1 Timote 6
6
Nébao gə́ a kiriŋ kiriŋ-kiriŋ
1Deḛ lai gə́ d’isi ɓee ɓər’g lé maji kar dee tədkag ɓée deeje mba kar dəwje d’oo ne loo kila ne ndɔl dɔ Ala el ləm, gə dɔ ta ndoo’g lə sí el ləm tɔ. 2Deḛ gə́ ɓée deeje to gə́ njétaamee-Kristije lé maji kar dee d’oo ɓée deeje gə́ ŋgako̰ deeje gə́ kari lal təd ne kag dee el. Nɛ maji kar dee ra kula lə dee maji unda nje gə́ kédé mbata ɓée deeje gə́ deḛ ra kula maji d’ar dee lé deḛ to ŋgako̰ deeje gə́ njétaamee-Kristije ya.
Maji kari ndoo dee taje neelé ləm, ndəji dee ne ləm tɔ. 3Ɓó lé nana ɓa ndoo dee ta gə́ to ɓəd ɓó reḛ́ dɔ kankəmta’g lə Jeju Kristi Mbaidɔmbaije lé el ləm, əsé dɔ kwa Ala mée’g gə goo rəbee el ləm tɔ 4ndá yeḛ to njeti rəa mugugu-mugugu ləm, yeḛ gər né el ləm tɔ. Yoo-dəji ta gə yoo-maḭta ɓa malee rəa. Taje neelé ɓa oji kəmkəḭ ləm, gə kɔl ləm, gə təd ta kɔm ta na̰’g ləm, gə kwa na̰ gə meḛ ləma, 5gə maḭta gə́ gə mḭdé-mḭdé ləm tɔ. Deḛ gə́ ra togə́bè lé ndum ta ɓa wa meḛ dee, ar kankəmta kára kara uba meḛ dee təb el tɔ, dee tel ta kwa Ala mée’g gə goo rəbee lé tel to gə́ rəw nékiŋga ba.
6Oiyo, rəwta lə Ala lé loo gə́ mee dəw to lɔm keneŋ ndá to rəw nékiŋga gə́ boo ya. 7Mbata loo gə́ jeḛ n’ree naŋg neelé jeḛ n’ree gə né kára kara ji sí’g el ləm, loo gə́ j’a kya̰ naŋg nee tel ndá kara j’a tel gə né kára kara ji sí’g el ləm tɔ. 8Bèe ndá ɓó lé j’isi gə nésɔ gə kubu kula rɔ sí’g ndá meḛ sí a koso ne naŋg po̰ ya. 9Nɛ deḛ gə́ ndigi tel baoje lé d’oso ne dan nékər’g ləm, gə dan gum’g ləm tɔ, mal némbəje gə néyèrje gə́ ɓugu dəwje dan tuji’g ar dee tuji ne pugudu lé ra dee tɔ. 10Mbata mwəiyoolar ɓa gə́ ŋgira néraje gə́ majel lai. Njé gə́ na̰je gə́ malee ra dee togə́bè lé d’uba ne goo meekun lə dee d’ya̰ ndá deḛ nja d’wa ne nékəmndooje bula ɓugu dɔ dee’g d’ar ɓəŋgərə dee gaŋg ne.
Tandəji gə́ Pool ndəji ne Timote
11I dəw lə Ala lé sa rɔi dɔ mal néje neelé gə́ ra dee ya nɛ ndolè goo meekarabasur ləm, gə rəw kwa Ala məəi’g gə goo rəbee ləm, gə meekun ləm, gə meenoji ləm, gə meekila ləma, gə kaw yururu ləm tɔ. 12Aḭ rɔ dɔ meekun’g ləi ləm, kəmə gə́ gə no̰ gə́ deḛ ɓari keneŋ lé wa kɔgərɔ gə goo ta meekun gə́ inja bao gə́ i ɔr ne gée kəm njékɔrgootareeje’g bula lé ləm tɔ. 13 Ma m’ndəjii kəm Ala gə́ njekula kəmə mee nékundaje’g ləa lai ləm, gə kəm Jeju Kristi gə́ tapea inja paw no̰ Po̰sə Pilatə’g lé ləm tɔ 14mba kari aar njaŋg dɔ godndu’g ləm, gə mba kar məəi ila ne ɓal el ləma, mba kar ta kára kara wa ne dɔi el ləm tɔ, saar ndɔ ree lə Mbaidɔmbaije lə sí Jeju Kristi lé. 15Mee ndəa gə́ wɔji dəa lé Ala gə́ dəa ai səgərə gə́ to Bao-siŋgamoŋ kára ba kiao ləm, gə to Mbai dɔ mbaije ləma, gə to Mbaidɔmbaije ləm tɔ lé a rab Kristi lé gə́ raga. 16Yeḛ nja kára ba kiao ɓa to Njesigənea̰ ləm, yeḛ si dan lookàr gə́ ɔs kəm loo ŋgərəŋ ləma, dəw kára kara ila kəmee dəa’g əsé askəm kée el ləm tɔ lé maji kila riɓar dəa’g ləm, maji karee dum dɔ loo gə ləbee-ləbee saar-saar gə no̰ ləm tɔ. Amen!
17Ndəji baoje gə́ dɔ naŋg nee ɓasinè lé mba kar dee beelé dɔ rɔ dee’g el ləm, gə mba kar dee d’unda meḛ dee yel gə́ dɔ nébaoje gə́ a gə to njaŋg el lé el ləm tɔ. Nɛ maji kar dee d’unda meḛ dee yel gə́ dɔ Ala lé gə́ njedaa sí gə néje rib-rib mba kar sí ndá ne meḛ sí kaḭ. 18Ndəji dee mba kar dee ra né gə́ maji ləm, mba kar dee to bao-njémeemajije ləm, mba kar dee d’wa ne noji pə-pə ləma, mba kar dee d’ḭ ja̰jaŋ d’un ne ta néje lə dee d’ar deḛ gə́ né lal dee lé tɔ. 19Togə́bè ɓa, d’a mbo̰ nébaoje gə́ maji gə́ a kiriŋ kiriŋ-kiriŋ mee ndɔ gə́ a gə teḛ lé, bèe ɓa, d’a si gə kəməgə́ gə no̰ lé gə́ to kankəm né ya tɔ.
20Yen Timote, tɔs kəmi dɔ nébao gə́ d’ɔm jii’g lé, ta gə́ gə mḭdé ba ləm, gə ta gə́ aw gə goo ka̰ Ala lé el lé sa rɔi keneŋ. 21Tamaḭje lə dee gə́ deḛ ɓaree gosonégər, nɛ to ta gə́ lée’g el lé sa rɔi keneŋ. Njé gə́ na̰je gə́ taa ta goso neelé d’uba ne meekun lə dee d’ya̰.
Maji kar sí sije dan noji’g!
Currently Selected:
1 Timote 6: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
