Gḭ-Néje 15

Ala man rəa ar Abram

1Loo gə́ ta néje neelé dəs mba̰ ndá né gə́ mḭdi ɓa Njesigənea̰ teḛ ne dɔ Abram’g un ta ulá ne pana: Abram, ɓəl el. Ma m’to dər-rɔ ləi ndá nédɔji ləi a kal dɔ loo.

2Abram tel ilá keneŋ pana: Mbaidɔmbaije gə́ Njesigənea̰, see ɗi ɓa i a kam wa. Ma lé m’aw kari ba lal koji ŋgon. Njekwa-nénduba mee kəi’g ləm lé yeḛ ɓa to Eliéjer gə́ Damas. 3Ndá Abram pana: Aa oo, i am ŋgon məəm el ndá dəw gə́ d’ojee mee kəi’g ləm ɓa a to njekwa-néndubam.

4Yen ŋga Njesigənea̰ tel ulá ta togə́bè pana: Yeḛ neelé a to njekwa-néndubai el nɛ yeḛ gə́ a teḛ məəi’g ya ɓa a to njekwa-néndubai ɓəi.

5Loo gə́ yeḛ teḛ səa raga ndá yeḛ ulá pana: Un kəmi par gə́ dara, tura kéréméje. See i askəm tura dee ya wa.

Tɔɓəi yeḛ ulá pana: Ŋgakaije kara d’a bula togə́bè ya tɔ#Rɔm 4.18, Ǝbr 11.12.

6Abram ɔm mée dɔ Njesigənea̰’g jəb-jəb, yee ɓa Ala tura gə́ némeekarabasur ləa#Rɔm 4.3, Gal 3.6, Jak 2.23. 7Njesigənea̰ ulá tɔɓəi pana: Ma nja m’to Njesigənea̰ gə́ m’ari unda loo mee ɓee gə́ Ur, ɓeeko̰ gə́ Kalde teḛ lé gə mba kari naŋg neelé gə́ kaḭ ya.

8Abram ilá keneŋ pana: Mbai gə́ Njesigənea̰, see ɗi ɓa a karm m’gər ne to gə́ né neelé a to kama wa.

9Njesigənea̰ ulá pana: Maji kari wa ma̰də maŋg gə́ ləbee aḭ munda ləm, gə ma̰də bya̰ gə́ ləbee aḭ munda ləm, gə bàl badə gə́ ləbee aḭ munda ləm, gə dərnda kára ləma, gə ŋgon dərkul kára ləm tɔ.

10Abram wa da-kulje neelé ndá yeḛ riba dee dana-dana, ɔm dee ar dee d’wɔji dɔ na̰-na̰. Nɛ yeḛ riba yelje lé el. 11Yelje gə́ njésɔ mar deeje lé ree d’ila dɔ yoo da-kulje’g neelé ndá Abram tuba dee.

12Loo gə́ kàr a gə kandə ndá Abram oso gə ɓi pərəg. Aa oo ɓəl-boo gə loondul gə́ ndul njudu-njudu ree dəb dəa’g bigim#Jɔb 4.13,14. 13Njesigənea̰ ula Abram pana: Maji kari gər gao, ŋgakaije lé d’a to mbáje mee ɓee gə́ a to ka̰ dee-deḛ el. D’a kwa dee gə́ ɓər ləm, d’a kula kəm dee ndòo as ləb dee tɔl-sɔ (400) ləm tɔ#Tr 1.1-14, NNk 7.6. 14Nɛ m’a gaŋgta dɔ ɓeeko̰ gə́ njekwa dee gə́ ɓər lé ndá gée gə́ gogo d’a kunda loo teḛ gə nébaoje bula tɔ#Tr 12.40-41, NNk 7.7. 15I lé i a kwəi gə meekulɔm. I a si gə rɔlel loo ɓuga’g ləi saar ɓa d’a dubi ɓəi. 16Ŋgakaije gə́ njekɔm’g sɔ lé d’a tel ree loo gə́ nee’g gogo ɓəi. Mbata néra Amɔrje gə́ ndɔji pɔdɔdɔ lé nai ɓəi ɓó teḛ lai el ɓəi.

17Loo gə́ kàr andə mba̰ ndá loondul njudu-njudu. Ndá aa oo, loo-kula-bṵda gə́ sa pər teḛ keneŋ teḛ ləm, ndo̰ pərje gə́ ḭ keneŋ andə mbuna daje gə́ riba’g lé tɔ. 18Mee ndəa’g neelé Njesigənea̰ man rəa ar Abram pana: Dɔ naŋg neelé ma m’ar ŋgakaije, un kudee baa gə́ Ejiptə saar teḛ ne dɔ baa-boo gə́ to baa gə́ Epratə ləm#NNk 7.5, 19dɔ naŋg lə Kenije ləm, gə Kenijije ləm, gə Kadmonije ləm, 20gə Hetje ləm, gə Peresje ləm, gə Repayimje ləm, 21gə Amɔrje ləm, gə Kana̰je ləm, gə Girgasije ləma, gə Yebusje ləm tɔ.

Currently Selected:

Gḭ-Néje 15: SBA2015

Highlight

Copy