Hebreos 10

Ri quic' que rawaj na caresaj ta ri mac

1Ri takanic xuya ri Dios che ri Moisés na e ta ri sakil beyomalil caya'i' chikawach apanok, ma xa e uc'axwach. Yey wa takanic na jinta uchuk'ab re cu'an chom che ri canima' ri ticawex, ri caquicoj quib chwach ri Dios cuma rawaj ecamisam chwa raltar chujujunal junab. 2Ma we ta wa takanic asu cuchomaj ri canima' ri quelok'niman ri Dios, ri' na caquiya ta chi chwach ri Dios rawaj ecamisam, ma caquina' c'u ri' chiquic'u'x na jinta chi quimac. 3No'j na je ta la' u'anom, ma echiri' ri ticawex chujujunal junab caquiya chwach ri Dios rawaj ecamisam, wa' e cucuxtaj chique c'o quimac chwach ri Dios. 4Ma ri quiquiq'uel toro'ib y caprux mama'ib na jinta uchuk'ab re caresaj ri mac.

5E uwari'che ri Cristo echiri' ya cape che ruwachulew, jewa' xubi'ij che ri Dios:

Ri lic ca'aj la na e ta rawaj ecamisam chwa raltar ruc' tak ri kasa'n;

e uwari'che xch'ob la caya la ri nucuerpo cha' e canya wa' chiwach la.

6Yey na xuc'ul ta c'u'x la ri kasa'n re awaj eporom chwi raltar

y ri ecamisam re cuybal mac.

7Ruma c'u wa' ximbi'ij: Lal Dios, ri' in c'o Ri'in

re co'lnu'ana janipa ri rajawal c'u'x la,

jela' pacha' ri tz'ibital panuwi' Ri'in pa ri Ch'a'tem la Sal. 40:6-8

xcha'. 8Nabe cubi'ij: «Ri Dios na xcha ta uc'u'x che tak rawaj ecamisam chwa raltar y tak ri kasa'n y rawaj eporom chwi raltar y tak rawaj ecamisam re cuybal mac.» Ec'u tak wa' na xuc'ul ta uc'u'x tob e ne Rire xtakan che u'anic wa'. 9Tec'uchiri' xubi'ij: «Ri' in c'o Ri'in re co'lnu'ana janipa ri rajawal uc'u'x ri Dios.» Ri que'elawi e quel ri ca'an ojertan re quecamisax awaj chwach ri Dios y puc'axel wa' e catiqui' can ri xu'an ri Cristo. 10Jec'ula' ri Kanimajawal Jesucristo e xu'an ri rajawal uc'u'x ri Dios echiri' xu'an jusuc' chike ruma xuya rucuerpo pa camic; yey wa' xa julaj xu'ano ma na cajawax taj cu'an tanchic.

11Pakatzij wi juna aj chacunel pa Rocho Dios ronoje k'ij xaki e cu'an ruchac y quebucamisaj c'u rawaj chwa raltar, tob wa' na caresaj ta c'ana ri mac. 12No'j ri Cristo xa julaj xuya rib pa camic ruma ri mac; tec'uchiri' xe'tz'ula puwiquik'ab ri Dios. 13Y chwi c'u lo ri' la', e roye'em queya' na xe'rakan Rire ri tzel quebilow re. 14Ruma c'u xa julaj xuya rib pa camic, xa jumul xu'an jusuc' chique ri quiya'om quib puk'ab ri Dios. 15Yey ri Santowilaj Ruxlabixel ri Dios cujiquiba' uwach wa' chike, ma nabe na cubi'ij:

16E tzij wa' can'an cuc' ri nutinamit

chupa tak la' la k'ij:

Cancoj ri nutzijpixab pa canima'

y cantz'ibaj pa quijolom, cacha ri Dios Kajawxel. Jer. 31:33

17Tec'uchiri' cubi'ij:

Y na cac'un ta chi c'ana chinuc'u'x ri quimac

y ri na utz taj xqui'ano Jer. 31:34

cacha'. 18Jec'uri'la', we ri mac cuytajinak chic, ri' na cajawax ta chic cacamisax awaj chwa raltar re caresaj ri mac.

Lic chirajawaxic wi cakachuk'ubej kib chwach ri Dios

19E uwari'che hermanos, wo'ora ya'tal chike cojoc chupa ri Luwar lic Santo ruma ruquiq'uel ri Kanimajawal Jesucristo. 20Ruma c'u ri Cristo, ya'tal jun c'ac' c'aslemal chike y c'o koquibal chwach ri Dios, yey wa c'ac' oquibal e ri Cristo. Echiri' Rire xu'an ticawex y xcam chwa ri cruz, e xresaj ri k'atibal, ri na xuya ta luwar cojopon chwach ri Dios. E pacha' ri telón c'o pa Rocho Dios, ri na cuya ta luwar chique ri ticawex queboc pa ri Luwar lic Santo. Yey wa' xrich'robic echiri' xcam ri Cristo.#Mt. 27:51; Mr. 15:38; Heb. 6:19; 9:3-12 21Ec'u wo'ora c'o ri Kajawal lic nim uk'ij, ri cach'aw pakawi' chwach ri Dios yey catakan pakawi' ri oj utinamit ri Dios.#10:21 Pa ri ch'a'tem griego cubi'ij “catakan puwi ri Rocho Dios”. Pa ri ch'a'tem griego ri ch'a'tem “rocho” na xew ta e que'elawi “ri ja”, ma también que'elawi ri ejekel chupa. Heb. 3:6 22E uwari'che chojkib chwach ri Dios ruc' ronoje kanima' y ruc' ri cubulibal kac'u'x tiquil chi utz, ma cuna' kac'u'x na jinta chi kamac ruma josk'ital ri kanima' che ri na utz taj, jela' pacha' ri kacuerpo echiri' ch'ajtal chi ruc' chomilaj ya'.#10:22 Wa' e que'elawi echiri' xkac'ul ri bautismo, xkaya can ri k'e'l kabinic. Ef. 5:26; 1 P. 3:21 23E kajiquibam uwach cakac'ul janipa rubi'tisim ri Dios; lic chojtiquila c'u jusuc' che ri cubulibal kac'u'x puwi ri koye'em che ri Dios, ma Rire na cujalc'atij ta rubi'tisinic u'anom chike. 24Katzucuj c'ut su'anic cakato' kib chikibil kib cha' jela' canimar ri rutzil kac'u'x y ri utzilaj chac caka'ano. 25Maka'an ke'oj pacha' ri caqui'an jujun, ri cok'otam caquimol quib kuc' re cakalok'nimaj uk'ij ri Dios y re cakanimarisaj kac'u'x chikawach; ri ka'ana' e más kapixabaj kib chikawach wo'ora, ma keta'am ruc'unibal ri Kanimajawal Jesucristo lic xa nakaj chi c'o lo wi.

