Matiyo 24
24
Jeju pata tuji lə kəi-Ala gə́ Jerusalem
Mar 13.1-2, Lug 21.5-6
1Loo gə́ Jeju unda loo teḛ mee kəi-Ala’g ndá njékwakiláje rəm pər gə́ rəa’g mba tɔjee karee aa loo oo kəi gə́ ra neelé. 2Nɛ yeḛ tel ila dee keneŋ pana: Néje lai neelé see aaje lai ooje ya wa. Ma m’ula sí təsərə, mbal gə́ rara gə́ to dɔ na̰’d gə́ a lal jura naŋg el lé kára kara godo.
Némeeko̰je gə nékəmndooje
Mar 13.3-13, Lug 21.7-19
3Loo gə́ yeḛ rəm si naŋg dɔ mbal gə́ ria lə Koiyoje lé ndá njékwakiláje ya gə kar dee ba rəm pər gə́ rəa’g dəjee pana: Maji kari ula sí, see ndɔ gə́ ra ɓa a to ndɔ teḛ ləa ɓəi wa. Esé see ɗi ɓa a tɔji sí ndɔ ree ləi gə ndɔ rudu naŋg nee lé ɓəi wa.
4Jeju ila dee keneŋ pana: Meḛ sí dɔ rɔ sí’g mba kar dəw kára kara su kəm sí el. 5Mbata dəwje bula d’a ree gə rim, d’a pana: Neḛ n’toje gə́ Kristi. Ndá d’a su ne kəm dəwje bula ya. 6Seḭ a kooje ta rɔ na̰ lə dəwje ləm, seḭ a kooje sor rɔ gə́ d’a gə rɔ na̰ ləm tɔ ndá meḛ sí to dɔ rɔ sí’g mba kar meḛ sí pélé wəs-wəs dɔ ta’g neelé el mbata lé riri kara néje gə́ togə́bè lé a teḛ ya. Nɛ a to ndɔ gə́ rudu lé el nja dɔrɔ ɓəi. 7Ginkoji dəwje gə raŋg d’a kḭ gə na̰ ləm, njéɓeeko̰je kara d’a kḭ gə na̰ ləm tɔ. Loo gə́ na̰je bula ɓoo-boo a koso dɔ dəwje’g ləm, naŋg kara a yə ləm tɔ. 8Néje lai neelé yee ɓa a to némeekonje gə́ doŋgɔr ɓəi.
9Yen ŋga d’a kwa sí kula kəm sí ndòo ləm, d’a kar sí uduje ne ləma, ginkoji dəwje gə raŋg lai d’a kḛji sí bəḭ-bəḭ gə mba rim-ma lé ləm tɔ#Mat 10.22. 10Yen ŋga mee ndəa’g neelé dəwje bula d’a tel gogo ndá d’a kun dɔ na̰ ləm, d’a kḛji na̰ bəḭ-bəḭ ləm tɔ. 11Njétegginta gə́ ŋgɔmje d’a kuba naŋg kḭ su kəm dəwje bula. 12Néra dəwje gə́ kori-kori a kḭ dɔ maree’g gə́ kédé-kédé ndá yee ɓa a kar goo meenoji lə dəwje kul ne ɗəŋ-ɗeŋ. 13Nɛ yeḛ gə́ ai mée sam-sam teḛ ne ndɔ gə́ rudu’g lé ndá yeḛ a kaji ne ya#Mat 10.22. 14Ta gə́ maji nee gə́ wɔji dɔ ɓeeko̰ lé d’a kila ne mber gə loo mbidi-mbidi dɔ naŋg nee mba kar ginkoji dəwje gə raŋg lai d’oo ginee ɓa ndɔ gə́ rudu lé a teḛ ɓəi.
