Lugu 9
9
Jeju ula njékwakiláje dɔg-gir-dee-joo lé
Mat 10.5-15, Mar 6.7-13
1Jeju ɓar deḛ gə́ dɔg-gir-dee-joo lé rəa’g ndá ar dee ndukun gə siŋgamoŋ gə mba dum ne dɔ ndilje gə́ yèr lai ləm, ar dee siŋgamoŋ gə mba kɔr ne rɔko̰ rɔ njérɔko̰je’g ləm tɔ. 2Yeḛ ula dee gə mba kar dee d’aw d’ɔr goo ta ɓeeko̰ lə Ala ləm, gə mba kɔr rɔko̰ rɔ njérɔko̰je’g ləm tɔ. 3Yeḛ ula dee pana: Loo gə́ a gə kunje rəw lé ndá unje né kára kara ji sí’g el, unje kag tɔs əsé ɓɔl əsé muru əsé lar el ləm, kubu kara kawje ne gin joo-joo el ləm tɔ. 4Kəi gə́ rara ɓa gə́ seḭ a ka̰dje keneŋ lé ndá sije keneŋ saar gə mba kḭje ne kawje ne ɓee gə́ raŋg. 5Ɓó lé njéɓeeje lé d’wa sí gə́ rɔ dee’g el ndá undaje loo teḛje mee ɓee’g neelé ɓa kundaje kor gə́ gɔl sí’g kɔd-kɔd undaje ne naji lə sí ɔmje dɔ dee’g .
6Deḛ d’ɔd d’aw gə kudu ɓee kudu ɓee d’ila mber tagə́maji lé keneŋ ləm, d’ɔr rɔko̰ rɔ njérɔko̰je’g ləm tɔ.
Mee Herɔdə to kəgəgə
Mat 14.1-12, Mar 6.14-29
7Herɔdə gə́ njeguburu dəb ɓee lé loo gə́ yeḛ oo sor néje lai gə́ teḛ neelé ndá yeḛ oo ta gə́ kəm kḛji dɔ’g el. Mbata njé gə́ na̰je pana: To Ja̰ ɓa unda loo teḛ dan njé gə́ d’wəi’g.
8Njé gə́ raŋg pana: To Eli ɓa unda loo teḛ.
Njé gə́ na̰je pana: Yeḛ gə́ kára mbuna njéteggintaje gə́ ləw lé ɓa unda loo teḛ .
9Nɛ Herɔdə pana: Ja̰ lé ma m’wá m’tuga dəa m’gaŋg mba̰. Ŋga see na̰ tɔɓəi ɓa ma m’oo sor néraje ləa togə́bè tɔɓəi wa.
Togə́bè yeḛ ɔd ndolee gə mba kila kəmee dəa’g kée ne tɔ.
Muru gə́ ḭ dɔ maree’g gə́ kédé-kédé
Mat 14.13-21, Mar 6.30-44, Ja̰ 6.1-14
10Njékaḭkulaje lé tel d’ula Jeju goo néje lai gə́ deḛ ra lé. Ndá yeḛ ɔr dee ɔm dee gée’g ar dee sa rɔ dee d’aw par gə́ ɓee gə́ ria lə Besayida. 11Loo gə́ boo-dəwje d’oo nea̰ lé ndá deḛ d’ɔr na̰ ndolè gée. Jeju wa dee gə́ rəa’g ndoo dee ta gə́ wɔji dɔ ɓeeko̰ lə Ala ləm, yeḛ ɔr rɔko̰ rɔ deḛ gə́ d’aw ndòo njekaji dee lé ləm tɔ.
12Loo gə́ kàr rəm ler gə́ naŋg ndá deḛ gə́ dɔg-gir-dee-joo lé rəm pər gə́ rəa’g d’ulá pana: Maji kari ya̰ boo-dəwje neelé ar dee tel d’aw mee ɓeeje’g ləm, gə dɔ kɔr ndɔje gə́ gugu dɔ loo neelé ləm tɔ gə mba kar dee d’iŋga loo-to keneŋ ləm, gə mba kiŋga nésɔ keneŋ sɔ ləm tɔ. Mbata loo gə́ j’isi keneŋ ɓasinè lé to dɔdilaloo’g gə mḭdé ba.
13Jeju ila dee keneŋ pana: Seḭ nja ar deeje nésɔ d’usɔ.
Deḛ tel d’ilá keneŋ pana, Pil muru mi gə ka̰jije joo ba to nee. Nɛ see jeḛ nja j’a kaw ndogo nésɔ gə́ kəm karee as koso-dəwje lai neelé nja wa.
