1 Corintios 7
7
Pixabanic puwi ri c'ulaniquil
1Ec'u wo'ora canc'ul pana uwach tak ri tz'onobal x'an lo alak chwi ri c'ulaniquil pa ri carta xtak lo alak chwe. We juna achi cac'oji' utuquel y na jinta ixok ruc', utz ri cu'ano. 2Pero ruma c'u ri tzakibal pa mac re rurayibal ri cuerpo, más utz c'u ri' we rachi c'o rixokil y rixok c'o rachijil. 3Chirajawaxic c'ut e rachi chu'ana janipa ri takal che cu'an ruc' ri rixokil ruma e c'ulanic; jec'ula' rixok chu'ana janipa ri takal che cu'an ruc' ri rachijil. 4Rixok na e ta rajaw rucuerpo ma rucuerpo puk'ab ri rachijil c'o wi; jec'ula' rachi na e ta rajaw rucuerpo ma wa' puk'ab ri rixokil c'o wi. 5Maxu'yaj c'u ib alak ri' chiwach alak ruc' ri rayibal alak, xew we ch'a'tibem chi alak cha' na cajunimaj ta ib alak queb oxib k'ij ruma caya ib alak pa oración. Ec'uchiri' caq'uis ruk'ijol ri oración, junimaj tanchi ib alak. Ma we lic naj na cajunimaj ta ib alak, laj cac'am pa alak ruma ri Satanás y na cach'ij ta c'u alak uchuk'ab. 6Cambi'ij c'u wa' xa pacha' nupixabanic ri'in che alak; na e ta jun takanic. 7Ec'u ri canch'ob rakan ri'in e lic utz ri' we ta conoje rachijab quec'oji'ic jela' pacha' nu'anom ri'in. Na ruc' ta c'u ri', puk'ab ri Dios c'o wi sa' rusipanic cuya chiquijujunal. Ma chique jujun uya'om cachbi'il, yey chique jujun chic uya'om quec'oji' quituquel.
8Cuaj cambi'ij chique ri achijab na e ta c'ulanic y rixokib e malca'nib, e lic utz we rique quecanajic e la' quituquel pacha' ri nu'anom ri'in. 9No'j we rique na caquich'ij taj e c'o quituquel, más utz we quec'uli'ic, ma na utz taj we e caquiya quina'oj puwi ri quirayibal y jec'ula' caquiq'uis quib.
10Chique c'u ri e c'ulanic, cambi'ij wa': Na utz taj we rixok cujach can ri rachijil. Y wa jun takanic na xa ta nuch'a'tem ri'in, wa' re ri Kanimajawal. 11Pero we rixok cujach can ri rachijil, na utz taj we cac'uli' ruc' jun chic. Ri chu'ana' e canaja na can utuquel o tzeleja tanchi ruc' ri rachijil y c'ola chi utzil chomal. Yey jela' rachi, e mujach can ri rixokil.
12Chique ri nic'aj chic cambi'ij, tob wa' xa in quimbi'n re, na e ta utakanic ri Kanimajawal: We juna hermano c'o rixokil na ucojom ta rubi' ri Cristo, yey wa' wi'xok caraj cac'oji' ruc', na utz ta c'u ri' we ri hermano cujach canok. 13Yey jela' ruc' ri hermana c'o rachijil na ucojom ta rubi' ri Cristo, we wa' wa'chi caraj cac'oji' ruc', na utz ta c'u ri' we ri hermana cujach canok. 14Ma we e la' juna ixok ucojom rubi' ri Cristo yey ec'u ri rachijil c'amaja' cucojo, ruk'ab ri Dios cac'oji' puwi wa'chi ruma ri rixokil. Ma we na e ta u'anom ri', ruk'ab ri Dios na cac'oji' ta paquiwi ri ralc'o'al. Pero na e ta u'anom, ma ruk'ab ri Dios c'o paquiwi'.
