Gálatas 5
5
Ri Cristo ojresam chi chuxe' ri takanic que raj judi'ab
1E chuk'ubej ib alak che ri colobetajic xya'i' chike ruma ri Cristo echiri' xojresaj lo chuxe' ri takanic que raj judi'ab; maya tanchi c'u ib alak chuxe' ruc'ayewal wa' wa takanic. 2Chinta na pe alak. Ri'in Pablo, cambi'ij che alak: We caya ib alak che ucojic ri retalil re circuncisión cha' cac'oji' alak jusuc' chwach ri Dios, ri' na jinta uchac ri Cristo che alak. 3Cuaj cambi'ij tanchi wa': We juna achi cucoj ri retalil re circuncisión,#5:3 Wa' e cach'a't paquiwi ri na e ta aj judi'ab, ri xquicoj ri retalil re circuncisión ma e xquich'obo ruc' wa' caquirik ri colobetajic. ri' chirajawaxic che e cu'an ronoje ri takanic que raj judi'ab. 4Ec'u ralak, ri cach'ob alak e cu'an alak jusuc' chwach ri Dios ruma ri catakej alak wa takanic, ri' che ri Cristo xesaj wi ib alak y e xya can alak ri unimal rutzil uc'u'x ri Dios. 5No'j ri'oj, ruma ri Ruxlabixel ri Dios pa kanima', koye'em ri k'ij echiri' ri Dios cojuc'ulu ma oj chi jusuc' chwach ruma ri cubulibal kac'u'x ruc' ri Cristo. 6Yey we oj re ri Kanimajawal Jesucristo, na jinta chi que'elawi we cakacoj ri retalil re circuncisión o we na cakacoj taj. Ma ri lic chirajawaxic e ri cubulibal kac'u'x ruc' ri Cristo, yey wa' e cakac'ut ruma ri rutzil kac'u'x.
7Ri binic silabic alak ruc' ri Cristo xjek lo alak chi utz. ¿China xk'aten e alak cha' na cabin ta chi alak chupa ri K'ijsak? 8Ri Dios, ri xusiq'uij alak, na e ta xuc'ut wa' che alak. 9Masach chic'u'x alak wa': «Echiri' que'ec jubik' levadura chupa ri k'or re pam, wa' cusipowirisaj upa ronoje.» Wa' e que'elok: E junok na sakil ta runa'oj, cusachisaj ri quina'oj ri jujun chic. 10Ruma c'u kaya'om kib ralak y ri'in puk'ab ri Cristo, e lic cubul nuc'u'x na jinta juna chic na'oj alak puwi wa' chwa ri canch'ob ri'in. Yey we c'o junok cusachisaj na'oj alak, c'o chi ri' ri k'atbal tzij re ri Dios puwi', xa tob chinok.
11Ec'u ri'in hermanos, we ta e la' cambi'ij chirajawaxic cacoj ri retalil re circuncisión che junok cha' cacolobetajic, ri' raj judi'ab na quech'o'jin ta chi wuc' y na tzel tane caquita ri tzijonic can'an puwi rucamic ri Kanimajawal Jesucristo chwa ri cruz. No'j na je ta la' u'anom. 12Ec'u chique ri caquisachisaj na'oj alak, ¡ta ne asu quik'ata bi ri culewal!
13Ma ralak hermanos, xsiq'uix alak cha' na cac'oji' ta alak chuxe' ri takanic que raj judi'ab; xew c'u matz'ila' ri binic silabic alak ruc' tak ri rayibal re ri ti'jil alak. E nimaj ib alak chiwach alak ruc' rutzil c'u'xaj. 14Ma ronoje ri takanic re ri Moisés catz'akat uwach ruc' wa ch'a'tem: «C'ax chana'a rawatz-achak' jela' pacha' ri c'ax cana' awib ri'at»#Lv. 19:18 cacha'. 15No'j we ralak capurij ib alak y catij ne ib alak chiwach alak, chajij c'u ib alak ri' ma c'axtaj asu casach ne wach alak chiwach alak.
