Hebreos 9

Ri Rocho Dios che ruwachulew y ri c'o chila' chicaj

1Chupa c'u ri nabe tzij c'o takanic puwi' su'anic calok'nimax uk'ij ri Dios pa jun luwar santo wara che ruwachulew. 2Xyac c'u jun nimalaj carpa “Tabernáculo”#Éx. 26:1-30 quecha che. Wa' queb upa u'anom. Ri nabe upa ja cabi'x “Luwar Santo” che. Chiri' c'o wi ri tzuc'ulibal ak' y c'o ri mexa pa caya' wi ri pam ya'tal chwach ri Dios. 3Chirij c'u jun telón c'o ruca'm upa ja cabi'x “Luwar lic Santo” che. 4Chiri' c'u ri' c'o jun altar re oro pa caporox wi incienso#Éx. 30:1-6 y c'o ri caxa re ri tzij u'anom ri Dios cuc' rutinamit yey wa caxa ch'ukum rij ruc' oro. Chupa c'u ri caxa c'o jun xaro re oro c'o maná chupa, c'o ri bara re ri Aarón, wa' e ri bara xtuxic y c'o ri jutak pera'j abaj pa xtz'ibax wi ri takanic re ri tzij u'anom ri Dios cuc' rutinamit.#Dt. 10:1-5 5Puwi c'u ri caxa c'o queb quic'axwach querubines lic quewon ruc' ruchomalil ri Dios; yey ruc' ri quixic' quich'ukum uwi' ri luwar re cuybal mac.#9:5 Puwi wa caxa camac'amo'x ri quic' re awaj ecamisam echiri' catz'onox cuybal quimac tak ri ticawex chwach ri Dios. Lv. 16:14 Pero wo'ora na cojch'a't ta chi más puwi wa'.

6Jec'uri'la' u'anom ronoje wa'. Chupa c'u ri nabe upa ja re ri Rocho Dios queboc raj chacunel cha' caquilok'nimaj uk'ij ri Dios. 7No'j chupa c'u ruca'm upa ja, xew coc bi ri cajawal raj chacunel pa Rocho Dios, yey wa' xa julaj cu'an pa ri junab. Echiri' coc bi, ruc'a'am bi quiquiq'uel awaj re cu'ya'a puc'axel rumac rire y puc'axel tak ri mac na u'aniquil taj caqui'an ri tinamit. 8Ruc' c'u wa' ri Santowilaj Ruxlabixel ri Dios e cuc'ut chike: Xalok' c'a c'o wa nabe upa ja, e que'elok na utz taj chique ri ticawex queboc chupa ri Luwar lic Santo,#9:8 Raj chacunel pa Rocho Dios xquiporoj incienso y xquiya kasa'n chupa ri nabe upa ja re ri Rocho Dios, pero na utz ta queboc chupa ruca'm upa ja, wa' e ri Luwar lic Santo. Ma xew takal che ri cajawal raj chacunel coc chupa yey xa julaj cu'an wa' pa ri junab. No'j wo'ora ri Cristo e ri Kajawal cach'aw pakawi' chwach ri Dios chila' chicaj, y ruma c'u Rire utz cojoc chwach ri Dios. Heb. 10:19-20 ma c'amaja' cak'alajinic su'anic utz queboc chwach ri Dios. 9Ronoje wa' e jun c'utubal chike ri'oj wak'ij ora, ri kasa'n y rawaj ecamisam chwa raltar na cu'an ta jusuc' che ri quibinic quisilabic ri quelok'niman ri Dios ruc' wa'; ma tob caqui'an ri', c'a caquina' chiquic'u'x c'o quimac. 10Ma wa takanic puwi sa' ri catijic y ri cakumic y puwi sa' ri ca'anic re josk'iquil, xew xurik uchac xalok' c'amaja' copon ruk'ijol echiri' ronoje wa' cajalc'atix ruma ri Dios ruc' ri más utz.

Ruquiq'uel ri Cristo caresaj ri mac

11Ruc' ri Cristo cape wi ronoje ri utz cakac'ul ri'oj, ma wo'ora e Rire ri Kajawal cach'aw pakawi' pa ri Rocho Dios chila' chicaj. Yey wa' wa Rocho Dios más nim y más tz'akat chwa ri xu'an ri Moisés chupa ri luwar catz'intz'otic, ma na achijab ta ri xeyacaw re y na re tane wara che ruwachulew. 12Ri Cristo xa jumul xoc chupa ri Luwar lic Santo cha' cuya colobetajic na jinta utakexic chike. Xu'an c'u wa' na ruma ta quiquiq'uel caprux mama'ib o toro'ib, ma e ruma ruquiq'uel Rire.

13Ri nabe tzij cubi'ij we juna ticawex xuch'ulaj rib ruma ri xuchapo,#9:13 Pa ri Tzij Pixab re ojertan cubi'ij cu'an ch'ul juna ticawex we cuchap juna anima' o cataq'ui' puwi juna mukubal. Nm. 19:16 cajawax rujosk'iquil; camac'amo'x c'u puwi rire quiquiq'uel toro'ib y caprux mama'ib ecamisam#Lv. 15:31; 16:15-16 y chaaj re juna baquilo xporox chwi raltar,#Nm. 19 cha' cu'an tanchi chom y jec'ula' utz coc pa ri Rocho Dios.