14Diŋgamje gə́ d’aar keneŋ lé d’as tɔl-dɔg-loo-mi. Jeju ula njékwakiláje pana: Ar deeje d’isi gə kudu dee kudu dee rɔ-mi rɔ-mi.
15Deḛ d’ar dee d’isi naŋg togə́bè lai ya tɔ. 16Jeju odo pil muru gə́ mi gə ka̰jije gə́ joo neelé un ne kəmee aa ne loo gə́ dara tar tɔr ne ndia dɔ’g. Tɔɓəi yeḛ wa gaji, tula ji njékwakiláje’g gə mba kar dee kai boo-dəwje neelé tɔ. 17Dəwje lai d’o̰ d’ar meḛ dee ndan tub-tub ndá d’odo ges muru gə́ nai ɓa rusu budu dɔg-giree-joo.
Piɛrə pa njaŋg pana: Jeju to Kristi ya
Mat 16.13-19, Mar 8.27-29
18Ndɔ kára bèe Jeju ɔr njékwakiláje ɔm dee gée’g sa sə dee rəa aw gə mba ra tamaji ta Ala’g. Ndá yeḛ un ta dəji dee pana: Ma lé see dəwje pata ɗi ɓa dɔm’g wa. See deḛ pana: Ma m’to gə́ dəw gə́ banwa.
19Deḛ d’ilá keneŋ pana: I to Ja̰ Njera-batɛm. Njé gə́ raŋg pana: I to Eli. Njé gə́ raŋg pana: I to gə́ njetegginta gə́ kára gə́ mbuna mareeje gə́ ləw lé ɓa unda loo teḛ dan njé gə́ d’wəi’g .
20Yen ŋga yeḛ tel dəji dee-deḛ nja pana, ŋga see seḭ yḛ̀ pajena ma m’to gə́ na̰ to ŋga wa.
Piɛrə ḭ ilá keneŋ pana: I to Kristi ka̰ Ala lé nja .
Jeju pata kwəi ləa gə teḛ loo-yoo’g ləa
Mat 16.20-28, Mar 8.30–9.1
21Jeju tɔ ta dee ká gə mba kar taree teḛ ta dee’g ja̰ kara ar dəw oo el. 22Tɔɓəi Jeju ila ta dɔ’g pana: Ŋgon-dəw lé lé riri kara néurti a rəa yaa̰ ləm, ŋgatɔgje gə mbai dɔ njékinjanéməsje-je gə njéndaji-maktubje d’a kɔsee rəw ləma, d’a tɔlee ləm tɔ nɛ ndɔ munda gogo ndá yeḛ a kunda loo teḛ loo-yoo’g.
23Tɔɓəi yeḛ ula dee gə gel dee ɓɔgədɔ pana: Ɓó lé nana ɓa gə́ ndigi kun rəw goom’g ndá maji karee mbad rəa-yeḛ nja piriŋ un ne kag-dəs ləa gə ndəa-ndəa, ɓó gə un ne rəw goom’g . 24Nana ɓa gə́ ndigi kaji rəa ndá a kila rəa kɔ ɓəi, nɛ yeḛ gə́ ila rəa kɔ gə mbàm ndá a kaji rəa ya ɓəi . 25Ɓó lé dəw to gə́ njénékiŋgaje lai gə́ dɔ naŋg nee nɛ yeḛ ila kankəmrea kɔ yɔdɔdɔ ndá see to gə́ nékiŋga mba̰ ɓa nee wa. 26Mbata nana ɓa gə́ ra rɔkul dɔm-ma’g gə dɔ taje’g ləm ndá Ŋgon-dəw a ra rɔkul dəa’g loo gə́ yeḛ a ree dan rɔnduba’g ləa ləm, gə ka̰ Bɔbeeje’g ləma, gə ka̰ kuraje gə́ dara gə́ to njémeendaje’g lé ləm tɔ. 27Ma m’ula sí təsərə, njé gə́ na̰je gə́ d’aar neelé d’a kwəi el nja saar njena d’a koo ɓeeko̰ lə Ala lé gə kəm dee nda̰-nda̰ bèe ya.
