(Evangelio según San Juan) 2
2
Caná nuwenbaunum Jesús yumin vino emamu
1Kampatum tsawan asa nuwenbau asauwai Caná Galilea nugkanum awa nui. Jesusa dukujish nui pujau. 2Nunú nuwenbaunum Jesusnashkam jintintaiji aidaujai ipawajui, dutikamu asa weajui. 3Nuniamunum vino abuekamtai Jesusan, dukují chichajak:
—Vinonak amukaje, tau.
4Tama Jesús ayaak:
—Dukuwah, ¿wagka dusha minash tujutme? Wi takamainjuk eke mina tsawanjuk jegatsui, tau.
5Tutai ajaamak yujaun María chichajak:
—Ni tujamtata duka imatiksagmek dutikatajum, tiuwai.
6Nui batsatu seis buits kaya najankamu yumi aimtai, judío aidau pegketasa takataiji, makí makichik buitsnumag cincuenta, nuniachkush setenta litro#2.6 “Cincuenta, nuniachkush setenta litro” tawa juka versión (DHH) tawa nuiya jukimui, tikich versión aidauk dos o tres medidas tuinai, tikichik cien litro tuidaush ainawai. tumain pimuidau. 7Jesús ajaamau aidaun chichajak:
—Buitsnum yumi aimjatajum, tiu.
Timatai ajaamau aidau yumin buitsnum betsamtsat aimjaju. 8Dutikawagmatai Jesús chichaak:
—Machik shikikjum fiesta chichamja auwá susatajum, tau. Tutai dutiksag susajui. 9Fiesta chichamjauk yumi vino emamun uwag dekapsauwai, tuwiyanak aikainawa nunak dekatsuk; nunak imá inak aina duke dekaidau, dita yumin aimjaju asag. Nunik fiesta chichamja nu, nuweena nuna untsuká, 10chichajak: —Tikich nuwenaidauk dekatkauk vino pegkejan ajaabau agmae, dutikawag ipak dukap uwajagmatai, dui vino imanchauchin ajamau agmae. Tujash amek, yamaikish vino pegkeja duke ajamá pujame, tiuwai.
11Juna nagkamchak Jesús aents dutikmainchaun iwainakua nunak Caná, Galilea awa nui dutikauwai. Aatus niina imanjin iwainakmatai jintintaiji aidauk dekas Apajuí Uchijimpapita tiajui.
12Nuna dutika Jesusak Capernaúm weuwai ni dukují, niina yachi aidau nuigtú ni jintintaiji aidaujai; nunik nui ujumak tsawan batsamsajui.
Jega Apajuí ememattainum aents batsatun Jesús jiigbau
(Mt. 21.12-13; Mr. 11.15-17; Lc. 19.45-46)
13Judío aidau fiestamtaiji, Pascua jegattak wajasmatai, Jesusak Jerusalén weuwai. 14Nunik jega Apajuí ememattainum waikmá toro aidaun, uwig aidaun, paumá sujin aidaun nuigtú kuichki yapajiin aidaushkam pekajaidaun wainkauwai. 15Nunik nuwi duwap etsentsjamu atatman juki chapikmag, jiyaká iwiyag, jega Apajuí ememattainum batsatunak ashí jiijui, uwig aidaunash, toro aidaunashkam. Dutikak kuichki yapajiin aidau kuichkijinak nugká nagkimjuk, mesajinash akaketkauwai. 16Dutika, paumá sujin aidaun chichajak:
—Jui aina juka jiigtajum. Mina Apajú jeeg, wají sujutai emaigpajum, tiuwai.
17Dutikamtai jintintaiji aidau, agagbaunum chichaak: “Amina jeemnak senchi akasmatjai”, tawa nuna adeajajui.
18Dutiktai judío apuji aiinak:
—¿Wají iwainakmea aents chicham antugtai wajukea nunikmesh aikame? tuidau.
19Tama Jesús ditan ayaak:
—Jega Apajuí ememattaiya ju tegaktatjume, dutikawagmin kampatum tsawan asan ataktú jegamkattajai, tiuwai.
20Tutai judío apuji aidau chichajuinak:
—Cuarenta y seis mijadai ju jega Apajuí ememattai jegamkamua duká, ¿ame kampatum tsawantai jegamkattam? tuidau.
21Tujash ni, jega Apajuí ememattai tawa nunak, niina iyashin taku tiuwai. 22Nuadui, jakamtai ukusbau aajakú nantakmatai jintintaiji aidau adeajajui nuna tiuwa nuna; nunikag Agagbauwa nuna nuigtú Jesús tibauwa nunashkam dekaskeapi tiajui.
Jesusak ashí aents anentaibaujin dekawai
23Jesús fiesta Pascua tutain inagkeaktatus Jerusalén jegaa pujai, kuashat aents niiní dekaskeapi tiajui, aents dutikmainchaun dutikaun wainaidau asag. 24Tujash Jesusak ditanak kajinas anentaimtuinachu, ashí ditanak wainu asa; 25nuniau asa atsumachu aents aidaun pachis etsegtuktinme tusag, wagki nigka aentsun anentaimtajinak shiig dekaju asa.
Currently Selected:
(Evangelio según San Juan) 2: AGR
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2020, Wycliffe Bible Translators, Inc.