Né gə́ mina̰ gə́ ka̰ tuji ne loo
Mar 13.14-23, Lug 21.20-24
15Gelee gə́ nee ɓa loo gə́ seḭ a kooje né gə́ mina̰ gə́ ka̰ tuji ne loo gə́ d’ula ne sul dɔ loo gə́ to gə kəmee to gə́ njetegginta Daniel pa taree mee maktub’g lé (maji kar yeḛ gə́ tura maktubee lé aa rəa dɔ’g kər-kər ya.)#LkD 9.27, 11.31, 12.11 16Yen ŋga maji kar deḛ gə́ d’isi Jude lé d’aḭ d’aw dɔ mbalje’g ləm, 17kar yeḛ gə́ si dɔ kəi’g tar lé rəm uru naŋg odo néje ləa gə́ to mee kəi’g el ləma#Lug 17.31, 18kar yeḛ gə́ sí mee ndɔ’g kara tel ree un kubu ləa gə́ boi yul lé el ləm tɔ. 19Denéje gə́ d’aw gə kèm mee ndəa’g neelé ləm, gə deḛ gə́ ŋgan deeje d’aw d’il mbà dee’g ləm tɔ lé meeko̰ a koso dɔ dee’g ya. 20Maji kar sí raje tamaji mba kar né gə́ seḭ aḭje kaḭyee lé teḛ dɔ sí’g nai kuli əsé gə ndɔ-kwa-rɔ’g el. 21Mbata ndəa neelé némeeko̰ gə́ a gə ra sí lé a kal dɔ loo sula. D’oo garee togə́bè ndɔ tum gin naŋg nee saar ɓasinè lé el ɓəi ləm, d’a koo garee gə́ togə́bè gogo nda̰ bèe el ləm tɔ#LkD 12.1, LkJ 7.14. 22Ɓó lé kuree əw waga el ndá dəw-kunda lə Ala kára kara a kaji el, nɛ mbɔl dɔ deḛ gə́ d’ɔr dee d’unda dee gə kəmee lé kuree a kəw ne waga ya.
23Ɓó lé dəw kára ula sí pana: Kristi lé aar nee əsé yeḛ aar yo kən kara ɔmje meḛ sí dɔ ta’g ləa el. 24Mbata njéndaji Kristije gə njétegginta gə́ ŋgɔmje d’a kuba na̰ kḭ gə mba ra nékɔbje gə némɔrije gə mba su ne kəm dəwje saar deḛ gə́ d’ɔr dee d’unda dee gə kəmee lé ya kara d’a koso keneŋ ləm tɔ. 25Aa ooje, ma nja m’ula sí kédé təsərə mba̰.
26Ɓó lé d’a kula sí pana: Aa ooje, yeḛ aar dɔdilaloo’g aa’n ndá ilaje gɔl sí keneŋ el. Esé ɓó lé d’a pana: Yeḛ si mee kəije’g si’n ndá kara ɔmje meḛ sí dɔ ta’g lə dee el tɔ#Lug 17.23-24. 27Tɔgərɔ ya, to gə́ ndi ḭ bər tel wərərə njal teḛ ar njé gə́ dɔ-gó d’ée lé ndɔ ree lə Ŋgon-dəw lé kara a to togə́bè nja tɔ. 28Loo gə́ yoo-né to keneŋ ndá malje d’a tɔs dɔ na̰ keneŋ ya#Lug 17.37.
Ndɔ tel ree lə Ŋgon-dəw lé
Mar 13.24-27, Lug 21.25-28
29Waga gə́ a korè goo ndɔ némeeko̰ lé ndá né a dəb kəm kàr’g rigim ləm, naḭ a ndogó el ləm, kéréméje d’a toso naŋg dib-dib ləma, nésiŋgamoŋje lə dara kara d’a yə bura ɓugu-ɓugu ləm tɔ#Esa 13.10, 34.4, Joɛ 2.10, 3.4, 4.15, LkJ 6.12-13. 30Yen ŋga, nékwɔji loo ree lə Ŋgon-dəw lé a teḛ dara ndá ginkoji dəwje gə raŋg gə́ dɔ naŋg nee d’a kunda kaar dee no̰ gə kii gèr-gèr ləm, d’a kaa loo koo Ŋgon-dəw gə́ a kḭ dara si ree dan loo-kil’g lə ndi gə siŋgamoŋ gə boo-ronduba ləm tɔ#LkD 7.13, LkJ 1.7. 31Yeḛ a kula kuraje ləa gə́ dara kar dee d’im to̰to̰ gə́ a ɓar kɔr loo lɔi-lɔi ndá yeḛ a mbo̰ dəwje ləa gə́ yeḛ unda dee gə kəmee doi bər gə dɔ-gó ləm, dɔkɔl gə dɔgel ləm tɔ mba mbo̰ dee dɔ na̰’d loo kára ba.
