Hebreos 8

Ri c'ac' tzij

1Ec'u ruc'u'xibal wa cojtajin che ubi'xiquil e wa': C'o ri Jun cach'aw pakawi' chwach ri Dios, wa' e ri Kajawal, ri xtz'uyi' pa ri luwar lic c'o uwach puwiquik'ab ri Dios, ri Nimalaj Takanel chila' chicaj. 2Cach'aw c'u pakawi' chupa ri sakil Rocho Dios chila' chicaj; yey wa' e ri Dios Kajawxel x'anaw re, na juna achi taj.

3Conoje c'u ri cajawal raj chacunel pa Rocho Dios xecojic cha' caquiya chwach raltar ri kasa'n y rawaj quecamisaxic. Jec'ula' chirajawaxic c'o cuya ri Kajawal chwach ri Dios. 4We ta c'a c'o ri Jesús che ruwachulew, ri' na aj ta chacunel pa Rocho Dios, ma wara c'a e c'o aj chacunel caquik'atisaj ri kasa'n chwach ri Dios pacha' ri cubi'ij ri takanic tz'ibital can ruma ri Moisés. 5Yey ri chac caqui'an rique, xa e uc'axwach y c'utubal re ri ca'an chila' chicaj. Ma echiri' xtak che ri Moisés cuyac ri Rocho Dios xa caquiric, jewa' xubi'ij ri Dios che:

Chawilape', ri wocho cayaco, e cha'ana ronoje che

jela' pacha' ri xinc'ut chawach chwa wa juyub Éx. 25:40

xcha'.

6No'j wo'ora ruchac ri Kajawal más utz chwa ri quichac raj chacunel pa Rocho Dios, ma ruma Rire ri Dios xu'an jun c'ac' tzij kuc' ri'oj. Yey chupa wa tzij c'o bi'tisinic más chom chwa ri re ojertan. 7We ta ec'u la' lic tz'akat xel ri nabe tzij,#8:7 Wa nabe tzij e ri xu'an ri Dios cuc' rutinamit Israel chwa ri juyub Sinaí. ri' pakatzij wi na cajawax tane juna c'ac' tzij. 8Ma ri Dios xuya wa pixabanic chique rutinamit, jewa' xubi'ij:

¡Chitape'! cacha ri Dios Kajawxel.

Copon na ri k'ij echiri' Ri'in can'an jun c'ac' tzij

cuc' ri tinamit e aj Israel y cuc' ri tinamit e aj Judá.#8:8 Chwi lo ri takanic re ri Salomón, xquijach quib rutinamit ri Dios. Xebu'an queb; jun cabi'x “Israel” che y ri jun chic, “Judá”.

9Yey wa' na je ta la' pacha' ri tzij xin'an cuc' ri quichu-quikaw ojertan

echiri' nuchapom che ri quik'ab, xebenuwesaj lo Egipto.

Pero rique na xquitakej ta ri tzij xin'an cuc';

ruma c'u ri', xebenuya canok, cacha ri Dios Kajawxel.

10Q'uisbal c'u re tak la' la k'ij,

e tzij wa' can'an cuc' ri tinamit Israel, cubi'ij ri Dios Kajawxel:

Cancoj ri nutzijpixab pa quijolom

y cantz'ibaj pa canima'.

Ec'u Ri'in quinu'an in qui Dios y rique quebu'an e nutinamit.

11Yey na cajawax ta nenare' c'o junok quebupixabaj

ri rachbi'il y ri ratz-uchak',

jewa' cubi'ij chique: “Chaweta'maj uwach ri Dios Kajawxel.”

Ma chupa la' la k'ij conoje queta'am nuwach Ri'in,

chinima'k chich'uti'k.

12Cancuy c'u quimac

y na cac'un ta chi ne c'ana chinuc'u'x ri na utz taj xqui'ano Jer. 31:31-34

xcha'. 13Echiri' cabi'x “c'ac' tzij”, e que'elawi c'o jun k'ij ri nabe xa quic'owic, ma janipa tak ri cu'an k'e'l y na jinta chi uchac, ri' catajin usachic uwach.

Currently Selected:

Hebreos 8: acrT

Highlight

Copy