Lugu 8
8
Denéje gə́ d’aw goo Jeju’g ra né d’aree lé
1Gée’g gogo Jeju ɔd keneŋ aw gə́ ɓee boo-boo gə ŋgan ɓee-ɓee ila ne mber tagə́maji gə́ wɔji dɔ ɓeeko̰ lə Ala lé tegginee ar dee. 2Njékwakiláje gə́ dɔg-gir-dee-joo lé d’aw səa ləm, denéje gə́ na̰je gə́ Jeju tuba ndilje gə́ yèr meḛ dee’g ləm, gə ɔr rɔko̰je gə́ ɓəd-ɓəd rɔ dee’g tɔ lé deḛ nja kara d’aw sə dee na̰’d ya tɔ. Deḛje lé nja ɓa ri dee to nee: Mari gə́ ḭ Magdala gə́ ndilje gə́ yèr siri teḛ mée’g lé ləm, 3gə Jan dené lə Suja gə́ njekaa dɔ kəi lə Herɔdə ləm, gə Sujan ləma, gə njé gə́ raŋg gə́ d’aw la sə dee gə nékiŋgaje lə dee ləm tɔ#Mat 27.55-56, Mar 15.40-41, Lug 23.49.
Gosɔta gə́ wɔji dɔ njekila kər lé
Mat 13.1-9, Mar 4.1-9
4Boo-dəwje gə́ bula digi-digi d’ḭ gə ɓee-ɓee mbo̰ dɔ na̰ kəmlə-kəmlə rɔ Jeju’g ndá yeḛ un ta ula dee gə gosota pana:
5Njendɔ teḛ aw ndɔ gə mba kila kər. Loo gə́ yeḛ aar gə mba kila lé ndá njé gə́ na̰je teḛ jia’g wa naŋg kag-rəw’g ar dəwje mbɔḭ naŋg gə gɔl dee ləm, yelje kara ree d’o̰ tɔ. 6Njé gə́ na̰je teḛ wa naŋg dɔ mban-ər’g, loo gə́ uba ndá yeḛ tudu wa gɔgɔgɔ mbata naŋg gə́ to təb njɔl godo keneŋ. 7Njé gə́ na̰je teḛ wa naŋg mee kunje’g, ar kunje d’ḭ turu dəa d’udee lusu. 8Nɛ njé gə́ na̰je teḛ wa naŋg dɔ naŋg gə́ maji’g, loo gə́ yee ḭ ndá andə tɔl-tɔl. Loo gə́ Jeju pata neelé togə́bè mba̰ ndá yeḛ ila boo-ndia naŋg pana: Nana ɓa gə́ mbia to gən gə mba karee oo ne ta ndá maji karee oo ne ya.
Gelee gə́ ar Jeju ndoo dee ne ta gə gosota lé
Mat 13.10-17, Mar 4.10-12
9Njékwakiláje dəjee gin gosota neelé gə mba koo tɔ. 10Yeḛ tel ila dee keneŋ pana: Seḭje lé d’ar kəm sí inja mba kar sí gərje ne ta ɓeeko̰ lə Ala gə́ to loo-kiya’g ya. Nɛ njé gə́ raŋg lé d’ula dee gə gosota ɓa mbata d’oo gə kəm dee ya nɛ d’aa gə́ kaa mbə̰ ləm, d’oo gə mbi dee nɛ ɓar mbi dee’g gə́ ɓar ɓó gər ginee el ləm tɔ#Esa 6.9-10.
Jeju ɔr gin gosota lé
Mat 13.18-23, Mar 4.13-20
11Aa ooje, né gə́ gosota wɔji dəa lé ɓa to nee: Kandə kər lé wɔji dɔ ta lə Ala ya. 12Njé gə́ teḛ ɔm naŋg kag-rəw’g lé wɔji dɔ deḛ gə́ d’oo ta gə mbi dee, nɛ léegəneeya njekurai lé ree, ɔr ta lé meḛ dee’g ho̰d, nà banelə d’a kɔm meḛ dee dɔ’g kaji ne. 13Njé gə́ teḛ ɔm dɔ mban-ər’g lé wɔji dɔ deḛ gə́ d’oo ta lé gə mbi dee ndá deḛ taa gə rɔlel tɔ, nɛ ŋgira ŋgəŋ lə dee godo ar dee d’ɔm meḛ dee dɔ’g waga ba ndá loo gə́ né teḛ dɔ dee’g aḭ meḛ dee ndá d’ɔr ne moŋgyo̰ d’oso yal mba̰. 14Njé gə́ teḛ ɔm naŋg mee kunje’g lé wɔji dɔ deḛ gə́ d’oo ta lé ndá d’ɔd par d’aw d’ar mal néje gə́ ɓəd-ɓəd ləm, gə nébaoje gə́ dɔ naŋg ləma, gə rɔlelje gə́ dɔ naŋg nee ləm tɔ lé d’udu dɔ ta neelé lusu d’aree to asəna gə kandə né gə́ andə gə́ kuree bèe ya. 15Njé gə́ teḛ ɔm dɔ naŋg gə́ maji’g lé wɔji dɔ deḛ gə́ d’oo ta gə meendakaḭ ləm, gə meemaji ləm tɔ ndá d’wa meḛ dee dɔ’g bururu ləm, d’ai meḛ dee dɔ’g sam-sam ləm tɔ ndá d’andə gə kandə dee njim-njim.
