Efesios 1
1
Ri Pablo cuya pan rutzil quiwach ri hermanos e c'o Éfeso
1Ri'in in Pablo in tako'n re ri Kanimajawal Jesucristo; e ri Dios intakayom re, ma e xraj ri' chwe. Cantz'ibaj pan wa carta che alak ri c'o alak pa ri tinamit Éfeso,#Hch. 18:19-21; 19:1 ri c'o alak puk'ab ri Cristo y tiquil alak chi utz chupa rubi'. 2C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ronoje tak ri utz uch'obom lo ri Dios e cuya chike ruma ri Cristo
3¡Lic nim uk'ij ri Dios, Rukaw ri Kanimajawal Jesucristo! Ruma oj chi re ri Cristo, ri Dios uya'om lo chike ronoje tak ri to'bal petinak chila' chicaj. 4Ma ri Dios c'amaja' ne cu'an ruwachulew echiri' xojucha' lok cha' cojuya puk'ab ri Cristo, y jela' coju'an jusuc' y na jinta chi ne c'ana kamac chwach. 5Ruma c'u rutzil uc'u'x ri Dios, lic ojertan xujiquiba' lo uwach cha' cu'an ralc'o'al chike ruma ri Kanimajawal Jesucristo. Yey lic pa ranima' xalax wi cu'an wa'. 6Cakayac c'u uk'ij ri Dios ruma ri unimal rutzil uc'u'x pakawi', ri xuya chike ruma Ruc'ajol, ri lic c'ax cuna' Rire. 7Ruc' c'u ri' ri Cristo c'o kacolobetajic y c'o cuybal kamac ruma ruquiq'uel xturuwic, yey karikom wa' ruma ri unimal rutzil uc'u'x ri Dios. 8Na jinta c'u utakexic wa rutzil uc'u'x uya'om lo pakawi'. Yey xuya ne chi sak ri kana'oj 9cha' caketa'maj sa' runa'oj Rire, ri na uya'om ta che reta'maxic ojertan. Ma uch'obom chi lo ojertan chiribil rib sa' ri caraj cu'an ruma ri Cristo 10echiri' copon na ruk'ijol cuc'am lo ronoje tak ri c'olic, wa' e tak ri e c'o chila' chicaj y ri e c'o che ruwachulew, yey cuya na ronoje wa' puk'ab ri Cristo cha' catakan puwi'.
11Ruma c'u oj re ri Cristo, cakac'ul na rubi'tisim lo ri Dios chike, ma xojucha' lo ojertan cha' caka'an janipa ri uch'obom chi lo Rire. Yey Rire lic e cu'ana ronoje ri caraj cu'ano jela' pacha' ri uch'obom chi ulok. 12Xojucha' c'u ri' re yacbal uk'ij Rire cha' quilitaj ruchomalil kuma ri'oj, ri nabe xcubi' kac'u'x ruc' ri Cristo. 13Ec'uchiri' ralak xta alak rutzijoxic ri K'ijsak, ri Utzilaj Tzij puwi su'anic cacolobetaj alak; xcubi' c'u'x alak ruc' ri Cristo y xc'ul c'u alak ri bi'tisim canok: Wa' e ri Santowilaj Ruxlabixel ri Dios pa anima' alak, c'utubal re, alak chi re ri Dios. 14Yey ri Ruxlabixel ri Dios pa kanima' e cajiquiban uwach chike, chikawach apanok cakac'ul na rutz'akatibal janipa ri ubi'tisim can ri Dios chike cha' jela' cakayac uk'ij ri Dios ruma ri unimal uchomalil.
Ri Pablo cu'an orar paquiwi ri hermanos
15Ruma c'u nutom lic cubul c'u'x alak ruc' ri Kanimajawal Jesucristo y lic c'utum ri rutzil c'u'x alak chique conoje ri quicojom rubi', 16na quinuxlan ta che quintioxin chwach ri Dios uma ralak echiri' can'an orar. 17Can'an orar chwach ri Kakaw ri lic nim uk'ij, ri Dios re ri Kanimajawal Jesucristo. Cantz'onoj c'u che chuya'a lo na'oj alak ruma ri Ruxlabixel y chuk'alajisaj c'u chiwach alak runa'oj Rire cha' jela' queta'maj alak uwach chi utz. 18Yey cantz'onoj che ri Dios cuya chi sak ri na'oj alak cha' jela' queta'maj alak chi utz sa' tak ri oye'em alak, ma alak siq'uim ruma ri Dios. Cheta'maj c'u alak sa' ri chomilaj beyomalil ubi'tisim chique conoje ri e re Rire. 19Cuaj c'ut lic queta'maj alak runimal uchuk'ab ri Dios, ma wa' na jinta cajunumitaj wi. Y wa uchuk'ab c'o chi kuc', ma ruc' wa' ri Dios cachacun chikaxo'l ri'oj ri lic cubul kac'u'x ruc'. 20Wa' wa uchuk'ab e xuc'utu echiri' xuc'astajisaj lo ri Cristo chiquixo'l tak ri ecaminak y xutz'uyuba' puwiquik'ab chila' chicaj. 21Jela' ri Dios xuya puk'ab ri Cristo catakan paquiwi conoje ri e takanelab, ri lic c'o quiwach, ri c'o quichuk'ab y ri lic yacom quik'ij. Ma rubi' ri Cristo e más nim uk'ij chwach ronoje tak bi'aj, ma na jinta jun chic más c'o uwach chwa Rire; y wa' na xew ta wo'ora ma jela' chikawach apanok. 22Ec'u ri Dios xuya ronoje xe'rakan uk'ab ri Cristo y xucojo cha' cu'an unimal ujolom riglesia 23y riglesia e ucuerpo Rire. Jec'ula' ri Cristo ruc' riglesia junam catz'akat quiwach, y e ri Cristo ri catz'akatisan re janipa tak ri c'olic.
Currently Selected:
Efesios 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.