Makesaj kib chirij ri Cristo

26We e la' lic xkamaj usuc' ri K'ijsak puwi ri Cristo, yey na ruc' ta c'u ri', lic u'aniquil wi cojmacun chirij Rire, makach'ob c'u ri', c'a c'o caya'i' chwach ri Dios re caresaj ri kamac. 27Ma we e caka'an wa', ri' catewun chi ne pakawi' runimal k'atbal tzij xibibal uwach y ri ak' cajinowic pa queya' wi conoje ri tzel caquil ri Dios. 28Echiri' c'o junok cupalajij ri Tzij Pixab re ri Moisés, yey we e c'o c'u ca'ib oxibok xebilow re, ri' asu cacamisaxic.#Dt. 17:6; 19:15 29Jec'ula', we c'o junok cuc'ak bi uk'ij Ruc'ajol ri Dios, cu'an pacha' na jinta uchac che ruquiq'uel ri Kanimajawal Jesucristo y tzel cach'a't ne chirij ri Ruxlabixel ri Dios ¿na cuc'ul ta neba unimal c'axc'obic ruma cu'an wa'? Ma ruquiq'uel ri Kanimajawal e cujiquiba' ri tzij u'anom ri Dios kuc' y cu'an jusuc' chike; yey ri Ruxlabixel ri Dios e caya'w ri unimal rutzil uc'u'x ri Dios chike. 30Ma ri'oj keta'am china ri xubi'ij wa':

Panuk'ab Ri'in c'o wi cank'at tzij

paquiwi ri quebanaw re ri na utz taj;

In c'u ri' ri quin'anaw uc'axel chique Dt. 32:35

xcha ri Dios Kajawxel. Yey jewa' tanchi cubi'ij:

E ri Dios cak'ataw tzij puwi rutinamit Dt. 32:36; Sal. 135:14

cacha'. 31¡Lic c'u xibibal uwach che junok we ruma cupetisaj royowal ri Dios c'aslic, catzak puk'ab Rire!

32C'una c'u chic'u'x alak, echiri' c'ac' xc'ul alak ri K'ijsak, lic xcuy alak ruc' unimal c'u'xaj ri c'axc'obic xic'owibej alak ruma cojom alak rubi' ri Cristo. 33Jutak laj c'u ri', c'o ri xquich'amij alak y lic xqui'an c'ax che alak chiquiwach ri winak; jutak laj chic e ne ralak xya' ib alak che quito'ic ri quebic'ow chupa wa' wa c'axc'obic. 34Lic c'u xjuch' ca'n c'u'x alak chique ri e c'o pa cárcel. Yey echiri' xmaj ne ri bitak e alak, ruc' qui'cotemal xch'ij alak wa'. Ronoje tak wa' xcuy alak ma eta'am alak chila' chicaj c'o wi ri bi'tisim che alak y wa' e ne más utz chwa ri xa re ruwachulew, ma e tak ri c'o chila' chicaj lic cacowinic.

35E uwari'che lic maya can alak ri cubulibal c'u'x alak ruc' ri Dios, ma la' la cubulibal c'u'xaj cuc'am lo unimal rajil uc'axel che alak. 36Lic c'u chirajawaxic cach'ij alak ri c'axc'obic cape pawi' alak ruc' unimal c'u'xaj, cha' echiri' 'anom chi alak janipa ri rajawal uc'u'x ri Dios, cac'ul na alak rubi'tisim lo Rire che alak. 37Ma Ruch'a'tem ri Dios jewa' cubi'ij:

Xa jubik' chi caraj, yey ri Jun cac'unic,

cac'un na y na camayin taj.

38China c'u ri lic jusuc' chinuwach,

ri' c'o uc'aslemal ruma ri cubulibal uc'u'x wuc'.

Yey we xresaj rib che ri cubulibal uc'u'x wuc';

Ri'in na quinqui'cot ta chi ruc' Hab. 2:3-4

cacha'. 39Konoje c'u ri'oj, na oj ta cuq'uil ri caquesaj quib chirij ri Cristo y xa casach quiwach, ma e oj cuq'uil ri caquic'ul ri c'aslemal na jinta utakexic ruma cubul quic'u'x ruc' Rire.

Currently Selected:

Hebreos 10: acrT

Highlight

Copy