Dɔ mbal’g lé rɔ Jeju tel wagəsa
Mat 17.1-8, Mar 9.2-8
28Ndɔ aḭ jinaijoo gogo ndá Jeju ɔr Piɛrə gə Ja̰ gə Jak njɔl sa sə dee rəa aw sə dee dɔ mbal’g gə mba ra tamaji. 29Loo gə́ yeḛ si ra tamaji lé ndá kəmee tel ɓəd ləm, kubu ləa tel ndá ndogó jol-jol ləm tɔ. 30Aa ooje, dəwje joo d’aar səa d’aar d’wɔji səa ta, to Moyis gə Eli, 31gə́ teḛ gə rɔnduba lə dee ndá deḛ d’ɔr sor kabee gə́ yeḛ a gə kaw Jerusalem gə mba kɔs bia̰ keneŋ lé. 32Piɛrə gə njékaw səaje lé ɓi tɔ kəm dee jo̰dɔrɔ-jo̰dɔrɔ, nɛ deḛ d’wa kəm dee keneŋ ti, d’oo ne rɔnduba lə Jeju gə dəwje gə́ joo gə́ d’aar səa lé tɔ. 33Loo gə́ dəwje joo neelé sa rɔ dee rɔ Jeju’g d’ɔd d’aw mba̰ ndá Piɛrə ula Jeju pana: Mbai, loo gə́ neelé maji kar sí j’isije keneŋ ya, ar sí n’laaje kəi-kubuje munda, j’wa kára gə kaḭ ləm, kára gə́ ka̰ Moyis ləma, gə kára gə́ ka̰ Eli ləm tɔ. Ta gə́ yeḛ pa lé yeḛ gər rəbee el.
34Loo gə́ yeḛ si pata néje neelé təa’g bèe-bèe ɓəi ndá mum ree liriri dəb dɔ dee’g rigim, loo gə́ njékwakiláje d’oo mum gə́ dəb dɔ dee’g rigim lé ndá ɓəl unda dee badə gaŋg dee. 35Tɔɓəi ndu dəw ɓar mee mum’g neelé pana: Yeḛ neelé to ŋgonəm gə́ m’ɔree m’undá gə kəmee nja, taaje ta təa’g .
36Loo gə́ ndu neelé ɓar oso mbi dee’g ar dee d’oo mba̰ ndá Jeju nja gə karee ba kiao ɓa aar. Njékwakiláje d’ila ta dee maree’g ndag d’ar ta né gə́ deḛ d’oo lé teḛ ta dee’g ja̰ ar dəw oo el tɔ.
Jeju aji ŋgon gə́ ndil gə́ yèr ula kəmee ndòo
Mat 17.14-18, Mar 9.14-27
37Bèlè lookàree d’ḭ dɔ mbal’g rəm d’uru naŋg ndá boo-dəwje gə́ bula digi-digi teḛ yao-yao d’aw mba tila kəm Jeju. 38Aa ooje, diŋgam kára mbuna boo-dəwje’g ra ne wəl pana: Mbai, ma m’ra ndòo rɔi’g mba kari ila kəmi dɔ ŋgonəm’g nee, am m’oo mbata to ŋgon gə́ kára ba ya jim’g. 39Ndil gə́ yèr lé uba ŋgon pḛ́ wá mbiree mba̰-mba̰ ləm, ar əm uba təa’g mbugu-mbugu ləma, aree ra né pénéné aw səa saar tədee rug-rug ləm tɔ ɓa ubá wɔg yá̰ ɓəi. 40Ma m’ra ndòo rɔ njékwakilaije’g gə mba kar dee tuba ndil gə́ yèr neelé ndá lé dum dee təs.
41Jeju tel ilá keneŋ pana: Seḭ ginkoji dəwje gə́ njéndɔjitaje ləm, gə mbim-oo-ta-elje ləm tɔ lé see m’a nai sə sí ndɔm ka̰da tɔɓəi wa. See ndɔ gə́ ra ɓa m’a kəw rɔm meekila ləm gə́ dɔ sí’g wa. Wa ŋgoni lé gə́ rɔm’g nee.
42Loo gə́ ŋgon lé unda dɔ Jeju dəb ndá ndil gə́ yèr lé wá ilá naŋg birig, mbiree mba̰-mba̰. Nɛ Jeju ndaŋg ndil gə́ yèr neelé paḭ ndá aji ne ŋgon lé ɓa wá ulá ji bɔbeeje’g ɓəi. 43Néra gə́ boo lə Ala lé dum dɔ dəwje lai gə́ d’aar keneŋ neelé təs.
Jeju pata kwəi ləa ya tɔɓəi
Mat 17.22-23, Mar 9.30-32
To gə́ néra Jeju lai lé ar kaar nana kara wá paḭ-paḭ ndá yeḛ tel ula njékwakiláje pana: 44Seḭje ɓa yḛ̀, né gə́ m’a gə kula sí taree neelé maji kar sí ooje maji. Ŋgon-dəw lé d’a gə kulá ji dəwje’g.
45Nɛ njékwakiláje gər rəw ta neelé sur el, to ta gə́ to loo-ŋgəḭ’g mbata lə dee ɓəi, nà banelə d’a kḭ gər rəbee. Tɔɓəi deḛ ɓəl kila ɗigi kaaree’g dəjee ne taree tɔ.