15Yey we e la' juna achi o juna ixok na ucojom ta rubi' ri Cristo y caraj cujach can ri rachbi'il ucojom rubi' ri Cristo, quijacha na c'u quib. Ma che ri ucojom rubi' ri Cristo, na mac taj we na e ta rire xtzucun ri jachanic. Ma ri Dios ojusiq'uim re cojc'oji' chi utzil chomal. 16C'ola c'u utzil chomal ri' chixo'libal alak, ma c'axtaj uma rilal hermana, cacolobetaj ri achijil la; o c'axtaj uma rilal hermano, cacolobetaj ri ixokil la.
17E chirij tak c'u ri qui'anom echiri' xesiq'uix ruma ri Kanimajawal, chiquijujunal utz checanajok jela' pacha' ri ebuya'om wi ri Dios. Y wa' wa nubi'im che ralak, e takanic can'an chique conoje ri caquimol quib pubi' ri Cristo. 18We c'o c'u juna achi c'o chi ri retalil re circuncisión che echiri' xsiq'uix ruma ri Kanimajawal, utz jela' cacanaj canok. O we c'o juna achi na jinta ri retalil re circuncisión che echiri' xsiq'uix ruma ri Kanimajawal, na chirajawaxic taj cacoj che. 19Ma ri chirajawaxic wi na e ta we jun ucojom ri retalil re circuncisión o we na ucojom taj, ma ri lic chirajawaxic wi che jun e cu'an ronoje rutakanic ri Dios.
20Ec'u chirij ri c'o wi jun echiri' xsiq'uix ruma ri Dios, utz we jela' cacanaj canok. 21We lal c'o la puk'ab ri ajaw la echiri' xsiq'uix la ruma ri Dios, mubisoj c'u'x la; yey we caya'taj che la quel la puk'ab ri ajaw la, lic utz ri'. 22Ma e junok c'o puk'ab rajaw echiri' xsiq'uix ruma ri Kanimajawal, ri' quesax lo puk'ab ritzel ruma ri Kanimajawal. Yey e junok na jinta puk'ab rajaw echiri' xsiq'uix ruma ri Dios, wo'ora puk'ab ri Cristo c'o wi. 23Ec'u ralak alak re ri Dios, ma Rire ulok'om chi alak ruc' rucamic ri Cristo. E uwari'che, maya ib alak paquik'ab ri ticawex xa ruma e lic catakej alak ri quina'oj. 24Hermanos, ec'u chirij ri c'o wi jun echiri' xsiq'uix ruma ri Dios, lic utz we jela' cacanaj can chwach ri Dios.
25Chique c'u ri na e ta c'ulanic, na jinta takanic uya'om ri Kanimajawal chwe puwi wa', pero canya c'u ri nupixabanic ri'in chwi wa'. Y canch'ob c'ut utz cacubi' c'u'x alak wuc' puwi ri cambi'ij, ma ya'tal chwe ri'in ruto'bal ri Kanimajawal. 26Chinuwach ri'in, ruma ri c'axc'obic oj c'o wi wo'ora, e utz we junok cacanaj canok jela' pacha' ri u'anom. 27Pero we c'o chi awixokil, majach canok. No'j we na jinta awixokil, mu'an e ubis ac'u'x catzucuj awixokil. 28Pero we catc'uli'ic, utz; ma na mac taj we jun cac'uli'ic. Jenela' juna ali we cac'uli'ic, na mac taj. Pero e ri quec'uli'ic cape uc'ayewal che ri quic'aslem. Ec'u wa ya'l c'ayew na cuaj ta che alak.
