Njéga̰g-Rəwtaje 3
3
1Aa ooje, ginkoji dəwje gə raŋg gə́ Njesigənea̰ ya̰ dee mba kaḭ ne meḛ Israɛlje gə́ d’oo loo-rɔje gə́ Kana̰ el lé ɓa nee. 2Né kára gə́ yeḛ ndigi lé to mba ndoo Israɛlje gə́ njékorè goo deeje kar dee gər loo-rɔ gə mba ndoo ne deḛ gə́ gər loo-rɔ kédé el lé. 3Ginkoji dəwje gə raŋg lé ɓa nee: Mbaije gə́ mi gə́ to mbai dɔ Pilistije ləm, gə Kana̰je lai ləm, gə Sido̰je ləma, gə Hebje gə́ d’isi kaar mbal gə́ Liba̰, un kudee kaar mbal gə́ Baal-Hermo̰ saar teḛ ne tarəw ɓee-boo gə́ Amat ləm tɔ. 4Ginkoji dəwje gə raŋg neelé to gə́ né kaḭ meḛ Israɛlje mba kar Njesigənea̰ oo see d’a təd kag godnduje gə́ yeḛ ndaŋg ar bɔ deeje-je gə ndu Moyis lé ya wa. 5Togə́bè ɓa Israɛlje d’isi ne mbuna Kana̰je gə Hetje’g, gə Amɔrje gə Peresje’g, gə Hebje gə Yebusje’g tɔ. 6Deḛ taa ŋgan deeje gə́ dené gə́ denéje lə dee ləm, deḛ d’ar ŋgan deeje gə́ diŋgam taa ŋgan dee-deḛje gə́ dené ləma, deḛ pole magəje lə dee ləm tɔ.
Njégaŋ-rəwtaje, Otniel
7Israɛlje ra né gə́ taa kəm Njesigənea̰ el, d’ar meḛ dee wəi dɔ Njesigənea̰, Ala’g lé lə dee ndá deḛ pole magə-Baalje gə magəje gə́ raŋg tɔ. 8Bèe ɓa oŋg lə Njesigənea̰ ḭ səa pu dɔ Israɛlje’g aree uba dee ya̰ dee ne ji Kusan-Risəatayim’g to mbai gə́ Mesɔpotami. Ndá Israɛlje ra kula d’aree as ləb dee jinaijoo. 9Yen ŋga Israɛlje no̰ ɓar Njesigənea̰ ndá Njesigənea̰ ar dee njetaa dɔ dee aree taa dee ɔm dee tar, yeḛ ɓa to Otniel, ŋgolə Kenaj gə́ to ŋgoko̰ Kaleb gə́ ndɔḭ lé. 10Tɔɓəi Ndil Njesigənea̰ dəb dəa’g aree tel to njegaŋ-rəwta mee ɓee gə́ Israɛl. Yeḛ teḛ aw gə mba rɔ ndá Njesigənea̰ ya̰ Kusan-Risəatayim, mbai gə́ Mesɔpotami lé jia’g ndá jia gə́ ɓar mèr-mèr lé aree dum ne dəa ya. 11Bèe ɓa ɓee to ne lɔm as ləb rɔ-sɔ ɓa Otniel, ŋgolə Kenaj wəi ɓəi.
Ehud
12Israɛlje tel ra né gə́ taa kəm Njesigənea̰ el ya tɔɓəi, bèe ɓa Njesigənea̰ ar Eglo̰, mbai gə́ Moab siŋga aree rɔ ne gə Israɛlje mbata deḛ ra né gə́ majel kəm Njesigənea̰’g. 13Eglo̰ mbo̰ Amo̰je, gə Amalekje ɔm dee dəa’g ɔr ne rɔ aw rɔ ne gə Israɛlje. Yeḛ dum dɔ Israɛlje taa ne ɓee-boo gə́ tumburje to keneŋ lé. 14Bèe ndá Israɛlje ra kula d’ar Eglo̰, mbai gə́ Moab tɔ. 15Yen ŋga Israɛlje no̰ ɓar Njesigənea̰ ndá Njesigənea̰ ar dee njetaa dɔ dee gə́ to Ehud, ŋgolə Gera, gə́ to gə́ ginkoji’g lə Bḛjami, nɛ yeḛ lé to gel.