Gosɔta gə́ wɔji dɔ néndogó
Mar 4.21-25
16Dəw gə́ rara gə́ ɔs pər néndogó’g ndá a kḭ dəb dəa gə jo əsé a kula gin tira’g el, nɛ yeḛ a kula kagee’g tar mba kar deḛ gə́ d’andə mee kəi’g lé d’oo ne loo njai-njai ya#Mat 5.15, Lug 11.33. 17Mbata né gə́ rara gə́ a kiya rəa kar dee lal tegginee gə́ raga lé godo ləm, əsé né gə́ rara gə́ d iya gə ŋgəḭ gə́ d’a lal gəree əsé teḛ ne gə́ raga lé godo ləm tɔ#Mat 10.26, Lug 12.2.
18Undaje kəmkàr dɔ rɔ sí’g loo koo ta’g lé mbata yeḛ gə́ si gə né jia’g ndá d’a karee maree dɔ’g ya, nɛ yeḛ gə́ si gə né ɓa iŋga maree dɔ’g el ndá d’a kwá taa jia’g tɔ#Mat 25.29, Lug 19.26.
Ko̰ Jejuje gə ŋgakea̰je d’aw rəa’g
Mat 12.46-50, Mar 3.31-35
19Ko̰ Jejuje gə ŋgakea̰je ree gə́ mba kiŋgá, nɛ d’oo loo kaw pər gə́ rəa’g el mbata boo-dəwje rusu loo rəa’g tub-tub. 20D’ulá pana: Kɔḭje gə ŋgakɔḭje d’aar raga ndá deḛ ndigi kooi.
21Nɛ yeḛ tel ila dee keneŋ pana: Deḛ gə́ d’oo ta lə Ala ra née lé deḛ nja ɓa gə́ kɔmje-je gə ŋgakɔmje-je.
Jeju ar lel-boo əw rəa kula
Mat 8.23-27, Mar 4.35-41
22Ndɔ kára bèe, Jeju gə njékwakiláje d’uru mee to’g. Yeḛ ula dee pana: Ar sí n’dəsje j’awje kel tura nu bèe ɓa. Togə́bè d’ɔd d’aw. 23Loo gə́ d’isi nun to ndá Jeju oso gə ɓi pərəg. Lel-boo ula mbḭ-mbḭ ar paŋgəm mán tuga ndá mán rusu to lə dee ar ta yoo dee nai ndḛ́ bèe. 24Deḛ rəm pər gə́ rəa’g ndelee d’ulá pana: Mbai, mbai, jeḛ lé n’saḭ mba̰.
Yeḛ teḛ kəmee yərərə ndá ḭ gə lel ndaŋgee ləm, yeḛ pa gə paŋgəm mán lé ləm tɔ. Léegəneeya lel lé əw rəa kula ləm, dɔ mán kara toso ɗəḭ-ɗəḭ ləm tɔ. 25Tɔɓəi yeḛ ula dee pana: Meekun lə sí ɓa gə́ ra wa.
Yen ŋga kaar dee wa dee paḭ ar ɓəl unda dee badə gaŋg dee ar dee dəji na̰ ta gə ŋgan gwɔs dee pana: See dəw neelé to gə na̰ ɓa wa ta lel gə mán baa-boo daŋ’d ar dee d’oo ta təa’g togə́bè wa.
