(Evangelio según San Juan) 3

Nicodemo Jesusan tajuamu

1Aajakui makichik fariseo Nicodemo daagtin judío aina nui eme anentsá diitai. 2Nunú kashi Jesusan ausatatus weuwai, nunik:

—Rabí, jutiik dekainaji, aminak Apajuí jintinkagtuati tusa awetabiuwa duka, wagki makichkish ame aents dutikmainchau iwainam jutikmainchau ainawai, Apajuí niijai achataik, tau.

3Tama Jesús ayaak:

—Dekas tajame, aents ataktú akiinachuk Apajuí inamtaijinak wainmain ainatsui, tau.

4Tutai Nicodemo iniak:

—¿Muuntuch wajasush utugsaya akiinmainaita? ¿Ataktú dukují wakeen egkemkag akiinmainait?

5Tutai Jesús ayaak:

—Dekas tajame, yuminum nuigtú Wakaní Pegkejiya nui akiinachuk, Apajuí inamtaijinig waimainchau ainawai. 6Aentsnum akiinaina duka, aentske; Wakania nui akiinauk, wakania duke. 7Wi tajam duka, anentai jegagchamnuk anentaimtipa, nunak: “Ataktú akiinmain” ainawai. 8Daseg ni wajuk wakegawa nunisag umpuawai, nunú dasentu antakmesh, tuwiya minawa, tuja tuwí wegawa duka dekatsme. Juninke ashí aents Wakaní Pegkejin akiinaidaush, tiuwai.

9Tama Nicodemo ayaak:

—¿Dusha wajukaya nunimainaita? tau.

10Tutai Jesús ayaak:

—¿Ame Israela maestrojiyaitkumek, dusha dekatsum? 11Dekas tajame, jutiik dekamu chichainaji, tuja wainkamu etsejuinaji. Tujash jutii taji duka dekaskeapi tatsugme. 12Wi ju nugkanmaya wajiin pachisan takuish dekaskeapi tatsujum aniautigmesh, ¿Utusagmek dekaskeapi titagme nayaimpinmaya pachisa chichaakuish?

13“Makichkish nayaimpinum wakauk atsawai; nayaimpinmaya akaikiuwa duke, duka Aentsmaga akiinauwa nunuwai. 14Moisés dapi dakumká najanamun uwegshunum yakí jiikua numamtuk, Aentsmaga akiinauwa nunash yakí jiikagtinai, 15ashí aents niina dekaskeapi tuidauk, pujut nagkanchaun jukitnume tabaunum.

Apajuí ashí aentsun aneawai

16“Wagki Apajuí ashí aentstin senchi anejatu asa, Uchijí makichkiuchia nuna sujamsauwai, ashí niina dekaskeapi tuidauk megkaekashtinme, ayatak pujut nagkanchau ajitnume tau asa. 17Wagki Apajuik Uchijinak ju nugka juig aents aidaun suwimkan susati tusag awemachui, ayatak aents aidau niiní uwemtan jukitnume tusa awemauwai.

18“Niina dekaskeapi tuidauk, bakumashtinai; tujash niina dekaskeapi tuinatsu duka bakumatnum juwakajui, wagki Apajuí Uchijí makichkiuchia nuna daajin dekaskeapi tichaju asag. 19Dekaskeapi tuinachu bakumakbauwa duka juuwai: tsaaptinuk ju nugká juig tae, tujash aents aidauk tsaaptinnak dakituinawai, suwen imá senchi wakegaidau asag tudau takaina nuna iwaintugkai tuidau asag. 20Wagki ashí aents pegkegchaun takaina duka, tsaaptinnak dakituinawai, nunidau asag tsaaptinnak adijainatsui, pegkegchau aidau takaamujin iwaintugkai tuidau asag. 21Tujash dekaskea nuna takaidauk, tsaaptinnum mininawai, Apajuí wakegamu takaamua nu paan iwainakbau atí tuidau asag”.

Nuwenatna nuna kumpají

22Nuna tii, Jesús jintintaiji aidaujai Judea nugkanum weuwai, nunik nui ditajai pujus yamijatu. 23Nuniai Juagshakam Enón yamijatu, Salimnum tikiju awa nui, nuwi kuashat yumi au asamtai; nuwi aents aidauk weedau yamimajagtatus. 24Nunak Juagkak eke cárcel egkeachbau asa nunikui.

25Nuniamunum Juagká jintintaiji aidau, makichik judiojai pegkeamun pachis tudayinau, 26nunikag Juagkan jegajuawag, chichajuinak:

—Rabí, Jordagka amain amijai pujubia nu, ame ni pachisam etsegmayum nunú yamijattai, kuashat aents aidauk tuwajuinawai, tuidau.

27Tama Juan chichaak:

—Apajuí dutikata tichamunak aentsuk makichkish dutikmaitsui. 28Atumetjume wi tibau antuku aidautigmek, wika Cristuchuitjai, ayatak ni minitin asamtai emtika awemamuitjai tibaijim nunú. 29Nuwenbaunum, nuwe atinun achiaka duka nuwatkatna nuuwai, tuja aishmag nuwenatna nuna kumpajig ayaumas wajas nunú chichatai antak shiig aneawai. Wishakam nunisnuk senchi shiig aneajai ju chichainamu antakun. 30Niiyai imá eme anentam atata duka, nuniakui wika imanchauch juwaktatjai.

Yakiya tauwa nu

31Yakiya tauwa nuuwai ashí nagkaekagtasua duka. Nugkanmayaya duka, nugkanmayagke, nunin asa chichakush nugkanmayanak chichawai. Tujash nayaimpinmaya mina nuuwai ashí nagkaekagtasua duka; 32nunin asa ni wainkamujin nuigtú antukbaujin etsejui, nunitaish makichkish dekaskeapi tuinatsui ni etsegbaunak. 33Tujash ni etsegbaun antujuina nuuwai, Apajuí tabauk dekaske tuina duka. 34Apajuí awemamua duka Apajuí chichamenak chichawai, wagki Apajuí Wakaní Pegkeji ashí susamu asa. 35Apajiya nu Uchijin aneau asa, ashí wají aidaunak niina uwejin idaitusui. 36Duwi niina Uchijin dekaskeapi tuidauk, pujut nagkanchau ajuinawai, tujash niina Uchijiya nuna dekaskeapi tuinachuk, nu pujutak atsujuinawai, nunin asag Apajuí suimkaji ishamaina nunak jukiagtinai, tiuwai.

Currently Selected:

(Evangelio según San Juan) 3: AGR

Highlight

Copy