Néndoo gə́ wɔji dɔ kag-kodé
Mar 13.28-31, Lug 21.29-33
32Maji kar sí ooje gosota néndoo gə́ wɔji dɔ kag-kodé lé. Loo gə́ kamee sí idi lururu ndá seḭ pajena ta ndi nai dəb ba ŋga. 33Seḭje lé loo gə́ seḭ ooje néje nee lai gə́ a teḛ togə́bè lé kara maji kar sí ooje gao to gə́ Ŋgon-dəw lé si aw gə́ nee dəb ya, yeḛ aar takəi’g tɔ. 34Ma m’ula sí təsərə, ŋgaka síje d’a nai naŋg nee gə kəm dee ya ɓəi ɓa né neelé a teḛ dɔ dəwje’g ya. 35Dara gə naŋg nee d’a dəs wuduru gə lèlé ba nɛ ta ləm a kudu nda̰ bèe el.
Sije kəmba
Mar 13.32-37, Lug 24.30,34-36
36Ndɔ teḛ lə néje neelé dəw kára kara gər ndəa əsé kàree el. Kuraje gə́ dara lé gər el ləm, Ŋgon-dəw kara gər el ləm tɔ nɛ Bɔbeeje nja gə karee ba ɓa gər. 37Ndɔ ree lə Ŋgon-dəw lé a to asəna gə ndəa ka̰ Noe gə́ né teḛ ne dɔ dəwje’g lé tɔ#Gn 6.5-8. 38Mbata mee ndəaje gə́ kédé ɓa mán bélm taa ne loo ɓəi lé dəwje d’usɔ gə d’ai ləm, diŋgamje gə denéje taa na̰ ləma, ŋgan deeje kara taa na̰ ləm tɔ saar Noe ḭ ne kág uru ne mee bato’g, 39ar dəwje d’isi ne dɔ mbə’g jugum saar ar mán bélm ḭ unda dee ne naŋg rə̰dəŋ-rə̰dəŋ taa dee ne loo yal-yal lé tɔ. Pia gə́ ka̰ Ŋgon-dəw gə́ a gə ree lé nja to kən#Gn 7.6-24. 40Ndəa neelé diŋgamje joo d’a kaar ra kula ndɔ lə dee ndá a kɔs yeḛ gə́ kára kén kunee kya̰ yee gə́ kára njèḛ tɔ. 41Denéje joo d’a kaar kuru né biri ndá a kɔs yeḛ gə́ kára kén kunee kya̰ yeḛ gə́ kára njèḛ tɔ. 42Maji kar sí sije kəmba mbata seḭ gərje ndɔ ree lə Mbaidɔmbaije lə sí el. 43Ooje maji, ɓó lé njekəi gər loo gə́ njeɓogo a gə ree dəa’g loondul’g ndá yeḛ a ra kəmee ra kaa mba kar njeɓogo andə mee kəi’g ləa el#Lug 12.39-40. 44Togə́bè ɓa seḭje kara waje dɔ gɔl rɔ sí kir-kir tɔ mbata Ŋgon-dəw lé a ree dɔ kàr gə́ seḭ ə̰jije lé el.
Ŋgonjelookisi gə́ to majikoji gə yeḛ gə́ to majikoji el
Lug 12.41-48
45See na̰ ɓa gə́ kura gə́ majikoji gə́ inja paw gə́ mbai ləa aree si dɔ kuramareeje’g gə mba kai dee nésɔ dee gə lée-lée lé wa. 46Kura neelé gə́ mbai ləa teḛ dəa’g iŋgá dɔ néra gə́ togə́bè’g ndá a si dan rɔlel’g ya. 47Ma m’ula sí təsərə, yeḛ a kunee kundá gə njekaa dɔ néje ləa lai ya. 48Nɛ ɓó lé kura neelé to njeyèr gə́ ə̰ji ta mée’g pana: Mbai lə neḛ a ree dəb el ɓəi, 49ɓa ḭ bigim ur dɔ njéboakulaje’g ləa un kudu kunda dee ləm, sɔ né gə aḭ kido gə bao-kaiyeeje ləm tɔ 50ndá mbai lə kura neelé a ree ndəa’g əsé kàree gə́ yeḛ a gər’g lé el. 51Mbai lé a kḭ kuru dəa’g kundá gə ndəi gaŋg rəa təgərə-təgərə ləm, a korè gə njéhulaije na̰’d məs ləm tɔ. Lée neelé to loo gə́ d’a no̰ gə mán-no̰ kəm dee’g keneŋ ləm, gə d’a sɔ ŋgaŋ dee keneŋ pəgərə-pəgərə ləm tɔ.
Currently Selected:
Matiyo 24: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
