔi ɔr ɓə̰dərə-ɓə̰dərə ya. Léegəneeya ba̰ji ɔr rəa’g ɓə̰dərə-ɓə̰dərə ya tɔ. 4Tɔɓəi Jeju ulá pana: Maji kari udu taree məəi’g ar dəw oo səi el ɓəi, nɛ aw rɔ njekinjanéməs’g tɔjee rɔi ɓó gə un nékar-Ala aree gə goo godndu Moyis gə mba karee to ne nékɔrkəmta ləi kəm dəwje’g ɓa#Ləb 14.32.

Jeju aji ŋgonjelookisi lə ɓé-njérɔje

Lug 7.1-10

5Loo gə́ Jeju unda dɔ Kapernawum dəb ndá ɓé-njérɔje rəm pər gə́ rəa’g to təa’g pəgə-pəgə ulá pana: 6Mbai, kura ləm lé yoo-ndag undá, yeḛ to kəi’n ar rəa adee mbag-mbag.

7Jeju ilá keneŋ pana: M’a kaw kəi ləi kajee kari ya.

8Nɛ ɓé-njérɔje lé tel ulá pana: Mbai, m’askəm kari andə gel jala’g ləm el. Maji kari pata gə tai ya kára ba ndá rɔ kura ləm a to kari péd-péd. 9Mbata ma lé m’ula dɔm m’ar njékurdɔm’gje lé ləm, ma m’to ɓé-njérɔje gə́ d’ula dɔ dee d’am ləm tɔ. Ɓó lé m’ula yeḛ gə́ kára m’pana: Ree ndá yeḛ ree ya, əsé lé m’ula yeḛ gə́ raŋg m’pana: Ɔd aw ndá yeḛ ɔd aw ya tɔ, əsé lé m’ula kura ləm m’pana: Ra né gə́ nee ɓa ndá yeḛ ra ya tɔ.

10Loo gə́ Jeju oo tapea ndá kaaree wá paḭ aree ula deḛ gə́ ndɔm na̰ gée’g lé pana: Ma m’ula sí təsərə, mee ɓee gə́ Israɛl’g ya kara ma m’iŋga boo-meekun gə́ togə́bè kəm kára el ɓəi. 11Bèe ɓa ma m’ula sí təsərə, njé gə́ na̰je bula d’a kḭ bər ləm, gə dɔ-gó ləm tɔ ndá d’a si na̰’d ta ka-nésɔ’g ɓeeko̰ gə́ dara na̰’d gə Abrakam, gə Isaak, gə Jakob tɔ#Lug 13.29. 12Nɛ kojikəije lə ɓeeko̰ lé d’a kɔm dee raga gir loo gə́ ndul njudu-njudu’g ləm, d’a no̰ gə mán-no̰ kəm dee’g sɔ ne ŋgaŋ dee pəgərə-pəgərə ləm tɔ#Mat 22.13, 25.30, Lug 13.28.

13Tɔɓəi Jeju ula ɓé-njérɔje lé pana: Ɔd aw loo ləi, némeekun ləi lé i a kiŋga ɓəi.

Mee kàree’g neelé rɔko̰ ḭ rɔ kura’g ləa kə̰geŋ ya.

Jeju aji njérɔko̰je bula

Mar 1.29-34, Lug 4.38-41

14Jeju ɔd aw mee kəi’g lə Piɛrə, ɔs dəa rɔ məəm Pierəje gə́ to dɔ tira rɔko̰’g, rəa taa pər bilim-bilim. 15Jeju wa jia ndá léegəneeya rɔko̰ lé ḭ dəa’g kə̰geŋ aree uba naŋg ḭ tar unda-kunda nésɔ dee. 16Loo gə́ kàr aar dɔ kam’g ler ndá deḛ d’odo njé gə́ ndilje gə́ majel ra dee d’uba sə dee yao-yao. Jeju pata gə ndia ya tuba ne ndilje gə́ majel meḛ dee’g ləm, yeḛ aji njérɔko̰je lai ləm tɔ. 17Togə́bè ɓa ta gə́ njetegginta Esai pa ləw lé aw lée’g béréré mbata yeḛ pana: Yeḛ nja ɓa odo rɔ yooje lə sí ɓugu dəa’g ləm, yeḛ ɔr rɔko̰je lə sí ɔm dəa’g ləm tɔ#Esa 53.4.

