Gḭ-Néje 29
29
Jakob si kəi lə Laba̰
1Jakob ḭ njaa ɔd aw teḛ ɓee lə ŋganje gə́ Bər. 2Yeḛ aa loo ndá yeḛ oo bwa-mán to mee ndɔje’g lé. Badə-kosoje gə́ kudu munda d’aar mbɔree’g dəb, d’wa rɔ dee keneŋ mbata to bwa-mán gə́ d’aw d’ar nékulje d’ai mán keneŋ ya. Biri-mbal gə́ d’udu ne ta bwa-mán neelé boi yaa̰. 3Loo gə́ nékulje lai-lai tɔs dɔ na̰ keneŋ mba̰ ndá deḛ nduburu biri mbal ta bwa-mán’g lé d’ilá raŋg d’ar nékulje d’ai mán ɓa deḛ tel gə mbal neelé d’udu ne ta bwa-mán lé lée’g gogo ɓəi. 4Jakob dəji njékulbadje pana: Ŋgakɔmje, see ḭje ra wa.
Deḛ d’ilá keneŋ pana: Jeḛ j’ḭ Haran.
5Yeḛ dəji dee ya tɔɓəi pana: See seḭ gərje Laba̰, ŋgolə Naɔr wa.
Deḛ ndigi təa’g pana: Jeḛ n’gəree ya.
6Yeḛ dəji dee pana: See yeḛ si gə́ majee ya ɓəi wa.
Deḛ ndigi təa’g pana: Yeḛ si gə́ majee ya ɓəi, tɔɓəi aa oo, ŋgonee gə́ Rasel ɓa aw ree gə badə-kosoje gə́ nee kən.
7Yeḛ pana: Aa oo, kàr nai tar yaa̰ ɓəi, to kàr kɔm badə-kosoje na̰’d bula el ɓəi. Ar deeje mán d’ai ndá awje sə dee loo-sɔ-mu’g ɓa.
8Deḛ d’ilá keneŋ pana: Jeḛ j’askəm ra bèe el saar loo gə́ badə-kosoje lai d’a tɔs dɔ na̰ ndo̰-ndo̰ ɓa. Yee ɓa d’a nduburu biri mbal ta bwa-mán’g kya̰ loo kar badje d’ai mán ɓəi.
9Loo gə́ yeḛ si wɔji sə dee ta bèe-bèe ɓəi ndá Rasel teḛ gə badə-kosoje lə bɔbeeje wai mbata yeḛ to njekul dee ya. 10Loo gə́ Jakob oo Rasel, ŋgolə Laba̰ gə́ to ŋgoko̰ kea̰je ləm, gə badə-kosoje lə naneeje gə́ Laba̰ ləm tɔ ndá yeḛ aw nduburu biri mbal ta bwa-mán’g ar badə-kosoje lə naneeje gə́ Laba̰ lé d’ai mán. 11Jakob il ɓɔl Rasel tɔɓəi yeḛ no̰ gə mán-no̰ kəmee’g tɔ. 12Jakob ula Rasel aree gər to gə́ yeḛ to njenoji lə bɔbeeje ləm, gə ŋgolə Rebeka ləm tɔ. Bèe ɓa Rasel təd ŋgwɔd aḭ aw ula bɔbeeje taree. 13Loo gə́ Laba̰ oo ta lə Jakob gə́ to ŋgolə lə kɔnanee lé ndá yeḛ aḭ aw tila kəmee ləm, wá kaaree’g sud il ɓɔlee ləma, aree ree səa mee kəi’g ləa ləm tɔ. Jakob ɔr sor néje neelé lai ar Laba̰ oo tɔ. 14Yen ŋga Laba̰ pana: Tɔgərɔ ya, i to siŋgarɔm ləm gə dakasrɔm ya ləm tɔ.
Ndá Jakob si rɔ Laba̰’g as naḭ kára doŋgɔ.
Lea gə Rasel
15Tɔɓəi Laba̰ dəji Jakob pana: See i a la səm kari ba gə mba to gə́ i to njénoji ləm ba ya wa. Maji kari ulam né gə́ a to nékoga-dɔ-jii ɓa.
