Njéga̰g-Rəwtaje 4
4
Debora gə Barak
1Loo gə́ Ehud wəi mba̰ ndá Israɛlje ra né gə́ taa kəm Njesigənea̰ el ya tɔɓəi. 2Njesigənea̰ ya̰ dee ji Jabḭ’g, gə́ to mbai gə́ Kana̰, gə́ si o̰ ɓee Asɔr. Mbai dɔ njérɔje ləa gə́ ria lə Sisera lé si ɓee gə́ Haroset-Goyim. 3Israɛlje no̰ ɓar Njesigənea̰ mbata Jabḭ aw gə pusu-rɔje gə́ ra gə larndul tɔl-jinaikara (900) ndá yeḛ ra sə dee néje gə́ kərm-kərm gə́ al dɔ dee sula as ləb rɔ-joo.
4Mee ndəaje’g neelé Debora gə́ to njetegginta gə́ dené gə́ to dené lə Lapidot lé to njegaŋ-rəwta lə Israɛlje. 5Yeḛ si gel tumbur’d gə́ ɓaree tumbur lə Debora gə́ to mbuna Rama gə Betel’g lé ɓa si gaŋg rəwta, kaar mbal’g lə Eprayim, ndá Israɛlje ree rəa’g mba karee gaŋg rəwta lə dee.
6Yeḛ ula kula ɓar Barak, ŋgolə Abinoam gə́ si ɓee gə́ Kedes-Neptali ndá yeḛ ulá pana: Aa oo, ndukun gə́ Njesigənea̰, Ala lə Israɛlje un ari ɓa nee: Ɔd aw ɓar dəwje tɔl-dɔg-loo-dɔg (10.000), deḛ gə́ to Neptalije, gə Jabilo̰je ar dee d’aw səi na̰’d dɔ mbal gə́ Tabɔr, 7ndá neḛ lé n’a kɔs Sisera, mbai dɔ njérɔje lə Jabḭ gə pusu-rɔje ləa, gə kudu njérɔje ləa kar dee rəm pər gə́ rɔi’g ta mán gə́ Kison ndá n’a kubá kyá̰ jii’g.
8Barak ila Debora keneŋ pana: Ɓó lé i aw səm na̰’d ndá m’a kaw ya, nɛ ɓó lé i aw el ndá ma kara m’a kaw el ya tɔ.
9Yeḛ ilá keneŋ pana: M’a kaw səi ya, nɛ i lé a kiŋga rɔnduba gə́ wɔji dɔ kaw gə́ i a gə kaw el mbata Njesigənea̰ a kuba Sisera kyá̰ meḛ ji dené’g ba.
Bèe ɓa Debora ḭ aw ne gə Barak na̰’d ɓee gə́ Kedes tɔ. 10Barak ula kula ɓar Jabilo̰je, gə Neptalije ar dee ree d’iŋgá Kedes, dəwje d’as tɔl-dɔg-loo-dɔg (10.000) d’aw gée’g ndá Debora kara aw səa tɔ. 11Nɛ Heber gə́ to dəw gə́ Keni lé kédé yeḛ ɔr rəa rɔ Kenije’d gə́ to ŋgalə Hobabje gə́ to məəm Moyisje lé aw la kəi-kubu ləa mbɔr kag-sɛnə gə́ to Saanayim, mbɔr Kedes’g dəb.
12D’ula Sisera pana: Barak, ŋgolə Abinoam si aw gə́ dɔ mbal gə́ Tabɔr. 13Bèe ɓa Sisera mbo̰ pusu-rɔje ləa lai gə́ to pusu-rɔje gə́ ra dee gə larndul as tɔl-jinaikara (900) ləm, gə njérɔje lai gə́ d’isi Haroset-Goyim ləm tɔ ar dee d’aw səa na̰’d ta mán gə́ Kiso̰.
14Togə́bè Debora ula Barak pana: Ḭta mbata ɓogənè ɓa to ndɔ gə́ Njesigənea̰ a kuba Sisera kyá̰ jii’g lé kàree teḛ mba̰. See Njesigənea̰ ɓa a kaw kédé nɔḭ’g el wa.
Ndá Barak ḭ dɔ mbal’d gə́ Tabɔr risi ur naŋg gə njérɔje gə́ tɔl-dɔg-loo-dɔg (10.000) gə́ d’aw gée’g lé. 15Njesigənea̰ ar Sisera, gə pusu-rɔje ləa, gə njérɔje ləa lai d’aw dɔ na̰’d pum-pum no̰ kiambas’g lə Barak. 16Barak tuba njérɔje gə pusu-rɔje lə dee saar teḛ ne Haroset-Goyim. Ndá deḛ tɔl njérɔje lə Sisera lai gə kiambas d’ar dəw kára kara nai el.
17Sisera lé aḭ gə gɔlee aw mee kəi-kubu’g lə Jaɛl, dené lə Heber gə́ to dəw gə́ Keni lé, mbata meelɔm to mbuna Jabḭ’d, gə́ to mbai gə́ Asɔr gə njémeekəije lə Heber gə́ to dəw gə́ Keni lé tɔ. 18Jaɛl teḛ tila kəm Sisera ulá pana: Mbai ləm, maji kari ree kəi ləm ya ɓó ɓəl el.
Yeḛ andə mee kəi-kubu’g ləa ndá yeḛ iyá ila pal-kubu gə́ ndər dəa’g. 19Yeḛ ulá pana: M’ra ndòo rɔi’g, am mán bəl m’ai mbata kunda tɔlm.
Ndá yeḛ ɔr ta ku-mbà ləa aree ai ɓa tel ila kubu lé dəa’g ɓəi.
20Yeḛ tel ulá tɔɓəi pana: Maji kari aar tarəw kəi-kubu’g nee. Ɓó lé d’a ree dəjii pana: See dəw si nee wa ndá i a kila dee keneŋ pana: Wah.
21Jaɛl, dené lə Heber un kag gə́ tɔl dəa gə́ ka̰ ɓər kəi-kubu ləm, gə un mo̰ jia’g ləm tɔ, aw ne jan-jan bèe ndá yeḛ unda kag gə́ tɔl dəa lé kwɔji-kəm Sisera’g unda aree mbudu naŋg. Sisera lé ɓi tɔlee pərəg mbata yeḛ dao yaa̰, ndá Jaəl gə́ dené lə Heber lé un kag gə́ tɔl dəa gə́ ka̰ ɓər kəi-kubu ləm, gə mo̰ jia’g ləm tɔ, aw ne jan-jan bèe ndá yeḛ unda kag gə́ tɔl dəa neelé kwɔji-kəm Sisera’g unda ne aree mbudu andə naŋg mag-mag, bèe ɓa yeḛ wəi ne ya. 22Loo gə́ Barak un dɔ gɔl Sisera ndá Jaɛl teḛ tila kəmee ulá pana: Gə́ ree ndá m’a tɔjii dəw gə́ i aw saŋgee lé.
Yeḛ andə mee kəi’g ləa ndá aa oo, Sisera to naŋg tereŋ gə kag gə́ tɔl dəa kwɔji-kəmee’g.
23Mee ndəa’g neelé Ala ar Jabḭ, mbai gə́ Kana̰ ula dəa no̰ Israɛlje’g. 24Ndá ji Israɛlje wɔi ndiŋ-ndiŋ gə́ kédé-kédé dɔ Jabḭ’g, mbai gə́ Kana̰ saar ar dee tujee ne pugudu.
Currently Selected:
Njéga̰g-Rəwtaje 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