Jeju aji dəw gə́ ndilje gə́ yèr to mée’g lé
Mat 8.28-34, Mar 5.1-20
26Deḛ teḛ kel tura ɓeeko̰ gə́ lə Gerasaje gə́ wɔji dɔ Galile njoroŋ lé. 27Loo gə́ Jeju unda loo mee to’g teḛ raga ndá dəw kára gə́ mee ɓee’g neelé gə́ ndilje gə́ yèr to mée’g lé teḛ tila kəmee. Dəw neelé ləw-ləw ba saar lé yeḛ ula kubu rəa’g ndɔ kára el ləm, yeḛ oso mee kəi’g mbɔg kara to keneŋ ndɔ kára el ləm tɔ, nɛ dɔɓar ɓa to gə́ loo gə́ yeḛ ra ɓee keneŋ ya. 28Loo gə́ yeḛ un kəmee ɓèd ila dɔ Jeju’g ndá yeḛ uru kii pénéné, rəm bəbərə oso naŋg gɔl Jeju’g, pata gə ndia gə́ boi wəl pana: Ŋgon-Ala gə́ Njekurdɔloo’g, see ɗi ləi ŋga to rɔm’g wa. Ma m’ra ndòo rɔi’g, maji kar i ra səm néɓəŋgərəti el nja kari.
29Mbata Jeju un ndia mba kar ndil gə́ yèr gə́ to mee dəw’g neelé ləw ba lé teḛ mée’g gə́ raga. Deḛ d’wa dəw lé d’ilá kag ləm, teá gə kúla lar ləm tɔ nɛ yeḛ twa kúla lar neelé gaŋg mbidi-mbidi ndá ndil gə́ yèr lé ɔsee aree aw gə dɔdilaloo’g tɔ. 30Jeju dəjee pana: See rii lə nawa.
Yeḛ ndigi təa’g pana: Rim to Bula-dig.
Mbata ndilje gə́ yèr bula to mée’g. 31Deḛ neelé to ta Jeju’g pəgə-pəgə ra ndòo rəa’g mba karee tuba dee ɔm dee mee bwa-wəl gə́ suna godo’g lé el.
32Lée neelé loo gə́ par gə́ kel mbɔr mbal’g lé bər-kosoje d’aar d’o̰ mu keneŋ. Ndilje gə́ yèr neelé to ta Jeju’g pəgə-pəgə mba karee un ndia ar dee, ɓó gə kar dee teḛ d’aw d’ɔm mee bər-kosoje’g neelé. Jeju ndigi sə dee ɗegm. 33Yen ŋga ndilje gə́ yèr neelé d’unda loo mee dəw’g teḛ d’aḭ d’aw d’ɔm mee bər-kosoje’g ndá bər-kosoje lé buŋga na̰ d’aḭ ndida koŋgo puduru-puduru ɓugu mán wɔlɔg nai dan baa-boo’g ho̰d.
34Deḛ gə́ njékul deeje lé təd na̰ d’aḭ d’aw gə taree d’aree oso gə loo mbidi-mbidi mee ɓee-boo’g ləm, gə mee ŋgan-ɓeeje gə́ walá ləm tɔ. 35Yen ŋga koso-dəwje teḛ budu-budu d’aw gə mba koo né gə́ teḛ togə́bè lé. Loo gə́ deḛ teḛ rɔ Jeju’g lé ndá d’aa loo d’oo dəw gə́ ndilje gə́ yèr teḛ mée’g lé ula kubu rəa’g si ne gɔl Jeju’g ləm, si maji ar rəa tḭja péd-péd ləm tɔ ndá ɓəl unda dee badə gaŋg dee. 36Deḛ gə́ d’oo né gə́ teḛ lé d’ɔr sor né gə́ ar njendil gə́ yèr lé aji ne lé tɔ. 37Yen ŋga njé gə́ mee ɓee gə́ Gerasaje lé lai to ta Jeju’g pəgə-pəgə, ra ndòo rəa’g gə mba karee sa rəa rɔ dee’g rəw gə́ raŋg mbata deḛ ɓəl kədm-kədm. Jeju uru mee to’g ɔs tel aw tɔ. 38Dəw gə́ ndilje gə́ yèr teḛ mée’g lé dəjee ɓó gə mba karee yá̰ aree nai səa. Nɛ Jeju ulá pana, 39Maji kari tel aw kəi ləi ya, ɓó gə́ ɔr sor néje lai gə́ Ala ra səi lé ar dee d’oo səi tɔ.
Yeḛ ɔd aw ndá yeḛ ila mber ta néje lai gə́ Jeju ra səa lé mee ɓee-boo’g bura ya.