Yeḛ ɓa Israɛlje d’ulá gə nénojije d’aree ar Eglo̰, mbai gə́ Moab. 16Ehud ra kiambas gə́ ŋgaŋgee joo gə́ ŋgal as kəmkil dəw kára, tɔɓəi yeḛ tɔ ɓəree’d gel kubuje’g ləa par gə́ dɔkɔl. 17Yeḛ ar Eglo̰, mbai gə́ Moab lé nénojije neelé. Eglo̰ lé to dəw gə́ rəa ər ndɔl-ndɔl. 18Loo gə́ Ehud ree gə nénojije aree mba̰ ndá yeḛ ya̰ dəwje gə́ d’odo nénojije neelé ar dee d’aw. 19Nɛ yeḛ nja aw saar teḛkɔr mbalje gə́ tɔl dee gə́ magəje gə́ to mbɔr Gilgal’g dəb, ɓa yeḛ ɔs tel aw rɔ mbai’g lé ulá pana: Ǝi Mbai, m’aw gə ta gə́ to loo-kiya’g gə mba kulai.
Mbai lé pana: Teḛje raga! Ndá deḛ lai gə́ d’isi rəa’g lé d’unda loo teḛ raga tɔ. 20Ehud rəm pər gə́ rəa’g loo gə́ yeḛ si gə karee ba mee kəi’g ləa gə́ kul yududu’g lé ndá yeḛ ulá pana: M’aw gə ta lə Ala mbata ləi.
Eglo̰ ḭ kag-siée’g aar tar. 21Togə́bè Ehud ula jigelee ɔr ne kiambas gə́ to ɓəree gə́ dɔkɔl lé ɔs ne mée kub mbudu. 22Kul kiambas ya kara andə gə ndəa̰ na̰’d magə mée’g ar ubee o̰ bia̰ dɔ’g rəd udu, mbata yeḛ ɔr kiambas lé mée’g el. 23Nɛ Ehud unda loo teḛ gə rəw gə́ gel pala’g ndá yeḛ udu tarəwkəije gə́ dɔ maree’g tar gə kɔgərɔ. 24Loo gə́ yeḛ unda loo teḛ raga ndá kuraje lə mbai lé ree d’aa loo d’oo, ndá aa oo, tarəwkəije gə́ tar lé d’udu dee gə́ kɔgərɔ. Ndá deḛ pana: Banelə yeḛ ar ta bwa’g mee kəi-tée’g. 25Deḛ ŋgina kur dee əw ɓa d’oo to gə́ yeḛ ɔr tarəwkəije gə́ to dɔ mareeje’g tar lé el ndá deḛ taa nékɔr tarəw d’ɔr ne takəi ndá aa oo, yoo-mbai lə dee ɓa to naŋg nee. 26Loo gə́ d’aar ŋgina bèe ɓəi ndá Ehud aḭ dəs kɔr mbalje gə́ tɔl dee gə́ magəje lé aw teḛ Seira ɓa taa ne rəa keneŋ. 27Loo gə́ yeḛ teḛ lée’g neelé mba̰ ndá yeḛ im to̰to̰ mee mbalje’d gə́ Eprayim. Israɛlje d’ḭ dɔ mbal’g risi d’ur naŋg səa na̰’d, ndá yeḛ tel to ne njekɔrno̰ dee tɔ.
28Yeḛ ula dee pana: Unje rəw goom’g mbata Njesigənea̰ uba Moabje gə́ to njéba̰je lə sí lé ya̰ dee ji sí’g ŋga.
Deḛ d’ɔm na̰ gée’g d’aw loo-kuru-mán gə́ Jurdɛ̰ gə́ wɔji dɔ Moab njoroŋ, tɔɓəi deḛ d’ya̰ dəw kára kara d’aree gaŋg mán lé el. 29Mee ndəa gən lé deḛ tɔl Moabje as tɔl-dɔg-loo-dɔg (10.000) jén bèe, deḛ lai gə́ to njésiŋgamoŋje ləm, gə bao-rɔje ləm tɔ lé, d’ar dəw kára kara nai el. 30Mee ndəa’g neelé Moabje d’ula dɔ dee no̰ Israɛlje’g. Bèe ɓa ɓee to ne lɔm as ləb rɔ-jinaijoo tɔ.
Samgar
31Njegoo Ehud’g lé to Samgar, ŋgolə Anat. Yeḛ tɔl dəwje gə́ Pilisti as tɔl-misa̰ (600) gə duu maŋgje. Bèe ɓa yeḛ kara to ne njetaa dɔ Israɛlje tɔ.
Currently Selected:
Njéga̰g-Rəwtaje 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