29Hermanos, ri cuaj c'ut cambi'ij che alak e wa': E tak ri k'ij c'o chikawach na naj ta chic. E uwari'che e rachi c'o rixokil, mu'an ri xew lic e c'o una'oj puwi ri rixokil.#7:29 Pa ri ch'a'tem griego cubi'ij: “Janipa ri c'o quixokil e qui'ana pacha' ri na jinta quixokil”. Wa' na e ta que'elawi utz we junok na coc ta il che ri rixokil. Ri que'elawi e chirajawaxic también cakilij ruchac ri Kakaw. 30Jec'ula' janipa ri quebok'ic, maquiya quib xew che ri quibis. Janipa ri quequi'cotic, maquiya quib che ri qui'cotemal. Janipa ri caqui'an lok'oj, me'ec quic'u'x ruc' rubitak que. 31Yey janipa ri caqui'cot quic'u'x ruc' tak ri c'o che ruwachulew, me'ec quic'u'x puwi wa'. Ma ronoje ri quilitaj che ruwachulew, xa quic'owic.
32Ri cuaj ri'in che alak e ri na jinta ubis c'u'x alak. Ri hermano na c'ulan taj, ruma na jinta ya'l c'ayew che, puk'ab c'owi lic cuya rib che ri chac re ri Kanimajawal y cutakej janipa ri caraj Rire. 33No'j ri hermano c'ulanic e cutakej su'anic quebuchajij rufamilia wara che ruwachulew y cutakej sa' ri caraj ri rixokil. 34Jec'ula' na xa ta jun uwach ruchac, ma cu'an ri cajawax pa ruchac ri Dios y cu'an ri cajawax chique rufamilia. Y jenela' cuc' ri hermanas. Ma ri hermana na jinta rachijil, na jinta ya'l c'ayew che lic cutakej sa' ri caraj ri Kanimajawal, ma utz c'u ri' cuya rib puk'ab ri Dios ruc' rucuerpo y ronoje ranima'. No'j ri hermana c'ulanic e cutakej su'anic quebuchajij rufamilia wara che ruwachulew y cutakej sa' ri caraj ri rachijil. 35Ec'u wa' wa ximbi'ij che alak re to'bal e alak, na re ta cancoj k'atbal chiwach alak; ma e cha' cac'oji' alak pa sakil wi y jec'ula' na jinta ya'l c'ayew re caya ib alak che ruchac ri Kanimajawal.
36Laj c'o junok c'o umi'al#7:36-38 Pa ri ch'a'tem griego cubi'ij “k'apoj ali”, pero na k'alaj taj we ri versículos 36-38 e cach'a't puwi juna achi ruc' ri umi'al o juna ala ruc' ri ali ujiquibam chic cac'uli' ruc'. na jinta rachijil y cuch'ob c'u rakan: «Laj na usuc' taj we na canya ta luwar che ri numi'al cac'uli'ic, ma c'o chi rujunab.» We rachi cuch'ob c'u rakan takal che rumi'al cac'uli'ic, e chu'ana ri', ma na mac taj. 37No'j we c'o juna achi lic cuna' chuc'u'x utz cac'oji' rumi'al utuquel, puk'ab rire c'o wi we cuc'uluba' rumi'al o na cuc'uluba' taj. Utz we na cuc'uluba' taj, pero xew we lic ujiquibam uwach ri cu'ano y na jinta junok xminow uwach chupa. 38E junok cuc'uluba' rumi'al, utz ri cu'ano; yey ri na cuc'uluba' taj, más ne utz ri cu'ano.
39Juna ixok c'ulanic na jinta puk'ab cac'uli' ruc' jun chic we c'a c'as ri rachijil. No'j we ri rachijil xcamic, puk'ab c'o wi cac'uli' china ruc' caraj wi rire, xew tane we ruc' junok uya'om rib puk'ab ri Kanimajawal. 40Pero c'u chinuwach ri'in e más c'o qui'cotemal che rixok malca'n we na cac'uli' ta tanchic, yey ri'in canch'obo wa cambi'ij e ruma ri Ruxlabixel ri Dios c'o wuc'.
Currently Selected:
1 Corintios 7: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