See na̰ ɓa a to dəw gə́ boo ur dɔ mareeje’g wa
Mat 18.1-5, Mar 9.33-37
46Yen ɓa deḛ d’un tamaḭ bib d’ila mbuna dee’g tal ne na̰ ta mba gər ne dəw gə́ a kur dɔ dee mbuna dee’g . 47Jeju gər takə̰ji lə dee gə́ meḛ dee’g gao ndá yeḛ ḭ un ŋgon gə́ nai gɔ bèe, uree tar mbɔree’g 48ula dee ne pana: Nana ɓa gə́ wa ŋgon gə́ nai gɔ bèe lé gə́ rəa’g gə rim ndá nai gə́ darɔm-ma nja wam gə́ rəa’g kən, tɔɓəi nana ɓa gə́ wam-ma nee nja gə́ rəa’g ndá nai gə́ dəw gə́ njekulam lé nja wá gə́ rəa’g kən tɔ. Mbata nana ɓa gə́ wa rəa’g gə́ dəw gə́ əḭ el mbuna sí’g ndá njea neelé ɓa to dəw gə́ boo mba̰ ya .
Yeḛ gə́ ɔs sí rəw el ndá to ka̰ sí ya
Mar 9.38-40
49Ja̰ un ta ulá pana: Mbai, jeḛ j’oo dəw kára gə́ ɓar rii ɓa tuba ne ndilje gə́ yèr, nɛ jeḛ j’ɔgee dɔ’g ya mbata yeḛ to gə́ njeboalookaw lə síjeḛ el.
50Nɛ Jeju ilá keneŋ pana: Ɔgeeje dɔ néreaje’g lé el, mbata nana ɓa gə́ ɔs sí rəw el ndá yeḛ to ka̰ sí ya ɓəi.
Njé gə́ mee ŋgon ɓee gə́ Samari d’wa Jeju gə́ rɔ dee’g el
51Ndɔ gə́ Jeju a gə sa rəa mbuna dəwje gə́ dɔ naŋg nee gə mba kḭ kaw dara nai dəb, ar ta kaw gə́ Jerusalem o̰ Jeju yaa̰. 52Yeḛ ula njékaḭkulaje joo nea̰’g ndá deḛ d’un rəw d’aw teḛ mee ŋgon ɓee lə njé gə́ Samari, gə mba gɔl loo-tée keneŋ. 53Nɛ deḛ lé d’wá gə́ rɔ dee’g el mbata dəa to tar wɔji dɔ Jerusalem ɓa. 54Jak gə Ja̰ gə́ to gə́ njékwakiláje lé d’oo bèe ndá deḛ dəjee pana: Mbaidɔmbaije, see i ndigi kar sí j’un ndu sí mba kar pər ḭ dara ree roo dee wa .
55Jeju ḭ ur dɔ dee’g pa sə dee pana: Ndil gə́ ula ta meḛ sí’g lé seḭ gəreeje el. 56Mbata Ŋgon-dəw lé ree gə mba kaji dəwje ɓó gə mba kar dee d’udu ɓa el. Tɔɓəi deḛ d’ɔd d’aw ɓee gə́ raŋg.
Deḛ gə́ ndigi kun dɔ gɔl Jeju
Mat 8.19-22
57Loo gə́ d’isi d’aw rəbə ndá dəw kára bèe ulá pana: Mbai, loo lai gə́ i si aw gə́ keneŋ lé m’a kun gooi lad-lad ya.
58Jeju ilá keneŋ pana: Bolé to njaaje to gən ga̰ ləm, kəi-to yelje kara to gən ga̰ ləm tɔ, nɛ Ŋgon-dəw lé oo loo gə mba kula dəa keneŋ taa kəmə el.
59Yeḛ ula dəw gə́ raŋg pana: Un rəw goom’g.
Nɛ yeḛ neelé ilá keneŋ pana: Mbai, ya̰’m ɓoŋ am m’aw m’dubu bɔm kédé ɓa m’a tel ree gooi’g ɓəi.
60Jeju tel ilá keneŋ pana: Ya̰ yoo-dəwje ar dee dubu na̰. Nɛ i lé ɔd aw ila mber ta ɓeeko̰ lə Ala.
61Dəw gə́ raŋg kára bèe ulá pana: Mbai, ma lé m’a gə kun rəw gooi’g ya, nɛ maji kari ya̰ loo am m’aw m’ra njénojije ləm lapia kédé ɓa .
62Jeju tel ilá keneŋ pana: Nana ɓa gə́ un kwɔs paŋgəm gə mba kaw ne ndɔ ɓa go̰ loo gə́ gée’g ndá ɓeeko̰ lə Ala lé to kea̰ el.
Currently Selected:
Lugu 9: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.