Gḭ-Néje 28

1Isaak ɓar Jakob tɔr ndia dəa’g ndá un ndia aree togə́bè pana: I a taa dené mbuna ŋganje gə́ Kana̰’g lé el. 2Uba naŋg ḭta, aw Padan-Aram, aw kəi lə Betuel gə́ to kaije lé ndá i a taa dené mbuna ŋgalə Laba̰’g, yeḛ gə́ to nanije lé. 3Maji kar Ala gə́ Bao-siŋgamoŋ lé tɔr ndia dɔi’g ari oji ŋganje bula ləm, ar dee d’ɔs goo na̰ gə́ kédé-kédé kari tel to ne ginkoji dəwje gə raŋg bula ləm tɔ! 4Maji karee ari dɔkaisəgərə lə Abrakam, i ləm gə ŋgakaije səi na̰’d kari iŋga ɓee gə́ i si keneŋ gə́ mbá lé gə́ kaḭ ya, ɓee gə́ yeḛ ar Abrakam lé#Gn 17.4-8.

5Bèe ɓa Isaak ar Jakob ḭ aw ndá yeḛ aw Padan-Aram rɔ Laba̰’g ŋgolə Betuel gə́ to dəw gə́ Aram, yeḛ gə́ to ŋgoko̰ Rebekaje gə́ to ko̰ Jakob gə Esawu lé ya.

Esawu taa dené gə́ raŋg ɓəi

6Esawu oo to gə́ Isaak tɔr ndia dɔ Jakob’g ləm, ulá Padan-Aram mba karee taa dené keneŋ nu ləma, tɔɓəi loo gə́ yeḛ tɔr ndia dəa’g lé yeḛ un ndia aree pana: Yeḛ a taa dené mbuna ŋganje gə́ Kana̰’g lé el ləm tɔ. 7Yeḛ oo to gə́ Jakob oo ta lə bɔbeeje gə kea̰je ndá ɔd aw Padan-Aram tɔ. 8Yen ŋga Esawu oo gao to gə́ ŋganje gə́ dené gə́ Kana̰ lé taa kəm bɔbeeje gə́ Isaak el. 9Ndá Esawu aw rɔ Ismael’g. Yeḛ taa ŋgon gə́ dené gə́ ria lə Mahalat gə́ to ŋgolə Ismael gə́ to ŋgolə Abrakam ləm, gə to kɔnan Nebajotje ləm tɔ lé aree orè dɔ denéje gə́ yeḛ taa dee kédé lé.

Ni gə́ Jakob ni loo gə́ Betel

10Jakob lé ḭ Beer-Seba aw Haran. 11Yeḛ teḛ loo gə́ kára bèe ndá yeḛ to keneŋ loo ndul’g mbata kàr andə mba̰. Yeḛ un kɔr mbal gə́ to loo gə́ nee’g aree to gə́ négəd dəa ndá yeḛ to naŋg lée’g neelé. 12Yeḛ ni ndá yeḛ oo ɗigi gə́ gɔlee wa naŋg nɛ dəa ɔrɔ dara. Tɔɓəi, aa oo, kuraje lə Ala gə́ dara d’al d’aw tar ləm, deḛ risi d’uru naŋg ləm tɔ gə ɗigi neelé#Ja̰ 1.51. 13Aa oo, Njesigənea̰ aar dəa gə́ tar ndá yeḛ pana: Ma m’to Njesigənea̰, Ala lə bɔbije gə́ Abrakam ləm, gə Ala lə Isaak ləm tɔ. Dɔ naŋg gə́ i to keneŋ neelé m’a kari-i gə ŋgakaije tɔ#Gn 13.14-15. 14Ŋgakaije lé d’a bula kasəna gə nduji naŋg. D’a taa loo par gə́ dɔ-gó gə bər ləm, par gə́ dɔgel gə dɔkɔl ləm tɔ ndá ginkoji dəwje gə raŋg lai gə́ dɔ naŋg nee d’a kiŋga dɔkaisəgərə rɔi’g gə rɔ ŋgakaije’g ya#Gn 12.3, 22.18. 15Aa oo, ma m’nai səi ləm, m’a ŋgəmi loo gə́ rara gə́ i a kaw keneŋ ləma, m’a tel səi dɔ naŋg ɓee gə́ nee ləm tɔ Mbata m’a kubai kya̰’i el saar m’a ra né lai gə́ ma m’ulai lé ya ɓa.

16Jakob teḛ kəmee dɔ ɓi’g ləa yərərə ndá yeḛ pana: Tɔgərɔ ya, Njesigənea̰ si loo gə́ nee’g ya nɛ ma ɓa m’gər el!

17Yeḛ ɓəl ndá yeḛ pana: Loo gə́ nee to loo gə́ to ɓəl yaa̰! Loo neelé to kəi lə Ala ləm, loo neelé to tarəw gə́ dara ləm tɔ! 18Jakob ḭta gə ndɔ rad. Yeḛ un kɔr mbal gə́ yeḛ gəd ne dəa lé unda gə́ nékolé-mee ndá yeḛ tər ubu dɔ’g. 19Yeḛ unda ri loo neelé lə Betel. Nɛ kédé lé ri ɓee-boo neelé lə Luj. 20Jakob un ndia pana: Ɓó lé Ala a nai səm ləm, a kaa dɔ rəw mbá gə́ m’aw neelé ləm, ɓó lé yeḛ a kam nésɔ m’usɔ gə kubu kula rɔm’g ləma, 21ɓó lé m’tel mee kəi’g lə bɔm gə meekulɔm ləm tɔ ndá Njesigənea̰ a to Ala ləm ya. 22Kɔr mbal nee gə́ ma m’unda gə́ nékolé-mee lé a to kəi lə Ala ndá néje lai gə́ i a karm lé m’a kai dee loo dɔg ndá m’a kun təa kára kari ya tɔ.

Currently Selected:

Gḭ-Néje 28: SBA2015

Highlight

Copy