16Laba̰ lé ŋganeeje gə́ dené deḛ joo: Ŋgondəree lé ria lə Lea ləm, yeḛ gə́ ndɔḭ ria lə Rasel ləm tɔ. 17Kəm Lea lé to mbə̰ nɛ Rasel ɓa ma̰də kəmee’g yaa̰ ləm, darəa kara to maji péd-péd ləm tɔ. 18Rasel lé taa kəm Jakob rəgm ndá yeḛ ula Laba̰ pana: M’a ra səi kula ləbm siri gə mbata lə Rasel, ŋgoni gə́ ndɔḭ lé ya.
19Laba̰ pana: Mba kari-i ɓa təa lé lelm unda kam m’unee m’ar dəw gə́ raŋg. Bèe ndá ree si rɔm’g nee ya.
20Togə́bè Jakob ra kula ləbee siri mbata lə Rasel. Nɛ ləbje neelé yeḛ oo asəna gə ndɔje gə́ bəl ba bèe mbata yeḛ ndigee yaa̰. 21Gée gə́ gogo Jakob ula Laba̰ pana: Am dené ləm mbata ndɔje ləm as lée’g mba̰, m’askəm təa ŋga.
22Laba̰ mbo̰ dəwje gə́ loo gə́ nee’g lai na̰’d ndá ra muru gad ar dee. 23Kàrkemetag ndá yeḛ wa ŋgonee gə́ Lea aw səa rɔ Jakob’g ar Jakob lé ɔm səa na̰’d. 24Tɔɓəi Laba̰ ɔr ŋgonjelookisi gə́ ria lə Jilpa ar ŋgonee gə́ Lea gə́ ŋgonjelookisi ləa gə́ dené. 25Bèlè gə ndɔ ndá Jakob ée to gə́ to Lea. Ndá Jakob dəji Laba̰ pana: See ɗi ɓa i ra səm togə́bè wa. See ma m’ra səi kula gə mbata lə Rasel el wa. Ŋga see i su kəm bèe gə mba ɗi wa.
26Laba̰ pana: Kar yeḛ gə́ ndɔḭ taa ŋgaw kédé kya̰ yeḛ gə́ tɔg lé to néjiɓee lə sí loo gə́ nee’g el. 27Maji kari tɔl ndɔ gə́ siri gə yeḛ gə́ neelé ndá j’a kari yeḛ gə́ raŋg to gə mbata kula gə́ i a gə ra səm as ləb siri gogo ɓəi lé tɔ.
28Jakob ra togə́bè ndá yeḛ tɔl ndɔ gə́ siri gə Lea ya tɔ. Bèe ɓa Laba̰ aree ne ŋgonee gə́ Rasel lé gə́ dené ləa ya. 29Laba̰ ɔr ŋgonjelookisi gə́ ria lə Bila ar Rasel gə́ ŋgonjelookisi ləa gə́ dené. 30Jakob ɔm na̰’d gə Rasel gə́ yeḛ ndigee yaa̰ unda Lea lé. Ndá yeḛ tel ra kula ar Laba̰ as ləbee siri gə́ raŋg ya ɓəi.
Ŋgalə Jakob
31Njesigənea̰ oo to gə́ Jakob ndigi Lea el ndá yeḛ aree to ko̰ ŋganje nɛ Rasel ɓa aw kad. 32Lea əskèm oji ŋgon gə́ diŋgam ndá yeḛ unda ria lə Rubḛ, mbata yeḛ pana: Njesigənea̰ oo kəm lootondoo’g ndá ɓasinè ŋgabm a kundam dan kəmee’g ŋga.
33Yeḛ tel taa kèm gə́ raŋg tɔɓəi oji ŋgon gə́ diŋgam ndá yeḛ pa pana: Njesigənea̰ oo gao to gə́ yeḛ ndigim el ya ɓəi ndá yeḛ am ŋgon neelé ya ɓəi. Ndá yeḛ unda ria lə Simeo̰.
34Yeḛ tel taa kèm gə́ raŋg tɔɓəi oji ŋgon gə́ diŋgam ndá yeḛ pa pana: Yee gə́ nee ɓa a kar ŋgabm ɔm səm na̰’d ŋga mbata m’oji ŋganje gə́ diŋgam munda m’aree. Gelee gə́ nee ɓa d’unda ria lə Ləbi.
35Yeḛ tel taa kèm gə́ raŋg ya ɓəi, ndá oji ŋgon gə́ diŋgam ndá yeḛ pa pana: Ɓasinè m’a pidi Njesigənea̰. Gelee gə́ nee ɓa yeḛ unda ne ria lə Juda ya.
Ndá yeḛ əw rəa koji ŋganje ŋga.
Currently Selected:
Gḭ-Néje 29: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