Ŋgolə Jayirus ləm, gə dené gə́ ɔrɔ ta kubu lə Jeju ləm tɔ lé
Mat 9.18-26, Mar 5.21-43
40Loo gə́ Jeju tel ree mba̰ ndá boo-dəwje lai d’wá gə́ rɔ dee’g mbata deḛ lai d’isi ŋginá. 41Yen ŋga dəw kára gə́ to gə́ mbai gə́ njekəi-kwa-dɔ-na̰ gə́ ria lə Jayirus lé ree ti oso naŋg gɔlee’g to ne təa’g pəgə-pəgə ra ndòo rəa’g mba karee aw kəi ləa, 42mbata ŋgonee gə́ dené gə́ to ŋgon kára gə́ jia’g gə́ ləb kojee aḭ dɔg-giree-joo lé a gə kwəi.
Loo gə́ Jeju si aw gə́ keneŋ ndá boo-dəwje buŋga na̰ gée’g d’aḭ kaaree’g yəg-yəg. 43Dené kára bèe aw sə dee na̰’d, to dené gə́ məs tal rəa’g saar-saar as ləbee dɔg-giree-joo ŋga. Yeḛ jɔg rəa rɔ njékuma̰je’g loo bula, sané némajije ləa kɔ lai, nɛ njekuma̰ gə́ kára kara askəm kajee el. 44Yeḛ teḛ gir Jeju’g ula jia ɔrɔ ne ta kubu ləa ndá léegəneeya məs gə́ tal rəa’g lé ginee gaŋg ŋgaji. 45Yen ŋga Jeju dəji dee pana: See na̰ ɓa ɔrɔ ta kubu ləm nee wa.
Deḛ lai maḭ, nɛ Piɛrə gə deḛ gə́ d’aar səa lé pana: Mbai, i oo boo-dəwje gə́ d’usi wuduru-wuduru nee el ɓəi ɓa see i dəji dəw gə́ njekɔrɔ rɔi tɔɓəi wa.
46Nɛ Jeju ila dee keneŋ pana: Dəw kára ɔrɔ rɔm ya mbata ma m’gər to gə́ siŋgam teḛ ɓəl.
47Dené neelé loo gə́ yeḛ oo to gə́ né gə́ yeḛ ra gə ŋgəḭ lé to raga təsərə ndá ɓəl undá badə gaŋgee aree unda bala tigi-tigi. Yeḛ ti oso naŋg gɔlee’g, teggin kɔrɔ gə́ yeḛ ɔrɔ ne rəa kəm koso-dəwje’g neelé ləm, ulá ne loo kaji gə́ yeḛ aji lé gə́ léegəneeya ləm tɔ. 48Jeju ilá keneŋ pana: Ŋgonəm gə́ dené, meekun ləi taa né ari aji ne ya. Ɔd aw loo ləi gə meekulɔm tɔ.
49Loo gə́ yeḛ si pata bèe-bèe ɓəi ndá dəw ḭ kəi lə ŋgatɔg gə́ mee kəi-kwa-dɔ-na̰’g lé ree ula Jayirus pana: Ŋgoni gə́ dené lé wəi mba̰ ɓó ɔs mbai lé tar ɓɔḭ-ɓɔḭ el ŋga.
50Loo gə́ Jeju oo ta lə dee lé ndá yeḛ ula ŋgatɔg dee gə́ kəi-kwa-dɔ-na̰’g neelé pana: Maji kari ila məəi dɔ maree’g ɓó ɓəl el ndá ŋgoni lé a kaji ya ɓəi.
51Loo gə́ deḛ ree kəi mba̰ ndá Jeju un ndia ar Piɛrə gə Ja̰ gə Jak ləm, gə bɔ ŋgonje gə ko̰ ŋgonje ləm tɔ ɓa d’aw səa kəi. 52Dəwje lai no̰ ra né birim-birim mbata lə ŋgon gə́ wəi lé. Jeju ula dee pana: Ǝwje rɔ sí no̰je, ŋgon lé wəi el, nɛ toɓi ɓa yeḛ to ya.
53Deḛ kogee dɔ ŋgaŋ dee’g ŋgwɔi-ŋgwɔi mbata deḛ gər gao ŋgon lé wəi jib mba̰. 54Nɛ Jeju wa jia ulá ne gə́ ndia gə́ boi wəl pana: Ŋgonəm ḭta.
55Yen ŋga ndil ŋgon lé tel ree rəa’g ndá léegəneeya yeḛ uba naŋg ḭta. Tɔɓəi Jeju un ndia ar dee gə mba kar dee d’aree nésɔ usɔ. 56Njékoji ŋgonje neelé kaar dee wa dee paḭ-paḭ, nɛ Jeju ndəji dee bər-bər gə mba kar dee pa taree d’ar dəw kára kara oo el tɔ.
Currently Selected:
Lugu 8: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