14We cu'an c'u ri' wa' ruquiq'uel juna awaj, ¡mac'uwari' ruquiq'uel ri Cristo! Ma ruma ri Ruxlabixel ri Dios na jinta utakexic, ri Cristo, ri na jinta c'ana umac, xuya rib pa camic chwach ri Dios cha' jela' cujosk'ij ri kanima' che ri mac, ri cuc'am lo k'atbal tzij re camic pakawi'. Jec'ula' ruma ri Cristo cakana' chikac'u'x na jinta chi kamac y utz c'u ri' cakalok'nimaj ri Dios c'aslic.

15Ruma c'u ri' la', ri Cristo e cac'amaw kawach chwach ri Dios chupa ri c'ac' tzij. Yey ruma rucamic, c'o cuybal mac chique ri xemacun chuxe' ri nabe tzij,#9:15 Ri nabe tzij e ri xu'an ri Dios cuc' rutinamit Israel chwa ri juyub Sinaí. cha' jela' conoje ri ebusiq'uim ri Dios caquic'ul na ri ubi'tisim Rire chique yey wa' na jinta utakexic. 16Wa jun c'ac' tzij e pacha' juna tzij cutz'ibaj junok cha' cubi'ij china tak quecanaj can ruc' rubitak re we xcamic. Yey cha' utz ca'an ri tz'ibital canok, lic chirajawaxic wi nabe na cak'alajisaxic we caminak chi ri xtz'iban re ri wuj. 17Ec'u wa tzij cajiqui' uwach xew we xcam ri xtz'iban re, yey we ri xtz'iban re c'a c'aslic, ri' c'amaja' utz cajiqui' uwach wa'. 18Jenela' ri nabe tzij xjiqui' lo uwach ruc' quiquiq'uel awaj ecamisam. 19Ma ri Moisés nabe na xubi'ij ronoje ri takanic re ri Tzij Pixab chique conoje ri tinamit; tec'uchiri' xuc'am lana cak y ruc' jun uk'ab che' re hisopo, xuchuk' chupa ri quiquiq'uel toro'ib y caprux mama'ib ecamisam yey wa' cojotal ya' chwach. Tec'uchiri' xumac'ama' puwi ri libro re ri Tzij Pixab y paquiwi conoje ri ticawex. 20Tec'uchiri' xubi'ij chique: «E quic' wa' cujiquiba' uwach ri tzij u'anom lo ri Dios iwuc'»#Éx. 24:8 xcha'. 21Yey pacha' c'u ri xu'an che ri libro, jec'ula' xumac'ama' quiquiq'uel awaj chupa ri Rocho Dios y puwi ronoje ri cachapabexic re calok'nimax ri Dios.#Lv. 8:15 22Ma chupa ri tzijpixab tz'ibital canok, cubi'ij lic q'ui tak ri josk'inic ca'an ruc' ri quiquiq'uel rawaj, yey na jinta c'u cuybal mac we na caturuw tana ri quiquiq'uel rawaj ecamisam.#Lv. 17:11

23Xajawax c'ut jela' ri josk'inic x'an che tak ri cachapabexic re calok'nimax ri Dios, ri xa e uc'axwach tak ri c'o chila' chicaj. Yey ri josk'inic re chila' chicaj más ne lic utz chwa ri ca'an xa ruc' ri quiquiq'uel rawaj ecamisam chwach raltar wara che ruwachulew. 24Ma ri Rocho Dios pa xoc wi ri Cristo na e ta ri 'anom cuma ticawex, ma ri re ruwachulew xa e uc'axwach ri sakil Rocho Dios c'o chila' chicaj; ec'u Rire xoc chila' cha' cach'aw pakawi' chwach ri Dios.

25Ri Cristo xa julaj xuya rib pa camic y xopon c'u chila' chicaj chwach ri Dios. No'j ri cajawal raj chacunel pa Rocho Dios ronoje junab coc chupa ri Luwar lic Santo re cu'ya'a chwach ri Dios ri quic' na ri're taj. 26We ta chirajawaxic wa' che ri Cristo, uq'uiyal laj tane ri' uya'om rib Rire pa camic chwi lo ri jekebal re ruwachulew; no'j wo'ora chupa wa q'uisbal k'ij xa julaj xuya rib pa camic cha' xa jumul caresaj ri mac. 27Lic c'u jiquibam chi uwach conoje ri ticawex xa julaj quecamic, tec'uchiri' cape ri k'atbal tzij paquiwi'. 28Jec'ula' ri', ri Cristo xa julaj xuya rib pa camic cha' jela' caresaj ri quimac uq'uiyal ticawex. No'j echiri' cac'un tanchic, na re ta chi co'lcam ruma ri mac que ri winak, ma e re quebucolobej conoje ri coye'em Rire.

Currently Selected:

Hebreos 9: acrT

Highlight

Copy