Matiyo 2

Bao-gosɔnégərje ree Betlehem

1Jeju lé d’ojee mee ɓee gə́ Betlehem loo gə́ mbai Herɔdə to ne njeko̰ɓee gə́ Jude lé. Aa ooje bao-gosɔnégərje d’ḭ bər ree Jerusalem. 2Deḛ dəji pana: Mbai lə Jibje gə́ d’ojee lé see to loo gə́ ra wa. Mbata jeḛ j’oo kérèmé ləa bər ndá jeḛ n’ree mba kwá meḛ sí’g.

3Loo gə́ mbai Herɔdə oo ta neelé ndá yeḛ ɓəl mée’g, njé gə́ Jerusalem lai kara meḛ dee to kəgəgə tɔ. 4Léegəneeya, Herɔdə lé mbo̰ mbai dɔ njékinjanéməsje-je gə njéndaji-maktubje lə dəw-mee-ɓeeje neelé dəji dee loo gə́ d’a gə koji Kristi keneŋ. 5Deḛ d’ilá keneŋ pana: D’a kojee Betlehem ɓeeko̰ gə́ Jude mbata aa oo ta gə́ njetegginta ndaŋg mee maktub’g, wɔji ne dəa lé pana:

6I Betlehem dɔ naŋg lə Juda lé

Ɓee-booje gə́ to ɓeeko̰ gə́ Juda lé d’ur dɔi’g el,

Mbata mbai gə́ a kul dəwje ləm gə Israɛl lé a kḭ keneŋ#Mis 5.1.

7Yen ŋga Herɔdə ula kula ɓar bao-gosɔnégərje gə goo ŋgəḭ ba, tal sə dee ta, dəji dee mba koo ndəa gə́ kérèmé lé un kudu ndɔḭ dara lé gəd. 8Yeḛ ula dee pana: Maji kar sí awje Betlehem, aw dəjije loo gə́ ŋgonkas neelé to keneŋ gəd ooje. Loo gə́ seḭ ḭgáje mba̰ ndá ree ulamje taree mbata ma kara m’ndigi kaw kwá məəm’g tɔ.

9Loo gə́ deḛ d’oo ta gə́ yeḛ ula dee lé ndá deḛ d’ɔd d’aw. Kérémé gə́ d’ée bər lé ɔr no̰ dee saar teḛ sə dee dɔ kəi gə́ ŋgonkas neelé to keneŋ ndá yeḛ rəm aar keneŋ. 10Loo gə́ deḛ d’oo kérèmé neelé ndá rɔ dee lel dee ar dee d’al rɔ dee. 11Deḛ d’andə mee kəi’g ndá d’oo ŋgonkas gə kea̰je gə́ Mari lé. Deḛ d’unda barmba dəb kəm dee naŋg nea̰’g. Tɔɓəi deḛ teḛ gə nébaoje lə dee d’wa ne səa noji, d’aree larlɔr ləm, gə no̰ kag gə́ ə̰də sululu ləma, gə timbá ləm tɔ. 12Tɔɓəi deḛ d’ḭ d’un rəw gə́ raŋg d’unda gaŋg ɓee lə dee mbata deḛ ni, d’oo to gə́ Ala ndəji dee, ɔg dee tel kaw gə rəw gə́ ɓee lə Herɔdə ya.

Deḛ d’aḭ d’aw Ejiptə

13Loo gə́ deḛ d’ḭ d’ɔd d’aw mba̰ ndá né gə́ mḭdi ɓa kura lə Mbaidɔmbaije gə́ dara ur ne dɔ Jisəb’g ulá ne pana: Maji kari uba naŋg ḭta un ŋgonkas gə kea̰je lé aḭ sə dee aw sə dee Ejiptə saar ma nja m’a kulai né gə́ i a ra ɓəi. Mbata Herɔdə lé a gə saŋg loo mba tɔl ŋgonkas neelé ya.

14Jisəb uba naŋg ḭta dan loo’g, un ŋgonkas gə kea̰je lé sa sə dee rəa aw sə dee Ejiptə. 15Yeḛ si keneŋ saar Herɔdə wəi tɔ. Togə́bè ɓa ta gə́ Mbaidɔmbaije ar njetegginta pa gə ndia lé aw ne lée’g béréré pana: M’tel m’ula m’ɓar ŋgonəm m’aree unda loo mee gə́ Ejiptə teḛ lé#Oje 11.1.

16Loo gə́ Herɔdə oo to gə́ bao-gosɔnégərje d’əree togə́bè ndá mée ḭ səa pu aree ula kula Betlehem gə loo-loo ɓeeko̰’g ləa mba kar dee tɔl ŋganje gə́ kas, deḛ gə́ ra ləb joo-joo ləm, gə deḛ gə́ ra ləb joo-joo el ɓəi ləm tɔ wɔji ne dɔ ndɔ teḛ lə kérèmé gə́ gəd gə́ bao-gosɔnégərje d’ulá lé tɔ. 17Ndəa neelé ta gə́ Jeremi gə́ njetegginta pa lé aw lée’g béréré ya.

18Ndu no̰ gə kii ɓar gèr-gèr mee ɓee gə́ Rama,

Dəwje no̰ gə mán-no̰ kəm dee’g d’isi ne ndan ndòo-yoo’g.

Rasel no̰ no̰ ŋganeeje,

Yeḛ ɔs dee-deḛ gə́ d’aw gə mba gɔlee lé rəw

Mbata ŋganeeje lé godo mbad-mbad ya#Jer 31.15.

Deḛ d’ḭ Ejiptə tel d’aw ɓeeko̰ gə́ Israɛl gogo

19Loo gə́ Herɔdə wəi mba̰ ndá né gə́ mḭdi ɓa kura lə Mbaidɔmbaije lé teḛ ne dɔ Jisəb’g mee ɓee gə́ Ejiptə’g ulá ne pana: 20Maji kari uba naŋg ḭta, un ŋgonkas gə kea̰je lé tel aw sə dee ɓeeko̰ gə́ Israɛl, mbata deḛ gə́ ndigi kar ŋgonkas neelé udu lé d’wəi mba̰ ya.

21Jisəb uba naŋg ḭta un ŋgonkas gə kea̰je lé tel aw sə dee ɓeeko̰ gə́ Israɛl lé tɔ. 22Loo gə́ yeḛ oo to gə́ Arkelawus o̰ ɓee gə́ Jude tor bɔbeeje Herɔdə’g ndá yeḛ ɓəl kaw keneŋ. Néni ɓa Ala ulá ne aree sa rəa aw ɓeeko̰ gə́ Galile. 23Yeḛ aw si ɓee gə́ deḛ ɓaree Najaret mba kar ta gə njéteggintaje pa kédé lé aw ne lée’g béréré mbata deḛ pana: Yeḛ neelé d’a ɓaree dəw gə́ Najaret#Mar 1.24, Lug 2.39, Ja̰ 1.45.

Currently Selected:

Matiyo 2: SBA2015

Highlight

Copy