Gálatas 6
6
Kato'o kib chikawach
1Hermanos, we xna'bej alak c'o junok tzakinak pa mac, e ralak ri c'amom wach alak ruma ri Ruxlabixel ri Dios, to'o alak cha' cayactajic. Yey chajij ib alak ma c'axtaj catzak ralak chupa wa' wa xu'an rire. 2To'o ib alak chiwach alak we c'o junok che alak c'o pa c'axc'obic, ma jec'uri'la' catajin alak che u'anic ri tzij xuc'ut can ri Cristo. 3Ma we c'o junok cuch'obo lic c'o uwach ruma ri cu'ano yey na e ta c'u u'anom, ri' utuquel cusoc rib. 4E uwari'che chirajawaxic wi chikajujunal cakach'ob chi utz puwi ri ka'anom. Y we utz ri ka'anom chwach ri Dios, chojqui'cot c'u ri', pero maka'an c'u nim che kib xa ruma ka'anom más chiquiwa ri jujun chic. 5Ma ri chirajawaxic wi e chikajujunal cakac'am bi ri c'o chikakul caka'ano.
6We c'o junok cuc'ut Rutzij Upixab ri Dios che alak, chirajawaxic wi cato' alak rire ruc' ri bitak e alak.
7Masocosa' ib alak: Na jinta junok casocow re ri Dios. E chirij ri cutic junok, e jela' ri cumolo. 8Ma we junok e cuya rib che tak ri rayibal re ruti'jil, ri' e cuc'am lo ri camic puwi'. No'j we junok e cuya rib che u'anic ri caraj ri Ruxlabixel ri Dios, ri' che ri Ruxlabixel cuc'ul ri c'aslemal na jinta utakexic. 9Mojcos che u'anic ri utz y makok'otaj ne u'anic wa', ma copon na ruk'ijol que'kila uwach rujik'obalil ri ka'anom. 10E uwari'che, we c'o pakak'ab caka'an ri utz, e ka'ana c'u ri' wa' chique conoje, y más e ka'ana ri' chique conoje ri quicojom rubi' ri Cristo.
Q'uisbal uch'a'tem ri Pablo che riglesia c'o Galacia
11Chilape alak, ruc' nimak tak letras quintz'iban pan che alak. 12Ri jujun caquibi'ij che alak e lic chirajawaxic wi cacoj alak ri retalil re circuncisión, caqui'an wa' xa e cha' na caquijal ta uchi' chiquiwach jujun chic y cha' na cape ta c'ax paquiwi' ruma caquitzijoj rucamic ri Cristo chwa ri cruz. 13Ma ri jujun caquimin alak chupa che ucojic ri retalil re circuncisión, rique na caqui'an tane ronoje ri Tzij Pixab; xew cacaj caquitac'aba' quik'ij ruma xcoj alak quitzij. 14No'j ri'in na cuaj ta c'ana cantac'aba' nuk'ij, xew lic canyac uk'ij ri Kanimajawal Jesucristo ruma ri xu'an Rire chwa ri cruz. Ruma c'u ri', na cacha ta chi nuc'u'x che tak ri xa re ruwachulew; ronoje wa' e pacha' caminak chi chinuwach ri'in; yey ri'in e pacha' in chi caminak chwach tak ri xa re ruwachulew. 15Ma we oj re ri Kanimajawal Jesucristo, na jinta chi que'elawi we cakacoj ri retalil re circuncisión o we na cakacoj taj; ma ri lic caraj Rire, e cu'an c'ac' ri kabinic kasilabic. 16Onoje c'u ralak ri takem alak wa' wa c'utunic puwi ri c'ac' kabinic, c'ulu alak ri utzil chomal y ri rutzil uc'u'x ri Dios, junam cuc' rutinamit Israel, ri pakatzij wi e re Rire.
17Chwi c'u wo'ora, na cuaj taj c'o juna latz'anel chwe puwi ri nuc'utunic, ma che ri nucuerpo k'alaj tak ri c'utubal re ri c'axc'obic xinic'ow wi ruma in jun aj chac re ri Kanimajawal Jesucristo. 18Hermanos, c'ola c'u pa anima' alak ri unimal rutzil uc'u'x ri Kanimajawal Jesucristo. Amén.
Currently Selected:
Gálatas 6: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.