1 Corintios 6
6
Chirajawaxic e ralak ri cayijban alak ri ch'a'oj chixo'libal alak
1Hermanos, echiri' c'o junok che alak cucoj umac juna chic hermano, ¿su'be cu'ya'a wa' chwa juna aj k'atal tzij na bare ta cuq'uil rutinamit ri Dios? Ma ri lic ube e cayijba' alak wa' chiquiwach rutinamit ri Dios. 2¿Na eta'am ta neba alak copon jun k'ij rutinamit ri Dios caquik'at ne tzij paquiwi ri e c'o che ruwachulew? We copon c'u wa' wa k'ij echiri' cak'at alak tzij paquiwi ri e c'o che ruwachulew, ¿na jinta cami pak'ab alak ri' cak'at alak tzij puwi ri lic na il ta uwach c'o wo'ora? 3¿Na eta'am ta neba alak copon jun k'ij echiri' ri oj ralc'o'al ri Dios cakak'at ne tzij paquiwi ri ángeles na e ta jusuc'? We ec'u ri', lic takal che alak carik alak uyijbaxic wo'ora ri ch'a'oj cawinakir chixo'libal alak wara che ruwachulew. 4We c'o c'u ch'a'oj chiwach alak puwi ri xa re ruwachulew, ¿su'be que'ec alak chiquiwach e aj k'atal tzij na jinta c'ana que che rutinamit ri Cristo? 5Cambi'ij c'u wa' cha' caq'uix c'ana alak che. Hermanos, ¿na jinta cami junok che alak c'o una'oj cha' cuyijba' ri ch'a'oj cawinakir chixo'libal alak? 6¿Utz neba la' we c'o ch'a'oj chiquixo'l ri hermanos yey caquic'am c'u bi wa' chwa juna aj k'atal tzij na reta'am ta uwach ri Dios? ¡Na utz taj!
7C'o ch'a'oj chiwach ralak y wa' e c'utubal re lic na utz ta 'anom alak. Ma ri lic ube e cacuy alak ri na usuc' taj ca'an chi'ij alak tob ne ca'an elek' che alak ruc' socoso'nic. 8No'j ralak e ca'an alak ri na ube taj y ca'an ne alak elek' ruc' socoso'nic, ¡yey wa' chique ri jujun chic hermanos ca'an wi alak! 9¿Na eta'am ta neba alak hermanos, e ri na jusuc' ta ri quibinic quisilabic na jinta que cuc' ri queboc chupa rutakanic ri Dios? Lic masocotaj alak; ma e janipa ri caquetz'abej uwa quik'ij cuc' jujun chic na quic'ulel taj, ri e aj tioxab, ri quemacun chirij ri c'ulaniquil, rachijab caqui'an che quib pacha' e ixokib, rachijab caqui'an quic'ulel chique cach achijab, 10ri elek'omab, ri lic que'ec quic'u'x ruc' ri puak, ri caquiya quib che k'abaric, ri e ch'aminel, ri c'o caquimaj chique jujun chic ruc' socoso'nic; conoje tak c'u wa' na jinta que cuc' ri queboc chupa rutakanic ri Dios. 11E c'o c'u jujun che alak rojertan e c'o chupa tak wa' wa mac. No'j wo'ora ch'ajtal chi alak che ri mac, ya'tal chi alak puk'ab ri Dios cha' cabin alak jusuc' chwach, yey u'anom c'u che alak na jinta chi mac alak chwach ri Dios. Y ronoje wa' e ruma cojom alak rubi' ri Kanimajawal Jesucristo y ruma ri u'anom ri Ruxlabixel ri ka Dios pa anima' alak.
Kayaca uk'ij ri Dios ruc' ri kacuerpo
12E c'o ri quebi'n re: «Panuk'ab c'o wi can'an sa' ri cuaj can'ano» quecha'. Katzij, pero na ronoje ta c'ut takal chwe can'ano. «Panuk'ab c'o wi can'an sa' ri cuaj can'ano» quecha'. Na ruc' ta c'u ri', na canya ta luwar che ri rayinic re ri nucuerpo catakan panuwi'. 13E c'o jujun chic caquibi'ij: «Ri cakatijo e uwach re ri kapa yey ri kapa e uwach cuc'ul ri cakatijo» quecha'. No'j c'o jun k'ij echiri' ucabichal wa' casach uwach ruma ri Dios. Ec'u ri kacuerpo na re ta caketz'abej uwa uk'ij ruc' ch'ulilaj mac, ma ri kacuerpo e re ri Kanimajawal y puk'ab ri Kanimajawal c'o wi. 14Chwach c'u ri' ri Dios, lic c'o uwach ri kacuerpo. Ma jela' pacha' xu'an ri Dios che ri Kanimajawal echiri' xuc'astajisaj lo chiquixo'l ri ecaminak ruc' ruchuk'ab, jec'ula' cu'an chike ri'oj chikawach apanok. 15¿Na eta'am ta cami alak ri', ri cuerpo alak xa jun u'anom ruc' rucuerpo ri Kanimajawal Jesucristo? ¿Utz nawi we ri'in in re ri Cristo yey canwesaj bi wib puk'ab Rire y canyoj c'u wib ruc' juna ixok xaki camacun cuc' achijab? ¡Lic na utz ta ri'! 16¿O na eta'am ta cami alak echiri' juna achi cuyoj rib ruc' juna ixok xaki camacun cuc' achijab, wa' cu'ana xa jun ruc'? Ma jewa' tz'ibital can chupa ri Tzij Pixab re ri Dios: Rachi y rixok echiri' caquijunimaj quib, «quicabichal quebu'ana xa e jun chwach ri Dios»#Gn. 2:24 cacha'. 17Jec'ula' we c'o juna ticawex cuya rib puk'ab ri Kanimajawal, cu'an xa jun uc'u'x ruc'.
18Cambi'ij c'u wa' che alak: Lic chajij ib alak cha' na catzak ta alak pa ri mac cu'an jun echiri' caretz'abej uwa uk'ij ruc' jun chic na uc'ulel taj. Ma ri jujun chic mac na caretzelaj ta ri cuerpo pacha' wa jun mac, yey we jun cu'an wa', ri' chirij rucuerpo camacun wi. 19¿Na eta'am ta neba alak, ri cuerpo alak e rocho ri Ruxlabixel ri Dios? Ma ri Dios uya'om ri Santowilaj Ruxlabixel che alak cha' cajeki' pa anima' alak. Y ruma c'u la', na alak ta chi rajaw ri c'aslemal alak. 20Alak chi re ri Dios, ma Rire xulok' alak ruc' rucamic ri Kanimajawal.#Ef. 1:7 Ec'u uwari'che, yaca alak uk'ij ri Dios ruc' ri cuerpo alak y ruc' ronoje anima' alak, ma ucabichal wa', re ri Dios.
Currently Selected:
1 Corintios 6: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