See kun dɔ gɔl Jeju lé to to gə́ banwa

Lug 9.57-62

18Jeju oo koso-dəwje kiri na̰ dəa’g yir ndá yeḛ un ndia mba kar dee gaŋgee d’aw səa kel tura. 19Yen ŋga njendaji-maktub kára bèe ree pər gə́ rəa’g ulá pana: Mbai, looje lai gə́ i sí aw gə́ keneŋ lé m’a kun gooi lad-lad ya.

20Jeju ilá keneŋ pana: Bolé to njaaje to gən ga̰ ləm, kəi to yelje kara to gən ga̰ ləm tɔ. Nɛ Ŋgon-dəw lé oo loo gə́ mba kula dəa keneŋ taa kəmə el.

21Dəw gə́ raŋg kára bèe gə́ to njekwakilá tɔ dəjee pana: Ya̰’m ɓoŋ am m’aw m’dubu bɔm ɓa m’a tel ree gooi’g ɓəi.

22Jeju ilá keneŋ pana: Kəmi gə́ goom’g nee, ya̰ yoo-dəwje ar dee dubu yoo na̰.

Lel-boo gaŋg ŋgaji ar loo to ndiŋ

Mar 4.35-41, Lug 8.22-25

23Jeju ɔd uru mee to’g ndá njékwakiláje d’ɔd ndɔm na̰ gée’g. 24Yen ŋga, lel-boo ḭ dan baa-boo’g ula gigigi ɓugu dɔ dee’g ar paŋgəm mán uru mee to’g pujuju-pujuju nɛ yeḛ lé to toɓi. 25Njékwakiláje ŋgəs pər gə́ rəa’g ndelee pana, Mbai, taa sí aji sí nà j’a kudu.

26Yeḛ dəji dee pana: See ban ɓa ɓəlje wa, seḭ njémeekunje gə́ əḭ el. Yen ŋga yeḛ uba naŋg ḭta ndaŋg lel ləm, gə mán baa-boo ləm tɔ ar loo to ndiŋ. 27Deḛ d’aa loo jḛ̀ pana: Dəw neelé to dəw gə́ ban ɓa mán gə lel ya kara ra torndia wa.

Njéndilje gə́ yèr joo d’aji

Mar 5.1-20, Lug 8.26-39

28Loo gə́ yeḛ teḛ gir baa gə́ kel tura dɔ naŋg’d lə njé gə́ Gadara ndá dəwje joo gə́ ndilje gə́ yèr ra dee lé teḛ dɔɓar gə́ to mbuna mbalje’g tila kəmee. Lée neelé dəwje ɓəl teḛ keneŋ mbata njéndilje gə́ yèr lé ndaŋg rɔ dee paḭ-paḭ. 29Deḛ ra né ɓəgəgə-ɓəgəgə pana: I Ŋgon-Ala lé see ɗi ləi ɓa to rɔ sí’g wa. See i ree mba kula kəm sí ndòo kédé yal ɓa kar ndəa teḛ ɓəi wa.

30Bər-kosoje d’aar ŋgərəŋ d’aar d’o̰ mu. 31Ndilje lé ra ndòo rɔ Jeju’g pana: Ɓó lé i a gə tuba sí ndá ula sí ar sí n’teḛ j’ɔm mee bərje’g neelé. 32Yeḛ ula dee pana, Teḛje awje!

Ndilje gə́ majel neelé d’unda loo teḛ d’uru mee bərje’g. Aa oo, bərje neelé lai d’ḭ loo-ko̰-mu’g d’aḭ yi-i-i d’aw dɔ koŋgo baa-boo’g ndá deḛ ndida koŋgo, ɓugu mán wɔlɔg nai keneŋ wo̰d.

33Yen ŋga njékul deeje buŋga na̰ d’aḭ d’aw ɓée d’ɔr gin né gə́ teḛ dɔ dee’g ləm, gə né gə́ wɔji dɔ njé gə́ ndilje gə́ majel ra dee lé ləm tɔ. 34Léegəneeya njéɓeeje teḛ digi-digi d’aw no̰ Jeju’g ra ndòo rəa’g mba karee ya̰ ɓee lə dee.

Currently Selected:

Matiyo 8: SBA2015

Highlight

Copy