2 Njé gə́ Kɔrḭtə 5
5
1Tɔgərɔ ya, jeḛ n’gər gao, ɓó lé kəi-surum gə́ j’isi keneŋ dɔ naŋg nee a kunda naŋg ndá kəi-si sí gə́ kiŋ kiŋ-kiŋ to dara, to kəi gə́ a to gə no̰ gə́ Ala ɓa gə́ njerea, ɓó ji dəw ɓa ra el. 2Togə́bè ɓa kəi-surum neelé jeḛ j’wa mḭ n’tuma̰ keneŋ ŋgururu-ŋgururu, nɛ mal kəi-si sí gə́ dara lé ra sí ŋgwɔd-ŋgwɔd 3mba kar sí j’ula rɔ sí keneŋ luma̰ ɓó mba kar sí j’isi raga ndəgəsə el. 4Mbata loo gə́ jeḛ naije kəi-surum’g ɓəi lé jeḛ j’wa mḭ n’tuma̰ keneŋ ŋgururu-ŋgururu asəna gə dəw gə́ odo nékodo gə́ wɔi bèe, mbata jeḛ ndiŋga rɔ sí mba bɔr dɔ sí yeḛ gə́ ləw’g mbɔji el nɛ mba kiŋga yeḛ gə́ sigi. Bèe ɓa rɔ sí gə́ a gə kunda naŋg lé kəmə gə́ sigi a ko̰ bia̰ dɔ’g réd kudu. 5Yeḛ gə́ unda sí mba kar sí né neelé to Ala nja gə́ ar sí Ndilee unda sí ne gə jia.
6Bèe ndá j’wa diŋgam meḛ sí’g kɔgərɔ. Jeḛ n’gər gao, loo gə́ jeḛ nai gə darɔ sí bura ɓəi lé loo-si sí to ŋgərəŋ ɓó to mbɔr Mbaidɔmbaije’g dəb el. 7Jeḛ lé meekun ɓa jeḛ njaa ne ɓó kəm sí ɓa oo loo el. 8Jeḛ lé j’wa diŋgam meḛ sí’g kɔgərɔ ləm, kuba rɔ sí kya̰ mba kaw kisi gə Mbaidɔmbaije lé to né gə́ wa meḛ sí yaa̰ ləm tɔ. 9Togə́bè ɓa jeḛ j’wa rɔ sí kɔgərɔ dɔ sí gə́ kédé mbata taa ne kəmee loo gə́ jeḛ nai gə darɔ sí ɓəi əsé loo gə́ jeḛ j’a kuba darɔ sí kya̰. 10Mbata lé riri kara jeḛ lai j’a kaarje loo gaŋg-rəwta’g lə Kristi, ɓó gə mba kar nana kara a kiŋga né gə́ wɔji dɔ maji əsé gə majel gə́ yeḛ ra loo gə́ yeḛ nai ne gə darəa ɓəi lé .
Kristi ɓa ɔm sí na̰’d gə Ala lé
11Jeḛ gə́ n’gər loo ɓəl Mbaidɔmbaije lé jeḛ j’oma̰ gə dəwje mba kar dee d’un ne meḛ dee. Ala gər ndaa sí gao ləm, məəm to yel gə́ dɔ sí’g m’pana: Seḭ nja kara ta gə́ meḛ sí’g ɓa ar sí gərje ne ndaa síjeḛ gao ləm tɔ. 12Jeḛ lé jeḛ m’pidi rɔ sí rɔ sí-seḭ’g gɔl kára tɔɓəi el nɛ j’ya̰ loo j’ar sí gə mba kar sí tije rɔ sí dɔ sí’g. Bèe ɓa deḛ gə́ nduba rɔ dee d’wɔji ne dɔ néje gə́ to darɔ dəw gə́ raga ɓó néje gə́ to mee dəw gə́ kəi’g lé el ndá seḭ a kasjekəm kila deeje keneŋ ya. 13Tɔgərɔ ya, ɓó lé dɔm tel wagəsa ndá Ala ɓa m’ra gə mbəa. Ɓó lé dɔm tel to lɔm ndá to lɔm mbata lə sí tɔ. 14Mbata meenoji lə Kristi gə́ to meḛ sí’g ɓa ndɔr sí mbata jeḛ j’ə̰ji meḛ sí’g m’pana: Ɓó lé dəw kára wəi mbata mareeje lai ndá to yoo gə́ a gə tɔl dee mbad ya. 15Yeḛ wəi mbata lə deḛ lai mba kar deḛ gə́ d’isi kəmba lé d’isi kəmba mbata ləa-yeḛ gə́ wəi mbata lə dee ləm, unda loo teḛ dan njé gə́ d’wəi’g mbata lə dee ləm tɔ ɓó mbata lə dee-deḛ el.
16Togə́bè ɓa un ginee ɓasinè lé jeḛ n’gər dəw kára kara gə goo darəa el. Kristi kara ɓó lé jeḛ n’gəree gə goo darəa kédé lé ndá ɓasinè j’a gəree togə́bè el tɔ. 17Ɓó lé dəw ɔm na̰’d gə Kristi ndá yeḛ to dəw-kunda lə Ala gə́ sigi ya. Ɓuga néje gə́ ləw lé sané kad mba̰, aa ooje, néje lai tel to néje gə́ sigi ya. 18Néje lai neelé ḭ rɔ Ala’g ya. Mbɔl dɔ Kristi ɓa Ala lé ɔm sí ne səa na̰’d ləm, yeḛ ɔm ne kula kɔm dəwje na̰’d yəg gə Ala ji sí’g ləm tɔ. 19Mbata Ala ɓa to dərgel Kristi ɓa ɔm ne dəwje gə́ dɔ naŋg nee səa-yeḛ na̰’d ɓó tura ne sə dee goo meekɔsgel lə dee el. Ta kɔm dəwje na̰’d gə Ala yəg lé ɓa yeḛ ɔm ji sí’g mba kar sí j’ɔr gée.
20Bèe ndá jeḛ lé n’to njenai gə dəwje mba Kristi, jeḛ n’taa ndu Ala m’pa ne ta j’ar dee pana: Jeḛ n’ra ndòo rɔ sí’g gə ri Kristi, maji kar sí ɔmje na̰’d yəg gə Ala ya. 21Yeḛ gə́ kaiya ɓar ria el lé Ala telee gə́ darɔ kaiya gə́ doŋgɔ mbata lə sí ɓó gə mba tel síjeḛ gə́ j’ɔm səa na̰’d lé kar sí n’to ne darɔ meekarabasur gə́ doŋgɔ gə́ ka̰ Ala lé.
Currently Selected:
2 Njé gə́ Kɔrḭtə 5: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
