Matiyo 4
4
Njekurai aḭ mee Jeju Kristi
Mar 1.12-13
1Yen ŋga Ndil ɔs Jeju ɓɔḭ-ɓɔḭ aree ur dɔdilaloo’g mba kar njekurai aḭ mée . 2As ndɔ rɔ-sɔ, dan kàrá gə loondul’g, Jeju ɔg mée ɓoo ndá lab ɔree. 3Léegəneeya, njekər dəwje ree pər gə́ rəa’g ulá pana: Ɓó lé i to Ŋgon-Ala gə́ gəd ya ndá un ndui ar kɔr mbalje neelé tel muru ko̰ lé.
4Jeju tel ilá keneŋ pana: Deḛ ndaŋg mee maktub’g pana: Muru nja kára ba ɓa dəw a si ne kəmba lé el nɛ taje kára-kára lai gə́ teḛ ta Ala’g lé ɓa yeḛ a si ne kəmba lé ɓəi .
5Léegəneeya njekurai lé undá aw səa mee ɓee gə́ to gə kəmee, uba səa dɔ kəi-Ala ulá pana: 6Ɓó lé i to Ŋgon-Ala gə́ gəd ndá al ur naŋg mbata deḛ ndaŋg mee maktub’g pana:
Yeḛ a kun ndia kar kuraje ləa gə́ dara kwɔji ne dɔi,
D’a kuni gə ji dee
Nà banelə i a tuga gɔli dɔ kɔr mbal’g .
7Jeju tel ilá keneŋ pana: Deḛ ndaŋg mee maktub’g tɔɓəi pana: Mbaidɔmbaije, Ala ləi lé i a kaḭ mée nda̰ el .
8Njekurai lé undá aw səa dɔ mbal gə́ ŋgal léŋgé-léŋgé’g. Yeḛ tɔjee ɓeeko̰je gə́ naŋg nee lai-lai gə néro̰dubaje lə dee tɔ ndá yeḛ ulá pana: 9Ɓó lé i a kunda barmba dəb kəmi naŋg nɔm’g ndá néje lai gə́ i oo gə kəmi neelé m’a kari gə́ kaḭ ya.
10Yen ŋga Jeju ulá pana: Njekurai, ɔd tam’g gə gogo mbata deḛ ndaŋg mee maktub’g pana: Mbaidɔmbaije Ala ləi lé yeḛ ya kára ba ɓa i a kunda barmba nea̰’g ləm, yeḛ nja kára ba kiao ɓa i a ra né karee ləm tɔ .
11Yen ŋga njekurai lé ubá yá̰. Aa ooje kuraje lə Ala gə́ dara ɓa ree pər gə́ rɔ Jeju’g ra néje d’aree tɔ.
Jeju un kudu kula ləa mee ɓee gə́ Galile
Mar 1.14-15, Lug 4.14-15
12Loo gə́ Jeju oo ta lə Ja̰ gə́ d’ilá daŋgai’g lé ndá yeḛ sa rəa aw Galile . 13Yeḛ ḭ Najaret aw si Kapernawum mbɔr baa-boo’g dəb, mee ɓeeko̰ gə́ Jabulo̰ gə Neptali 14mba kar ta gə́ Esai, njetegginta pa ləw lé aw ne lée’g béréré pana:
15Njé gə́ Jabulo̰ gə Neptali
Gə́ d’isi rəw gə́ aw gə́ baa-boo gə́ gir Jurdɛ̰’g ləm,
Gə deḛ gə́ d’isi Galile, ɓee lə njépole-magəje ləm tɔ lé
16Dəwje neelé gə́ d’isi dan loondul’g lé
Deḛ nja d’oo loo gə́ ndogó wər-wər ləm,
Deḛ neelé gə́ ndil yoo dəb dɔ dee’g bigim lé
Loo un kudu ndogó dɔ dee’g ləm tɔ.
17Mee ndəa’g neelé Jeju un kudu kila mber pana: Maji kar sí waje ndòo rɔ sí dɔ kaiya’g lə sí mbata ɓeeko̰ gə́ dara lé nai dəb ya .
Jeju ɓar njékwakiláje gə́ sɔ
Mar 1.16-20, Lug 5.1-11
18Loo gə́ yeḛ njaa dɔ koŋgo baa-boo gə́ Galile’g ndá yeḛ oo diŋgamje joo gə́ to gə́ ŋgako̰ na̰je, Simo̰ gə́ deḛ ɓaree Piɛrə, deḛ gə ŋgokea̰ Andre, d’aar d’ɔs bura lə dee mán mbata deḛ to gə́ njékawndo̰ kajije. Yeḛ ula deḛ pana: 19Maji kar sí unje goom ndá ma nja m’a ndoo sí kar sí gərje rəw ndo̰ dəwje. 20Léegəneeya, deḛ d’ya̰ buraje lə dee d’ɔm na̰ gée’g.
21Yeḛ ɔd mbɔr gə́ kédé ɓəi ndá yeḛ oo dəwje joo gə́ raŋg gə́ to gə́ ŋgako̰ na̰je, Jak, ŋgolə Jebede, deḛ gə ŋgokea̰ Ja̰ d’isi mee to’g, d’isi gə bɔ deeje gə́ Jebede, d’isi ra kəm buraje lə dee. 22Yeḛ ɓar dee ndá léegəneeya d’uba bɔ deeje d’yá̰ gə to ɓa d’ɔd d’ɔm na̰ gée’g tɔ.
23Jeju gugu mee ɓeeko̰ gə́ Galile ndá yeḛ ɔr goo tagə́maji gə́ wɔji ne dɔ ɓeeko̰ lé ndoo dee ne mee kəi-kwa-dɔ-na̰je’g lə dee ləm, rɔko̰ gə́ rara gə néyooje gə́ rara gə́ ra dəwje lé kara yeḛ ɔr rɔ dee’g ləm tɔ . 24Nea̰ oso loo mbidi-mbidi ɓeeko̰ gə́ Siri. Deḛ d’odo njérɔko̰je, gə deḛ gə́ d’isi gə meeko̰ gə́ gə ria-ria ləm, gə deḛ gə́ ndilje gə́ majel to meḛ dee’g d’ula kəm dee ndòo ləm, gə deḛ gə́ kɔr ra dee ləma, gə deḛ gə́ yoo-ndag unda dee ləm tɔ, d’odo dee lai-lai ree sə dee rəa’g ndá yeḛ aji dee ya. 25Boo-dəwje gə́ Galile gə Dekapol gə Jerusalem gə Jude lé deḛ ndolè gée. Deḛ gə́ d’isi dɔ naŋg’d gə́ gir baa gə́ Jurdɛ̰’g kara ndolè gée tɔ.
Currently Selected:
Matiyo 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.