Matiyo 3
3
Mber kila lə Ja̰ Njera-batɛm
Mar 1.1-8, Lug 3.1-18, Ja̰ 1.19-28
1Mee ndəa’g neelé Ja̰ Njera-batɛm unda loo teḛ ila mber dɔdilaloo gə́ Jude lé pana: 2Maji kar sí waje ndòo rɔ sí dɔ kaiya’g lə sí mbata ɓeeko̰ gə́ dara lé nai dəb ba ŋga#Mat 4.17, Mar 1.15.
3Ja̰ lé to yeḛ gə́ Esai, njetegginta ɔr ta ləa loo gə́ yeḛ pa ne pana:
To ndu yeḛ gə́ njekilamber gə dɔdilaloo lé pana:
Gɔlje rəw lə Mbaidɔmbaije lé
Gɔlje kila rəwje ləa ar deeje d’aar dana njoroŋ.#Esa 40.3
4Ja̰ ula kubu gə́ d’ṵji gə bḭ jambal rəa’g, wa mée gə ndar. Gabəraje ɓa gə́ nésəa ləm, ubu tə̰jije gə́ walá ɓa gə́ néko̰ ləa ləm tɔ#2Mb 1.8. 5Njé gə́ Jerusalem gə njé gə́ Jude gə deḛ lai gə́ d’isi gugu dɔ Jurdɛ̰ lé d’aw pər gə́ rəa’g, teggin kaiya lə dee gə́ raga. 6D’aree ra dee batɛm dan baa gə́ Jurdɛ̰’g.
7Loo gə́ yeḛ oo Parisiḛje gə Saduseḛje bula ree rəa’g mba karee ra dee batɛm lé ndá yeḛ ula dee pana: Seḭ ŋgan li-meewaije, see na̰ ɓa ndoo sí mba kar sí aḭje oŋg gə́ a gə ree lé wa#Mat 12.34, 23.33. 8Maji kar sí arje néra sí wa bua tapa sí loo gə́ seḭ waje ndòo rɔ sí dɔ kaiya’g lə sí 9ɓó ulaje rɔ sí pajena: Jeḛ lé Abrakam ɓa to gə́ bɔ síjeḛ, maji kar sí paje togə́bè el! Mbata ma m’ula sí təsərə, Ala askəm tel kɔr mbalje gə́ to neelé gə́ ŋganje kar Abrakam ya#Ja̰ 8.33. 10Tina to ŋgira kagje’g béréré-béréré mba̰. Kag gə́ rara ɓa gə́ andə gə ka̰dee gə́ maji el ndá d’a tuga badə gaŋg kila pər’d#Mat 7.19. 11Ma m’ra sí batɛm gə mán gə mba kar sí waje ne ndòo rɔ sí dɔ kaiya’g lə sí nɛ yeḛ gə́ si ree goom’g lé siŋgá ur dɔm’g, m’askəm kodo markob ləa lé kaw kɔm el. Yeḛ nja ɓa a ra sí batɛm gə Ndilmeenda gə pər tɔ. 12Nékwayiŋga dɔ kó ləa to jia’g. Yeḛ a kwa ne yiŋga dɔ kó loo-kunda-kó’g ləa nɛ yeḛ a mbo̰ kandə kó ləa kɔm dàmá ndá yeḛ a roo yiŋga dəa gə pər gə́ a kwəi nda̰ el lé tɔ.
Batɛm lə Jeju Kristi
Mar 1.9-11, Lug 3.21-22
13Yen ŋga Jeju ḭ Galile teḛ dɔ Ja̰’g ta baa gə́ Jurdɛ̰’g mba karee rəa batɛm keneŋ, 14Nɛ Ja̰ ɔsee ŋgərəŋ pana: Ma m’aw ndooi gə mba kari ɓa ram batɛm. See ban ɓa i ɔd aḭ ree rɔm’g tɔɓəi wa.
15Jeju tel ilá keneŋ pana: Ya̰ am m’ra togə́bè ya mba kar sí n’tɔl ne ta né gə́ to gə dɔ najee lé bém.
Yen ŋga Ja̰ yá̰ aree rəa togə́bè ya. 16Loo gə́ Ja̰ rəa batɛm mba̰ ndá Jeju ḭ mán unda loo teḛ. Aa oo, kəm dara teḛ ndá yeḛ oo Ndil Ala ḭ keneŋ nar asəna gə dərnda ree si dəa’g. 17Tɔɓəi aa oo, ndu dəw ɓar mee dara’g wəl pana: Yeḛ neelé to ŋgonəm gə́ gəd-gəd gə́ m’undá dan kəm’g, yeḛ taa kəm rəgm ya#Gn 22.2, Pak 2.7, Esa 42.1, Mat 12.18, 17.5, Mar 1.11, Lug 9.35.
Currently Selected:
Matiyo 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