Tak ri rayibal na utz ta uwach que ri ticawex
16Cambi'ij c'u wa' che alak: E takej alak janipa ri caraj ri Ruxlabixel ri Dios che alak cha' jela' na caya ta ib alak che tak ri rayibal re ri ti'jil alak. 17Ma e rurayibal ri ti'jil alak na cuc'ulaj ta rib ruc' ri caraj ri Ruxlabixel ri Dios, yey e ri Ruxlabixel ri Dios na cuc'ulaj ta rib ruc' rurayibal ri ti'jil alak. Quicabichal c'u ri' quech'o'jin chiquiwach; ruma c'u la', ri ti'jil alak cuk'atej ri utz ca'aj alak ca'an alak. 18No'j we e ri Ruxlabixel ri Dios ri cac'amaw wach alak, ri' na jinta alak chuxe' ri takanic re ri Tzij Pixab.#5:18 Wa' na e ta que'elawi utz cojmacunic. E que'elawi ri Ruxlabixel ri Dios cojuto'o cha' caka'an ronoje ri caraj ri Dios. Ro. 6:15
19Lic cak'alajin uwach tak ri na utz taj caqui'an ri winak ri caquitakej tak ri rayibal re ri quiti'jil. Rique e quemacun chirij ri c'ulaniquil, caquetz'abej uwa quik'ij cuc' jujun chic na quic'ulel taj, caqui'an ri ch'ulilaj mac y caquimaj uwach tak ri rayibal re ri quiti'jil, 20caquilok'nimaj uk'ij tiox, caqui'an itz, tzel quequil jujun chic, e aj ch'a'oj, c'ax quic'u'x chiquij jujun chic; e aj oyowal, e aj chapanel che ch'a'oj, e aj jachal quipa jujun chic, e aj c'utunel re tak na'oj na utz taj#5:20 “E aj c'utunel re tak na'oj na utz taj”: Pa ri ch'a'tem griego wa' también que'elawi “ri xew caquimol quib cuc' ri junam quina'oj cuc' rique”. 21tzel caquil jun chic ruma caquirayij ri c'o ruc', e camisanel, e k'aba'relab, caquimol quib re caqui'an ch'ulilaj mac y caqui'an jujun chic mac pacha' tak wa'. Cambi'ij c'u jumul chic che alak: Conoje wa' na jinta que cuc' ri ya'tal chique queboc pa rutakanic ri Dios.
Ri quibinic quisilabic ri quitakem janipa ri caraj ri Ruxlabixel ri Dios
22No'j rujik'obalil ri Ruxlabixel ri Dios ruc' junok e wa': pa ranima' c'o rutzil c'u'xaj, c'o qui'cotemal y c'o utzil chomal; c'o unimal uc'u'x, utz uc'u'x, c'o relej uc'u'x; ri jujun chic cacubi' quic'u'x ruc', ma janipa ri cubi'ij, e cu'ana'; 23na cu'an ta nim che rib y cuch'ij uchuk'ab tak ri rayibal re ruti'jil. We jec'uri'la' u'anom junok, na cajawax tane ri' c'o junok capixaban re cha' cu'an ri utz. 24Janipa ri e re ri Kanimajawal Jesucristo, na caquitakej ta chi#5:24 “Na caquitakej ta chi”: Pa ri ch'a'tem griego cubi'ij “quicamisam chwa cruz”. ri rayibal re ri quiti'jil. 25We ri Ruxlabixel ri Dios uya'om ri c'ac' kac'aslemal, kaya'a c'u ri kabinic kasilabic puk'ab Rire. 26Makatzucuj ri yacbal kak'ij, makapetisaj koyowal chikawach y matzel mekil jujun chic ruma cakarayij ri c'o cuc'.
Currently Selected:
Gálatas 5: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
