2 Njé gə́ Kɔrḭtə 4
4
Nébao gə́ j’odo gə jo-ɓan lé
1Gelee gə́ neelé ɓa, jeḛ gə́ Ala ɔm kula neelé ji sí’g gə goo meekɔrjol ləa lé meḛ sí ila ne kas el. 2Nérɔkulje lai gə́ dəwje ra loo-ŋgəḭ lé jeḛ j’unda dee ɓad ləm, jeḛ n’ra goso el ləma, ta lə Ala kara jeḛ n’telee raŋg el ləm tɔ. Nɛ jeḛ n’riba dɔ kankəmta j’wɔji ne dɔ rɔ sí, j’ula taree meḛ dəwje’g kəm Ala’g. 3Ɓó lé né on kəm dee dɔ Tagə́maji’g lə sí ndá to né gə́ on kəm dee-deḛ gə́ d’a gə saḭ lé. 4Deḛ gə́ meḛ dee ndər dɔ kɔs Ala rəw’g lé njetaa loo-kɔg gə́ dɔ naŋg nee ɓasinè lé yeḛ nja tɔ kəm dee wə-wə nà Tagə́maji gə́ wɔji dɔ rɔnduba lə Kristi gə́ njekɔr rɔ Ala pai-pai lé a ndogó no̰ dee’g. 5Jeḛ lé j’ɔr ta gə́ wɔji dɔ rɔ síjeḛ ba el, nɛ jeḛ j’ɔr ta gə́ wɔji dɔ Jeju Kristi, Mbaidɔmbaije lé ləm, j’wa rɔ sí gə́ kuraje lə sí-seḭ gə mbata lə Jeju lé ləm tɔ. 6Mbata Ala nja gə́ pa pana: Maji kar lookàr tḭ loondul kad lé yeḛ nja ar lookàr tḭ loondul meḛ sí’g kad mba kar sí n’gər ne rɔnduba lə Ala gə́ ndogó kəm Jeju Kristi’g lé .
7Nébao neelé jeḛ j’odo gə́ jo-ɓan mba kar dee gər gao siŋgamoŋ neelé to gə́ ka̰ Ala ɓó to gə́ ka̰ síjeḛ el. 8Néje ɓəd-ɓəd gə́ ra sí lé un kəi sí lad ya nɛ rəd ɓa rəd sí el, d’ar sí j’isi dan néurti’g nɛ meḛ sí ila kas bilim el, 9d’ula kəm sí ndòo nɛ yeḛ uba sí ya̰ sí pelm el, deḛ kunda sí tila sí nɛ jeḛ n’tuji ne el tɔ. 10Né yoo Jeju lé jeḛ n’taa rɔ sí’g bura gə ndɔ sí ndɔ sí mba kar darɔ sí ɓa riba ne dɔ kaw kəmba lə Jeju təsərə. 11Jeḛ gə́ j’isi kəmba lé d’ɔm sí ta yoo’g ta-ta mbata lə Jeju, darɔ sí gə́ njekunda naŋg lé ɓa kaw kəmba lə Jeju a to ne raga ndəgəsə. 12Togə́bè ɓa yoo ɓa uru kəi meḛ síjeḛ’g nɛ seḭ lé kəmə lé ɓa uru kəi meḛ sí-seḭ’g.
13To gə́ meekun lə sí to gə goo ka̰ yeḛ gə́ ndaŋg taree mee maktub gə́ to gə kəmee’g pana: M’ɔm məəm dɔi’g, yee ɓa m’pa ne gə mbəa. Jeḛ kara j’ɔm meḛ sí dəa’g, yee ɓa jeḛ m’pa ne gə mbəa tɔ . 14Jeḛ n’gər gao, yeḛ gə́ ar Mbaidɔmbaije Jeju unda loo teḛ dan njé gə́ d’wəi’g lé a kar sí n’teḛ gə Jeju na̰’d ya ləm, yeḛ a kar síjeḛ sə sí n’teḛje j’aarje na̰’d nea̰’g ya ləm tɔ. 15Mbata néje lai neelé teḛ mbata lə sí-seḭ ya ɓó gə mba kar loo gə́ noji lé a taa ne loo yéŋgé-yéŋgé ndá ta ra oiyo gə́ a koji ne na̰ ta dəwje’g bula unda njé gə́ kédé lé a kula ne rɔnduba dɔ Ala’g ya.
Kəi-si sí gə́ kiŋ kiŋ-kiŋ
16Gelee gə́ nee ɓa meḛ sí ila ne kas el. Ɓó lé dakasrɔ sí gə́ raga ya̰ maree yag-yag ndá kara rɔ sí gə́ kəi lé ɔs udu kəm rɔ sí’g red-red gə ndəa-ndəa. 17Némeeko̰ gə́ ra sí waga gə́ jeḛ j’oo gə́ né gə́ əḭ el lé a to kó rɔnduba gə́ d’a kula dɔ sí’g saar-saar gə no̰, gə́ lal kwɔji ləm, gə lal kunda ŋgaŋgee ləm tɔ. 18Mbata jeḛ j’ila kəm sí dɔ néje gə́ dum koo’g ɓó dɔ néje gə́ kəm koo’g lé el: mbata néje gə́ kəm koo lé waga ba ndá d’a sané kad nɛ néje gə́ kəm koo el lé d’a to gə no̰.
Currently Selected:
2 Njé gə́ Kɔrḭtə 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
